आफैँले 'ड्रिम प्रोजेक्ट' भनेकाे 'अन्तर्राष्ट्रिय रंगशाला'बाट ओलीले किन झिके हात ?

आफैँले 'ड्रिम प्रोजेक्ट' भनेकाे 'अन्तर्राष्ट्रिय रंगशाला'बाट ओलीले किन झिके हात ?

A+ A A-

राष्ट्रपति विद्यादेवी भण्डारीले रक्षामन्त्री हुँदा २०६७ सालकाे वैशाखमा झापाको कमल नगरपालिका–५ पाडाजुंगीमा अन्तर्राष्ट्रिय रंगशालाकाे शिलान्यास गरेकी थिइन् । २०७० सालकाे निर्वाचनका बेला नेकपा एमालेका अध्यक्ष केपी शर्मा ओलीले याे रंगशाला पाँच वर्षभित्रै तयार हुने उद्घोष गरेका थिए । उनले यो रंगशालालाई आफ्नो ड्रिम प्रोजेक्ट समेत भनेका थिए ।

ओलीले २०७२ सालमा प्रधानमन्त्री भएपछि रंगशालाका लागि थप बजेट विनियोजन गर्दै ‘मदन भण्डारी अन्तर्राष्ट्रिय रंगशाला’ नामकरण गरे । ओली सरकारले रंगशालाको नाम ‘मदन भण्डारी अन्तर्राष्ट्रिय रंगशाला’ राखेपछि झापा र इलामका आदिवासीहरूले विरोध पनि गरेका थिए ।

उनीहरूले यसकाे नाम ‘आदिवासी रंगशाला’ राख्नुपर्ने भन्दै आन्दाेलनसमेत गरेका थिए । सबै पार्टीका शीर्ष नेताहरूलाई ज्ञापनपत्र पनि बुझाए । धर्ना दिए र पटक–पटक प्रदर्शनसमेत गरे । ओली दोस्रोपटक प्रधानमन्त्री बनेपछि झापामा रंगशालाको नाम फेरेर ‘मदन भण्डारी अन्तर्राष्ट्रिय रंगशाला’ नै राखे । त्यसयता लगातार विरोध भइरह्यो ।

ओलीले दोस्रोपटक प्रधानमन्त्री भएपछि आफ्नै गृहनगर दमक नगरपालिका– ३ को हम्सेदुम्से सामुदायिक वन क्षेत्रमा ‘मदन भण्डारी अन्तर्राष्ट्रिय रंगशाला’ निर्माणको काम अघि बढाए । यही मौकाको फाइदा उठाउँदै ओलीले पाडाजुंगीमा निर्माणाधीन रंगशाला निर्माण स्थगित गर्ने योजना बनाए ।

२०७४ सालको निर्वाचनयता ओलीले पाडाजुंगीमा अन्तर्राष्ट्रिय रंगशाला बनाउन र यसका बारेमा केही बोल्न छाडेका छन् । साथै अहिले उनले यो ड्रिम प्रोजेटलाई चुनावी एजेन्डाबाट समेत हटाइदिएका छन् ।

४० बिघा क्षेत्रफलमा हम्सेदुम्से सामुदायिक वनको एक हजार नौ सय २४ वटा रुख फँडानी गर्नुपर्ने डिभिजन वन कार्यालय झापाले जनाएको छ । तर, यति धेरै रुख काट्नुपर्ने भएपछि यो रंगशाला निर्माणको कामसमेत रोकियो ।

ओलीकै कारण गाैचरनमा परिणत भएको आरोप

सरकारले २०७४ सालमा रंगशालाको नाम ‘आदिवासी रंगशाला’ राख्ने प्रतिबद्धता गरेर आन्दोलित आदिवासीहरूलाई थामथुम गरेको थियो । यो रंगशालाका लागि सरकारले बजेटसमेत विनियोजन गरेको थियो ।

त्यसपछि रंगशाला बनाउन मैदान सम्याउने, घेरबार र प्यारापिट निर्माणको काम अघि बढ्यो । अहिले त्यो सबै प्याराफिट र घेरबार भत्किसकेकाे छ ।

सरकार र आदिवासीबीच भएको सम्झौताअनुसार रंगशाला बनाउने भनिएको ठाउँमा आदिवासीको चिहान थियो । नौ सयभन्दा बढी पूर्वजको समाधिस्थल मासेर आदिवासी रंगशाला बनाउन धमाधम चिहान उधिन्ने काम गरियो । ओली प्रधानमन्त्रीबाट हट्नुभन्दा अढाई महिनाअघि राखेपले ३५ हजार दर्शक क्षमताको रंगशाला निर्माणका लागि टेन्डर आह्वान गरेर ठेक्का लगाउने अन्तिम तयारीसमेत भएको पाडाजुंगी आदिवासी प्रतिष्ठानका अध्यक्ष हुकुमसिंह राईले जानकारी दिए ।

निवर्तमान प्रधानमन्त्री ओलीले व्यक्तिगत स्वार्थका कारण परियोजना दमकमा सारेको भन्दै प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्डलाई भेटेर ध्यानाकर्षण गराउने प्रतिष्ठानका अध्यक्ष राईले बताए । ‘पाडाजुंगीमा अन्तर्राष्ट्रिय रंगशाला बनाउन नदिन ओली नै लागे । जसका कारण अहिले गाैचरनमा परिणत भएको छ । अब आउने सरकारले सहयोग गर्छ भन्ने अपेक्षा गरेका छौँ’, उनले भने ।

तर दमक नगरपालिकाका पूर्वमेयर रोमनाथ ओली आदिवासीहरूका बीचमा नै विवाद भएका कारण रंगशाला निर्माणकाे काम अघि नबढेको दाबी गर्छन् । ‘पाडाजुंगीमा अन्तर्राष्ट्रिय रंगशाला बनाउन एमाले अध्यक्ष ओलीले अन्तिमसम्म प्रयास गर्नुभएको थियो । तर, केही व्यक्तिको स्वार्थका कारण रोकियो’, उनले भने, ‘अहिले अन्तर्राष्ट्रिय रंगशाला नबनेपछि झापाकै आदिवासीले पछुताे मानेका छन् । नामकरण भन्दा पनि यहाँको विकास र प्रतिष्ठाको विषय थियो ।’

राष्ट्रिय खेलकुद परिषद् (राखेप)ले दमकमा रंगशाला निर्माणका लागि चार अर्ब ४० करोड लागत अनुमान गरेको थियो । त्यसका लागि चार अर्ब ३३ करोड ५८ लाखमा ठेक्का दिने तयारी भए पनि नाममा भएकाे विवादका कारण ठेक्का प्रक्रिया नै अघि बढेन । अहिले पनि यो रंगशाला बनाउन आदिवासीले माग गरिरहेका छन् ।

प्रकाशित मिति: बुधबार, कात्तिक २३, २०७९ ०८:४८