भोट कसलाई दिने ?

A+ A A-

यो चुनावी माहौलको समय हो । गाउँ, शहर पूरै देश निर्वाचनमय भएको छ । प्रतिनिधिसभा र प्रदेशसभा निर्वाचनका लागि उम्मेदवारहरू भोट माग्दै हिँडेका छन् । खरका झुपडीदेखि ठूलाठूला होटलहरू एकाबिहानैदेखि प्याक भएको देखिन थालेको छ । बाली थन्क्याउने चटारोमा लागेका किसानहरूसमेत पार्टीको झण्डा बोकेर हिँडेका छन् । उम्मेदवारहरू जितकाे लक्ष्यसहित जनताका घरघरमा, खेतखेतमा पुगेका छन् । लाग्छ, यतिबेला त देश नै फन्नी भएको छ । नेताहरू 'फन्नी' भएकाले मतदाताहरू पनि 'फन्नी' भइसकेका छन् ।

घरघरमा मात्र नभएर खेतबारीमा काम गरिरहेका किसानहरूलाई समेत भेट्न उम्मेदवार पुगेको देखिएको छ । सहयोग गरेको नाटक पनि सञ्जालमा देखिएकै छ । बेलैमा मल नपाउने किसानले पनि अहिले त नमस्कार छिनछिनमै पाएका छन् । पीडित हुँदा तिनै नेताले आवाज नसुनिदिएर झन् पीडित बनेका व्यक्तिहरूले पनि नमस्कारका साथ सुनुवाइको आश्वासन पाएका छन् । अब हामीले यस्ता उम्मेदवार चुनेर के गर्ने ?

'मेरो दल नै मेरो देश हो । मेरो दलले, मेरो पार्टीले हार्‍यो भने मेरो देशले हार्छ, नेपाल आमाको मन रुन्छ । देश अधोगतितिर जान्छ ।'

जनताका घरघरमा, खेतखेतमा गएर अहिले नेताहरूले यसै भन्ने गरेका छन् । प्रत्येक पाँच वर्षमा अनुहार देखाउन आउनेहरूलाई के छ र ? भोटका लागि जे पनि भनिदिन्छन्, कुनै आइतबारै पर्खिंदैनन् । जनतालाई आशाको त्यान्दोमा झुन्ड्याएर चुनाव जित्छन्, अनि आफूचाहिँ आफ्नो परिवार अनि नातेदारलाई मात्र हेर्छन् ।

वास्तवमा राजनीति भनेको नीतिहरूको पनि मूल नीति हो । राजनीतिभन्दा माथि कुनै नीति छैन । भनिन्छ नि राजनीति जनता, समाज र राष्ट्रको सेवा हो । राजनीतिभित्र सामाजिक, आर्थिक, सांस्कृतिक आन्दोलनका छुट्टाछुट्टै नेता हुन सक्छन् । तर, सबैको मूल भनेको राजनीतिक नेतृत्व नै हो ।

'नेताले लिएको लक्ष्यले ऊ कति ठूलो नेता हो भन्ने कुराको निर्धारण गर्छ, उसको पछाडि लागेको भिडले होइन ।'

हामी सबै आमजनतालाई देशको विकास अनि कानुनी राज्य चाहिएको छ । नेपाललाई जापान, स्वीट्जरल्यान्ड, अमेरिका बनाउनुपरेको छ, अनि फेरि देश चलाउने जिम्मा देशका लागि काम गर्ने नभई आफ्नो काम गरिदिने मान्छेलाई दिन मन छ । हामी चाहन्छौँ कि राम्रो मान्छेले भन्दा हाम्रो मान्छेले जितेमा उसले नियमविपरीत भएर पनि हाम्रो सम्पूर्ण काम गरिदिन्छ, तर यसमा नेताको दोष हुँदैन । भोट हाल्ने सम्पूर्णको दोष हुन्छ । आफूलाई व्यक्तिगत फाइदा दिने हैन, समस्त देशको हित गर्ने नेता चाहिएको छ भन्ने कुरा नेपाली मतदाताले बुझ्नुपर्ने बेला आएको छ ।

राजनीतिक आस्था राख्नेले त निर्वाचनमा भाग लिनु भनेको ठीकै हो । चासो नै नभएकालाई समेत निर्वाचनले नराम्रोसँग गाँसेको छ । आफ्नो पार्टी राम्रो हो भन्ने देखाउने पक्षमा सबै लागेका छन् । हिजोसम्म एउटै थालमा खाना खाने दाजुभाइ आज राजनीतिक अवस्थाका कारण दुस्मन बनेका छन् । निर्वाचनपछि यो गर्छु, त्यो गर्छु भन्दै जनताको चुलोचौकोमा उम्मेदवारहरू कुर्लिरहेका छन् । उनका समर्थक कार्यकर्ताहरू जिन्दावाद मुर्दावादको नारामा दौडिएका छन् भने कति त नोटसँग भोट साट्न तल्लीन छन् ।

अबको चुनावमा परिवर्तन मबाट सुरु गरेर हामीसम्म पुर्‍याऊँ । एक रुपैयाँ खर्च नगरी चुनाव लड्ने अवस्थाको सिर्जना गरिदिऊँ । अहिले नोटसँग भोट साटेर चुनावपछि विदेशी भूमिमा पुगेर रगत र पसिनासँग रेमिट्यान्स साट्नुभन्दा त अहिले देशमा स्वाभिमानका साथ बाँच्ने वातावरण सिर्जना गरौँ ।

राजनीतिका बारेमा मलाई खासै चासो अनि ज्ञान त छैन तर यत्ति बुझेको छु कि 'नेताको चाप्लुसीमा जनता बिक्नु भनेको देश बेच्नुसरह जस्तै रहेछु । यो निर्वाचन विगतको निर्वाचनभन्दा फरक भएकाले अब हामी सबै मतदाताहरूले विचार पुर्‍याउनुपर्ने हुन्छ । अब हामी सबै मतदाताहरूले आफ्नो मत दुरुपयोग हुन नदिन विवेकको प्रयोग गर्न सक्नुपर्छ । प्राय:जसो हाम्रो बानी के छ भने नेतृत्व चुन्ने बेलामा गल्ती गर्ने अनि पछि यसले यस्तो गर्‍यो, त्यसले त्यस्तो गर्‍यो भन्ने, धारे हात लगाएर सराप्ने गरिन्छ । यसबाट हुनेवाला केही छैन ।

पारिलो उर्वर ठाउँ खोज्ने र बिउबीजन पनि राम्रो रोप्ने हो भने फल पनि पक्कै राम्रो हुनेछ । तर, बिउ नै कुहिएको रोपियो र ठाउँ पनि गतिलो भएन, कुहिएको पर्‍यो भने न त त्यो बिउ उम्रन्छ, उम्रिहाले पनि न फल नै राम्रो लाग्छ । त्यस कारण योपटकको निर्वाचनमा नेतृत्व चुन्ने बेला सबैले ध्यान पुर्‍याउनुपर्छ । नत्र फेरि पाँच वर्ष दु:ख पाइएला नि !

गएको पाँच वर्षमा जनप्रतिनिधिलाई गाली गर्दै बसेका युवा पनि यतिबेला नेताको चाकडी गर्दै हिँडेका छन् । कसले कति खर्च गर्न सक्छ, त्यसकै पछाडि दौडेका छन् ।

प्रिय मित्रहरू, मेरो देशले ब्यहोरेको विगतको राजनीतिक विचार पोस्ट्याउँदा तपाईंहरू कतिलाई रिस उठेको पनि होला । अब तपाईं हामीले कदमकदम सोच्नुपर्ने अवस्था देखिएको छ । युवाहरू पेट्रोल, मासुभातको पछाडि लागे भनेर म आफूले सबै पार्टीको विरोध गर्न खोजेको पनि हैन । उम्मेदवारको पछाडि लाग्दै नलाग्नुहोस् भन्न खोजेको पनि हैन । तपाईं हामी सबै स्वतन्त्र मतदाता हौँ, स्वतन्त्र रूपले मतदान गर्न पाउने अधिकार तपाईं हामी सबैको छ । आफ्नो भोटलाई नोटमा परिवर्तन नगरिदिनुहोस् । यसले हामीलाई पाँच वर्ष श्राप दिनेछ ।

निर्वाचनको मिति आउन अब केही दिन मात्र बाँकी छ । हामी जनतालाई कस्तो उम्मेदवारलाई भोट दिने भन्ने कुरा अझै पनि थाहा छैन । किनभने हामीले कहिल्यै कानुनी राज्यको अनुभव गर्न पाएका छैनौँ । अब हामी युवाले यस्तो अवस्थाको अन्त्य गर्नुपर्छ । हतारमा गल्ती गरेर फुर्सदमा पछुताउनुभन्दा निर्णय गर्ने बेलामा बुद्धि पुर्‍याउनु ठीक होला ।

आजसम्म त हामीलाई नेताहरूले हात्तीको मुखमा जिराजस्तै बनाए । अब हामीलाई न त जेसुकै होस् भन्ने छुट छ, न त कसैकसैको लहैलहैमा दबाबमा लागेर आफ्नो अमूल्य मतको दुरुपयोग गर्ने छुट छ । अब मैले के पाउँछु भन्दा पनि कसले जनताको अधिकारको सुरक्षा गर्ने व्यवस्था बनाउन सहयोग गर्छ भन्ने विषयमा मतदाता सचेत हुनुपर्छ ।

अहिलेसम्म यो देशमा गतिलो नेता कोही भएनन् । पार्टीको विरोध गर्ने, नेताले नेतालाई नै गालीगलौज गर्ने, भ्रष्टाचार गर्ने मात्र भए । जनता मालिक हुने भनेको यही चुनावको बेला मात्र हो । मेरो एउटै आग्रह छ कसैले पनि भोट लाई नोट मा रुपान्तरण नगरिदिनुहोस । नेता पनि पैसा छाप्ने मेसिन त हैनन् नि !

अबको चुनावमा परिवर्तन मबाट सुरु गरेर हामीसम्म पुर्‍याऊँ । एक रुपैयाँ खर्च नगरी चुनाव लड्ने अवस्थाको सिर्जना गरिदिऊँ । अहिले नोटसँग भोट साटेर चुनावपछि विदेशी भूमिमा पुगेर रगत र पसिनासँग रेमिट्यान्स साट्नुभन्दा त अहिले देशमा स्वाभिमानका साथ बाँच्ने वातावरण सिर्जना गरौँ ।

त्यसैले विगतका नेताहरू कसले कहाँ के गरे, त्यसको लेखाजोझा गरी राम्रो काम गर्नेलाई काखमा लिऔँ र नराम्रो काम गर्नेलाई पाखा लगाइदिऊँ । नयाँ जोस, जाँगर र सोच भएका उम्मेदवारलाई ल्याउन सक्ने प्रयास तपाईं हामीबाटै सुरु गरौँ ।

प्रकाशित मिति: शनिबार, कात्तिक २६, २०७९ ०८:३३