भाेट माग्न आउनेहरूलाई मीना भन्ने गर्छिन्- मलाई शहीदकी आमा नभन्दिनुहाेला

A+ A A-

झापाको सदरमुकाम नजिकै २०६२–०६३ काे जनआन्दोलनमा सहादत प्राप्त गरेका शहीद सुरज विश्वासको नाममा शहीदगेट छ । झापाको भद्रपुर नगरपालिका नजिकैको त्यो बस्तीलाई अहिले शहीद सुरज बस्ती भनेर पनि चिनिन्छ ।

निर्वाचनको समयमा यो बस्तीमा धेरै नेता कार्यकर्ता भोट माग्न आउने गरेको शहीद विश्वासकी ६१ वर्षीया आमा मीना विश्वास बताउँछिन् ।

निर्वाचन सकिएपछि भने बस्तीमा कुनै नेताकाे नाकमुख नदेखिने गरेकाे उनकाे गुनासाे छ । शहीद परिवार भनेर परिचित मात्र भएको उनकाे भनाइ छ । 'जुनसुकै पार्टीको कार्यक्रममा गए पनि मेरै छोराको फोटो टाँसेर नेताहरूले भाषण गर्छन् । तर, हाम्राे परिवारको आर्थिक अवस्थाका बारेमा कसैले कुरा गर्दैनन्',उनले भनिन् ।

दोस्रो जनआन्दोलनका शहीद परिवारलाई परिचयपत्र र जीवन निर्वाह भत्ता दिने कानुनी व्यवस्था छ । तर, आफूले जीवन निर्वाह भत्ता नपाएकाे भद्रपुर नगरपालिका–६ निवासी मीनाले बताइन् ।

‘१६ वर्षदेखि २ हजारभन्दा धेरै ठाँउमा सम्मान पाइयो । तर, मेरो परिवारको आर्थिक अवस्था कोही नेताले बुझ्दैनन् । त्यही भएर अहिले शहीदकी आमा भने पनि दुःख लाग्छ’, उनले भनिन, ‘शहीद परिवारका लागि सरकारमा पुगेका व्यक्तिले पटक–पटक सहयोगको आश्वासन दिए । आश्वासन भाषणमा मात्र हैन व्यवहारमा गरेमात्र शहीदहरूप्रति सच्चा सम्मान हुने छ । हामी यही त माग्दै आएका छौँ ।’

सरकारले दुई नाती र आफूलाई उपचार खर्च दिए पनि परिवारको आर्थिक भार कम हुने बताउँदै उनले भनिन्, 'मलाई शहीदकी आमा नभनिदिएकै राम्राे लाग्छ ।'

शहीदका परिवारले रोजगार, बालबालिकाको लागि शिक्षा र भत्ताको व्यवस्था गर्न माग गरेका छन् । कांग्रेसका नेता कृष्णप्रसाद सिटौला र एमालेका अध्यक्ष केपी ओलीलाई पनि पटक–पटक आफ्नो समस्या सुनाएकाे मीनाकाे भनाइ छ । 'नेता सिटौलालाई मैले दुई जना नाती पढाइदिन आग्रह गरेँ । उहाँले हुन्छ मात्रै भन्नुभयाे', उनले भनिन् ।

राप्रपाका अध्यक्ष राजेन्द्र लिङ्देनलाई पनि भाेट माग्न आएका बेला आफ्ना समस्या सुनाएकाे उनले बताइन् । 'आन्दोलनमा मेरो छोरो त शहीद भयाे । तर राज्य मेराे सहारा बन्न सकेन', उनले भनिन्, 'उपचार गर्ने पैसा पनि छैन ।'

मीनलाई राज्यले मासिक १० हजार रुपैयाँ दिँदै आएको थियो । तर घर बनाउन राज्यले ६ लाख रुपैयाँ दिए यता मासकि रूपमा पाउँदै गरेकाे रकम पाउन नसकेकाे उनकाे भनाइ छ ।

मीनाका चार छाेरामध्ये विश्वास शहीद भए । जेठो छोरो पनि रोगले बिते । दुई वर्षअघि श्रीमानको पनि मृत्यु भयाे । अहिले उनी माइलो छोराकाे साथमा बसिरहेकी छन् ।

गणतन्त्रका लागि लडेकाे शहीद परिवारलाई राज्यले उपेक्षा गरेको मीनाका माइला दाई सुरजकाे गुनासाे छ ।

हुन त सञ्जयलाई सरकारले शहीद परिवारको भनेर घरेलु साना विकासमा रोजगारी दिएको छ । तर, उक्त रोजगारीमा स्थायी नगरिदिएकाे उनले बताए । ‘सरकारले रोजगारीभन्दा अन्य सीपमुलक तालिम दिएकाे भए केही पेसा–व्यवसाय गरेर परिवार पाल्ने थिएँ । रोजगारीबाट आएको पैसाले त परिवार पाल्नै समस्या छ’, उनले भने, ‘सरकारले दिएको रोजगारीले आमालाई औषधि खुवाउन र दुई छोरा पठाउन पुग्दैन ।'

गणन्तत्र स्थापनाका लागि २०६२–०६३ मा भएको जनआन्दोलनका क्रममा झापाको सदरमुकाम भद्रपुरमा वैशाख ६ गते दुई जनाले सहादत प्राप्त गरेका थिए । सेनाले चलाएको गोली लागेर सुरज विश्वास र राजन गिरीले सहादत प्राप्त गरेका थिए ।