घरदैलाेमा भेटिएका कृष्ण सिटाैला भन्छन्- ओलीले राजावादीलाई बुई चढाएर लोकतन्त्रमाथि प्रश्न उठाए

घरदैलाेमा भेटिएका कृष्ण सिटाैला भन्छन्- ओलीले राजावादीलाई बुई चढाएर लोकतन्त्रमाथि प्रश्न उठाए

A+ A A-

मतदानका लागि १३ दिन बाँकी हुँदा उम्मेदवारहरू घरदैलो तथा प्रचार अभियानले बेफुसर्दिला छन् । मतदानको सम्मुखमा रहेका उम्मेदवार जित निकाल्ने दबाबमा छन् । चुनाव प्रचारलेमात्रै जित निकाल्न कठिन हुन्छ भन्ने बुझेका नेताहरू घरदैलौ अभियानको अलवा रणनीतिमा सक्रिय छन् । यी दुवै कर्ममा सक्रिय रहेका छन् झापा–३ का कांग्रेस उम्मेदवार कृष्ण सिटौला । कांग्रेस, माओवादी र एकीकृत समाजवादीको साझा उम्मेदवार रहेका सिटौला अघिल्लो चुनावको तितो अनुभवलाई फेर्ने चाहिरहेका छन् । खासमा अघिल्लो चुनावमा सिटौला समानुपातिकमा बस्ने तयारीमा थिए । अन्तिम समयमा उनको मन फेरियो र प्रत्यक्ष चुनावमा होमिए ।

त्यतिबेला कांग्रेस र राप्रपाबीच गठबन्धन भएको थियो । उक्त गठबन्धनमा सिटौला समानुपातिकमा बस्ने र राप्रपाका राजेन्द्र लिङ्देनलाई समर्थन गर्ने सहमति भएको थियो । तर, सिटौलाको मन फेरिएपछि झापा–३ को समीकरण फेरियो । देशभर कांग्रेस र राप्रपावीबीच तालमेल हुँदा झापा– ३ मात्रै तालमेलभन्दा बाहिर पुग्यो ।

राप्रपाले प्रत्यक्षतर्फ जित निकाल्न सकिने सम्भावित क्षेत्र नै भड्किएपछि रणनीति फेरियो । र, तत्कालीन अध्यक्ष कमल थापाले एमाले अध्यक्ष केपी ओलीसँग लामो संवाद गरे बालकोटमा । सहमति जुटाए, वामगठबन्धनको समर्थन लिङ्देनलाई हुने । त्यही सहमति अनुसार लिङ्देन वामगठबन्धनको उम्मेदवार भए अनि झापा– ५ मा राप्रपाले ओलीलाई समर्थन गर्‍यो । जसले गर्दा कांग्रेसका उम्मेदवार सिटौला पराजित भए । त्यतिबेला भागेको पराजयको बदला लिन बुढौली ज्यान हल्दिवारीदेखि केचनाकवलसम्म कुदाइरहेका छन् ।

सिटौलालाई पहिलाभन्दा सहज माओवादी र एकीकृत समाजवादीको साथले भएको छ । एमालेको निरन्तर साथ पाएका लिङ्देन पनि कमजोर उम्मेदवार होइनन्, जसले गर्दा अघिल्लोपटकभन्दा रोचक प्रतिस्पर्धा हुने देखिएको छ । स्थानीयहरूको भनाइमा पनि अहिले नै प्रष्ट भन्न सकिने स्थिति छैन ।

रिपोर्टिङका क्रममा भेटिएका अधिकांश स्थानीयहरू सिटौला र लिङ्देनमध्ये कसलाई रोज्ने भन्नेमा पनि अलमलमा देखिन्छन् । सिटौला र लिङ्देन घरदैलो अभिायनमा सक्रिय रहेका कारणले चुनावी माहौल अझै चरम हुनेछ । त्यतिबेला कस्तो खाले परिणाम निस्कन्छ र कसको पक्षमा माहौल सिर्जना हुन्छ भन्न सकिने स्थिति भने छैन । यो क्षेत्र झापाको दुर्गम क्षेत्रहरूका समेटिएको क्षेत्र पनि हो । यो क्षेत्रमा हल्दीबारी, कचनकलव, बाह्रदशी गाउँपालिका रहेका छन् ।

३० वैशाख २०७९ को स्थानीय चुनावको मतलाई आधार मान्ने हो भने सत्ता गठबन्धन कमजोर देखिन्छ । कांग्रेस र माओवादीको ३२ हजार ६ सय ३७ मत हुँदा एमाले–राप्रपाको गठबन्धनसँग ४२ हजार ७ सय ७३ मत छ । यसअनुसार सिटौलाभन्दा लिङ्देन अगाडि देखिन्छन् ।

झापा– ३ मा कांग्रेसका वडाध्यक्षका उम्मेदवारले पाएको मत २५ हजार ९ सय ४९, राप्रपाका वडाध्यक्षले २१ हजार १ सय ५१, एमालेका वडाध्यक्षले २१ हजार ८५, माओवादीका वडाध्यक्षका उम्मेदवारले ६ हजार ६ सय ८८ तथा जसपाका उम्मेदवारले ५ सय ३७ मत र लोसपाका उम्मेदवारले पाएको मत २ सय ७ छ ।

स्थानीय चुनावकाे मतलाई आधार मान्ने हो भने लिङ्देनभन्दा सिटौलाले बढी मिहिनेत गर्नुपर्ने देखिन्छ । झण्डै १० हजार मतान्तर रहेका कारण लिङ्देन भने उत्साहित देखिन्छन् । तर, परिस्थिति लिङ्देनले सोचेजस्तो पनि छैन । एमालेको साथ पाएर पनि एमालेभित्रकै असन्तुष्ट पक्ष लिङ्देनको पक्षमा छैन । एमालेका युवा नेता डम्बर गिरीकाे स्वतन्त्र उम्मेदवारीले झापा–३ को चुनावी प्रतिस्पर्धा रोचक बनेकाे छ ।

झापा– ३ मा कचनकवल गाउँपालिका, बाह्रदसी गाउँपालिका, हल्दीबारी गाउँपालिका, भद्रपुर नगरपालिकाका १, २, ३, ४, ५, ६, ७ तथा ८ नम्बर वडाहरू र बिर्तामोड नगरपालिकाकाे वडा नम्बर १० पर्छ ।

हल्दीबारी गाउँपालिका, भद्रपुर नगरपालिका र बाह्रदसी गाउँपालिका राप्रपाको राम्रो मत रहेको छ । भद्रपुर नगरपालिका, कचनकवल गाउँपालिकामा कांग्रेसको पनि मत राम्रो छ ।

चुनावी नतिजा आफ्नो पोल्टामा पार्न कस्सिएर घरदैलो अभियानमा लागेका उम्मेदवार सिटौलासँग शिलापत्रकर्मीको चन्द्रगढीमा भेट भएको थियो । बिहानको घरदैलो अभियान सकेर फर्किएपछि सिटौलासँग छोटो संवाद भएको थियो । त्यसक्रममा सिटौलाले मंसिरको निर्वाचनमा जनता आफुलाई जिताउन आतुर रहेको दाबी गरे । झापा–३ मा कांग्रेसको विकल्प नरहेको उनले कुराकानीमा बताए । शिलापत्रकर्मी रमेश भारतीले नेता सिटौलासँग गरेको कुराकानीको सम्पादित अंशः

चुनावी अभियानमा लागिरहेका बेला अहिले चन्द्रगढीमा भेटघाट भयाे । बढ्दाे चिसाे माैसमसँगै झापा–३ को चुनावी सरगर्मी पनि बढ्दाे छ । तपाईं के विश्लेषण गर्दै हुनुहुन्छ ?

झापा–३ मा लोकतान्त्रिक सत्तारुढ गठबन्धन र राजावादीबीच प्रतिस्पर्धा हुँदैछ । एमालेले बोकेर संसदमा छिराएका राप्रपाका अध्यक्ष राजेन्द्र लिङ्देन सकिएको राजाको एजेन्डा लिएर मैदान उत्रिनुभएको छ । उहाँले देशमा सकिएको राजतन्त्रको एजेन्डा बोक्नु भएको छ । त्यसमा एमालेले साथ दिएको छ ।

राप्रपालाई एमालेले सहयोग गरेको एमालेभित्र नै कतिपयले मन पराएका छैनन् । जसका कारण वाम लोकतान्त्रिक गठबन्धनको उम्मेदवारलाई यहाँका जनताले मतदान गदैछन् । योपटक झापा–३ बाट कांग्रेस आउँछ ।

कांग्रेस, माओवादी र एकीकृत समाजवादी गठबन्धन छ । मेराे जित सहज छ । यो परिवर्तन ल्याउने जिल्ला हो । त्यही भएर झापा–३ बाट योपटक राजाको एजेन्डा सकिन्छ ।

राप्रपा अध्यक्ष राजेन्द्र लिङ्देनसँगको दाेस्राे प्रतिस्पर्धालाई कसरी हेर्नु भएको छ ?

झापामा प्रतिनिधिसभा तथा प्रदेशसभा निर्वाचनमा नेकपा एमाले र राप्रपाबीच चुनावी तालमेल भएको छ । एमाले अध्यक्ष केपी ओलीले इतिहास बनेका राजाको आधा टोपी लगाएको पार्टीसँग गठबन्धन गर्नुभयो । यो जनताले रुचाएका छैनन् । जसका कारण झापा–३ राप्रपा र एमालेलाई जनताले प्रश्न गर्दैछन्। तपाईंहरूको यस्तो गठबन्धन कहिलेसम्म भनेर ? मैले २०७४ सालको निर्वाचनभन्दा जित्न सहज देखेको छु । जनताले तपाईं यो निर्वाचनमा हाम्रो प्रतिनिधित्व गर्नुपर्‍यो भनिसकेका छन् । त्यही भएर योपटक निर्वाचनमा राप्रपासँग प्रतिस्पर्धा सामान्य ठानेको छु ।

झापा–३ का जनताको मत पाउने आधार के–के छन् । आगामी रणनीति र मतदाताका लागि के काम गर्ने योजना बनाउनुभएको छ ?

२०७४ सालको निर्वाचनयता झापा–३ मा विकास ठप्प छ । राजेन्द्रजी आफ्नो पार्टी मात्र बनाउनतिर लाग्नुभयो । जसका कारण ५ वर्ष यहाँका जनता विकासबाट बञ्चित भए । यो निर्वाचन क्षेत्रको दुर्भाग्य हो । राजेन्द्रजीले लोकतन्त्रवादीले ल्याएको विकास भन्दै पुराना योजना प्रथामिकतामा राख्नुभएन । नभए चन्द्रगढी आसपासमा गएर हेर्न सक्नुहुन्छ । त्यहाँको अवस्था कस्तो छ ।

झापाको रोजगारी, शिक्षा, विकास, कृषिमा आधुनिकीकरण, प्रविधिको विकास र सीमा समस्या समाधान गर्नुपर्छ । दोस्रो संविधानसभाको निर्वाचनपछि झापा क्षेत्र नम्बर ३ अन्तर्गतका विभिन्न सडकलगायतका भौतिक पूर्वाधारसँगै पथरिया मावि भवन, हिमाली मावि भवन, विभिन्न सामुदायिक भवनदेखि तत्कालीन गाविसका सबै भवनहरू निर्माण, पुनःनिर्माणका योजना सम्पन्न गराएको थिएँ । अब यस्ता धेरे योजना छन् कार्यन्वयन हुने क्रममा छन् ।

झापा क्षेत्र नं ३ को उन्नतिका लागि पूर्व–पश्चिम हुलाकी सडक, उत्तर–दक्षिण मेची राजमार्ग निर्माण पनि मेरै पहलमा सम्पन्न भएको छ । तर पनि यस क्षेत्रको विकासका लागि ग्रामीण सडक, खानेपानी, कृषि सडक सञ्जालका लागि बनियानी–पाठामारी, केचना रिङरोड, पथरिया घेराबारी, जलथल सडकजस्ता आधा दर्जनभन्दा बढी सडक सञ्जाल मेरै कार्यकालमा सुरु गरेर निर्माण सम्पन्न गर्न सरकारको ध्याकर्षण गराउँदै आएको छु ।

पहिला पनि याे क्षेत्रबाट निर्वाचित भएकै हाे । जनताले तपाईंलाई जिताउनुपर्ने कारण के हाे ?

तत्कालीन विद्रोही माओवादीसँग १२ बुँदे सहमति, शान्ति प्रक्रिया, संविधान निर्माण जस्ता महत्त्वपूर्ण काम गरेर देशलाई आवश्यक पर्दा भूमिका छ । मैले मुलुकमा राजनीतिक स्थिरता र संविधान निर्माणमा महत्त्वपूर्ण काम गरेको छु । नीति निर्माण तहमा बसेर काम धेरै काम गरेको छु । यो त जनतालाई थाहा छ ।

गणतन्त्रले के दिन्छ ? के दियो ? भन्ने खालको सोच नागरिकमा उत्पन्न हुनुमा वर्तमान संविधानको कार्यान्वयनका लागि सही र वास्तविक पहल हुन नसक्नु हो । यो संसदमा पुगेपछि अब गर्छु । आसन्न चुनावमा संविधानको रक्षा, देशको विकास, जनताको आर्थिक प्रगति र समृद्धि मुख्य मुद्दा हुनेछन् ।

मंसिरपछि कसकाे सरकार बन्छ ?

यो त प्रस्ट छ लोकतान्त्रिक गठबन्धनकै सरकार बन्छ । पहिला मत परिमाण आओस्, त्यसपछि सरकार निर्माणका विषयमा छलफल हुन्छ । सरकार कसको बनाउनेभन्दा पनि मंसिरको निर्वाचनमा कसरी सत्तारुढ गठबन्धनले स्पष्ट बहुमत ल्याउने भन्नेतिर जोड छ ।

प्रकाशित मिति: सोमबार, कात्तिक २१, २०७९ १५:१७