विश्वप्रकाश र अग्नि खरेललाई संसद् छिराउन निर्णायक बनेकाे वडा नम्बर ६

A+ A A-

कांग्रेस महामन्त्री विश्वप्रकाश शर्मा झापा १ बाट तेस्रोपटक चुनावी मैदानमा छन् । २०७४ काे निर्वाचनमा उनलाई तत्कालीन वाम गठबन्धनका उम्मेदवार माओवादीका राम कार्कीले रोकेका थिए । यसअघि २०७० को दोस्रो संविधानसभा निर्वाचनमा एमालेका रविन कोइरालासँग पराजित शर्माले यसपटक माओवादीकाे सहयाेगमा संसदमा प्रवेश पाऊलान् ?

संसद् छिर्ने तेस्राे दौडमा रहेका शर्माले यसपटक एमाले स्थायी कमिटी सदस्य अग्नि खरेलकाे सामना गर्दैछन् । झापा–१ मा एमालेकाे पकड त्यसै पनि बलियो छ । त्यसमाथि राप्रपासँगकाे तालमेलले एमाले उम्मेदवार खरेलका लागि अनुकूलता बढ्दै गएकाे देखिन्छ । तर, एमालेभित्रकाे चर्काे गुटबन्दी र असन्तुष्टिले नतिजाबारे अहिल्यै आकलन गर्न भने मुस्किल छ । कांग्रेस महामन्त्री शर्माकाे लाेकप्रियता र निरन्तरकाे हारका कारण पाउने सहानुभूति मत पनि हुने बताइएकाे छ ।

यसरी निर्णायक बन्दैछ वडा नम्बर ६

झापा– १ मा मेचीनगर नगरपालिका, भद्रपुर नगरपालिकाको ९ र १० नम्बर वडा र बुद्धशान्ति गाउँपालिकाका ४, ५, ६, ७ वडा पर्छन् । ती वडामध्ये मेचीनगर–६ मा सबैभन्दा धेरै मतदाता छन् । यहाँ ११ हजार ७ सय ५४ मतदाता छन् । यो वडामा भारतसँगको मुख्य नाका काँकडभिट्टा पर्छ । याे भारत र बंगलादेशसँगकाे प्रवेशद्वारका रूपमा परिचित छ । यहाँका मतदाताले विशुद्ध राजनीतिक आधारमा भन्दा विकासकाे एजेन्डा बाेक्ने उम्मेदवार छान्ने गरेकाे विगतकाे अनुभवले देखाउँछ ।

मेचीनगर–६ मा कांग्रेस र एमाले मुख्य प्रतिस्पर्धी पार्टी हुन् । गएकाे स्थानीय चुनावमा यो वडामा कांग्रेस बलियाे देखिएकाे थियाे । तर, वडाको उम्मेदवारको व्यक्तिगत छविले स्थानीय निर्वाचनमा फरक पार्ने मेची नगरपालिकाका मेयर गोपाल बुढाथोकीकाे तर्क छ ।

'झापा–१ मा एमालेले जितेकाे हेर्न अब धेरै दिन बाँकी छैन । यसपटक एमालेले राम्रो उम्मेदवार पाएका कारण पनि यहाँ जित्न सजिलो छ’, बुढाथाेकी भन्छन् । तर, गएकाे चुनावमा प्राप्त मतका आधारमा काँकडभिट्टा क्षेत्रमा कांग्रेस बलियो देखिन्छ । गत स्थानीय निर्वाचनमा मेचीनगरपालिका– ६ मा कांग्रेसबाट वडाध्यक्षका उम्मेदवार ललित तामाङले ३ हजार ९ सय ६९ मत ल्याएर विजयी भएका थिए भने एमालेका बालकृष्ण थापाले ३ हजार २ सय ८७ मत पाएका थिए ।

तामाङले २०७४ सालको स्थानीय तहको निर्वाचन पनि जितेका थिए । 'कांग्रेसमा विवाद छैन । गठबन्धनकाे भाेट एकैठाउँ झर्छ । त्यसले हाम्रा महामन्त्रीले यसपटक जित्नुहुन्छ', तामाङले भने । गत वैशाखमा भएको स्थानीय तह निर्वाचनमा क्षेत्र नम्बर १ मा पर्ने वडाहरूमा कांग्रेस, माओवादी र समाजवादीका उम्मेदवारले २८ हजार चार सय ६ मत ल्याएका थिए ।

स्थानीय तह निर्वाचनमा बिनागठबन्धन एक्लै चुनावमा सहभागी भएको एमालेको वडाध्यक्षका उम्मेदवारको मत ३१ हजार २ सय ३२ थियाे । त्यसमा राप्रपाका वडाध्यक्ष उम्मेदवारले पाएकाे मत ५ हजार ८ सय ३० जाेड्दा एमाले उम्मेदवारकाे पक्षमा ३७ हजार ६२ मत देखिन्छ । जुन सत्ता गठबन्धनका उम्मेदवार शर्माकाे पक्षभन्दा झण्डै ८ हजार धेरै हाे ।

यही चुनावी गणितलाई आधार मानेर एमालेले झापा १ मा प्रतिनिधिसभा तथा प्रदेशसभा सदस्यकाे चुनाव जित्ने दाबी गरिरहेकाे छ । कांग्रेस महामन्त्री शर्मालाइ यही अंकगणितले चुनाैती दिइरहेकाे छ । तर, मतदाताकाे बदलिँदाे मनस्थितिले अहिल्यै हारजितकाे आकलन सहज भने देखिँदैन ।

पाँच वर्षअघिकाे चुनावमा शर्माले ३३ हजार तीन सय १० मत प्राप्त गर्दा वाम गठबन्धनका उम्मेदवार कार्कीले ३६ हजार एक सय ७३ मत पाएका थिए । २०७० र २०७४ मा एक्लै लडेका शर्मालाई यसपटक माओवादी र एकीकृत समाजवादीको साथ छ । तर, झापा–१ का ठूलाे संख्यामा माओवादी नेता कार्यकर्ता एमालेमा प्रवेश गरेका कारण अघिल्ला निर्वाचनमा जस्तै शर्मालाई यो पटक पनि दबाब बढेको छ ।

कांग्रेस महामन्त्री शर्मा घरदैलाेमा व्यस्त छन् । उनले यो पटक आफूलाई जिताएर पाँच वर्ष आफनो काम हेर्न आग्रह गर्दै आएका छन् । 'म हारेर पनि झापा १ का लागि काम गरिरहेकाे तपाईंहरूकै भाइछाेरा हुँ । यसपटक जिताएर पाँच वर्ष मेराे काम हेर्नुस्', शर्माले मतदातालाई भन्ने गरेका छन् ।

एमाले नेता खरेल शान्तिनगरको एक सभालाई सम्बोधन गर्दै गरेका भेटिए । उनीमाथि अर्कै क्षेत्रबाट आएर चुनाव लडेकाे आराेप छ । त्यसकाे खण्डन गर्दै खरेलले झापाको विकास र जनताका लागि आफू जहिलेसुकै यहीँ रहने बताए । 'आज गरेकाे प्रतिबद्धता पूरा नभए, आज बाेलेकाे भाेलि पूरा नभए वा कुनै गल्ती गरे माफी नदिनुहाेला । यसपटक परीक्षण गरेर हेर्नुस्', उनले भने ।

हिजो कसले के गर्‍यो भन्दा पनि अब हामीले के गर्ने भन्ने योजना लिएर मत माग्न घर–दैलोमा पुगेको उनले बताए । ‘म यहाँको विकासका लागि जेजस्तो मूल्य चुकाउन पनि तयार छु । म गफ गर्न, योजना सुनाउन र आश्वासन बाँड्न आएको होइन । केही नयाँ दिनसक्छु भनेर आएको हुँ’, उनले भने ।

प्रकाशित मिति: आइतबार, कात्तिक २०, २०७९ १३:५३