कांग्रेसका आचार्यलाई दोस्रोपटक सांसद बन्न एमालेका संस्थापक तामाङको चुनौती

कांग्रेसका आचार्यलाई दोस्रोपटक सांसद बन्न एमालेका संस्थापक तामाङको चुनौती

A+ A A-

थोरै मतदाता रहेको रसुवा जिल्लामा चुनावी नजिर छ– पैसा हुनेले जित्ने । यस जिल्लामा मतदातालाई आर्थिक प्रभावमा पार्न सकिने र चुनावी नतिजा तलमाथि पार्न सकिने यहाँका नेताहरू नै बताउँछन् ।

प्रमुख दलले राजनीतिक व्यक्तिभन्दा पनि अन्य क्षेत्रबाट आर्थिक रूपमा सबल उम्मेदवार छान्ने गर्छन् । दोस्रो संविधानसभा चुनावमा होस् वा २०७४ सालको चुनावमा, एमालेले निर्माण व्यवसायी जनार्दन ढकाललाई उम्मेदवार बनायो । २०७४ सालमा चुनाव हारेका ढकाल २०७९ मा उम्मेदवार बन्न चाहेनन् । स्रोतका अनुसार अघिल्लो निर्वाचनको ऋण तिर्न नसकिएको भन्दै उनी पन्छिएका हुन् ।

कांग्रेसबाट निर्माण व्यवसायी इन्जिनियर मोहन आचार्य २०७४ सालको चुनावमा निर्वाचित भए । २०७९ को चुनावमा पनि उनै मैदानमा छन् । २०७४ सालमा उनले वाम गठबन्धनका उम्मेदवार ढकाललाई हराएका थिए । आचार्यले १४ हजार ४ सय ५३ मत ल्याउँदा ढकालले १० हजार २ सय ७८ मत मात्र ल्याएका थिए ।

पाँचवटा गाउँपालिका रहेको रसुवामा ३९ हजार ४५९ मतदाता छन् । यसपटकको चुनावमा एमालेले छोवाङ तेन्जिङ तामाङलाई उम्मेदवार बनाएको छ । दोस्रो संविधानसभाका सदस्य बनेका तामाङ रसुवामा एमालेका स्थापनाकालीन नेताका रूपमा चिनिन्छन् ।

रसुवागढी अन्तर्राष्ट्रिय नाका, समृद्ध रसुवा र अन्य पूर्वाधार निर्माण, जलविद्युत्, पर्यटनलगायतका विषयलाई दुवै दलले एजेन्डा बनाएका छन् । राष्ट्रिय गौरवको गल्छी–त्रिशूली–वेत्रावती–मैलुङ–स्याफ्रुबेशी–रसुवागढी सडकखण्ड आयोजना समयमा सक्ने योजना एमालेको छ ।

सो राजमार्ग आफ्नो पालामा सुरु भएको र पछिल्लो समय लापर्वाही भएको आरोप एमालेको छ । पासाङल्हामु राजमार्गको स्तरोन्नति गर्ने पनि एमालेको भनाइ छ । अर्को दल कांग्रेसको जिल्लाको विकासका लागि कांग्रेसबाहेक अरुको विकल्प नरहेको दाबी छ ।

‘रसुवा पैसा हुनेले मात्र जित्ने ठाउँ हो । यस जिल्लामा धनीमानीकै प्रभाव छ भन्ने बुझाइ छ । जनतासँग नजिक हुन नपर्ने, काम गर्नु नपर्ने हुन्छ । सामग्रीको मोलमोलाइजस्तो मतदाताको मोलमोलाइ गर्छन् नेताहरूले भनिन्छ । यसलाई चिर्न एमालेका उम्मेदवार सक्षम छन्,’ एमाले केन्द्रीय सदस्य माधव अर्यालले शिलापत्रसँग भने ।

एमालेले समावेशी उम्मेदवार बनाएको उनले बताए । सन् २०३० सम्ममा 'एक घर एक धारा' कार्यक्रम पूरा गर्ने योजना एमालेको रहेको उनले बताए । प्राकृतिक रूपमा जोखिममा रहेका बस्तीलाई व्यवस्थापन गर्ने र प्राविधिक शिक्षालय स्थापना, कृषिमा रूपान्तरण योजना एमालेको प्राथमिकतामा रहेको उनले बताए ।

‘रसुवागढी नाकालाई भजाएर राजनीति गर्ने प्रवृत्ति देखियो । हामी नाका व्यवस्थित गर्न कूटनीतिक तरिका र स्थानीय क्षेत्रबाट समस्या समाधान गर्न पहल गर्नेछौँ,’ अर्यालले भने, 'जलविद्युत् आयोजनालाई स्थानीय जनतालाई लाभ पुग्ने काम गर्ने एमालेको नीति छ । उत्तरगयाधाम र गोसाइँकुण्डलाई व्यवस्थित पर्यटनका रूपमा विकास गर्ने, ग्रामीण भेगमा स्वास्थ्य र गुणस्तरीय शिक्षाको पहुँच र समृद्ध रसुवा हाम्रो प्राथमिकता हो ।’

कांग्रेसले पनि विकासकै मुद्दा अगाडि सारेकाे छ । प्रदेश क का कांग्रेसका उम्मेदवार पर्वत लामाले शिलापत्रसँग भने, ‘भौतिक पूर्वाधारमा हाम्रो ध्यान छ । पालिका केन्द्रसम्म पक्की सडक, पर्यटन पूर्वाधार बनाउने योजना छ ।’ लाङटाङ हिमालमा वाल क्लाइम्बिङ ट्रेनिङ सेन्टर स्थापना गरेर विश्वमै नमुना ट्रेनिङ सेन्टर बनाउने उनले बताए । ‘रसुवागढी नाकालाई सदावहार रूपमा चलाउन गर्नुपर्ने सबै कामहरू गर्छौं,’ उनले भने ।

गठबन्धनको विकल्प छैन : आचार्य

आचार्य २०४६ सालको जनआन्दोलनमा कांग्रेसको भ्रातृ संस्था नेपाल विद्यार्थी संघमार्फत राजनीतिमा सक्रिय भएका थिए । उनले २०७४ निर्वाचनमा आफ्नो पार्टीबाट सहकार्य गरेर निर्वाचन लडेको नयाँ शक्ति पार्टीलाई समेत कांग्रेसमा प्रवेश गराएर रसुवाको संगठन विस्तार गरेका थिए ।

उनी गठबन्धन सरकारले पनि संविधानको रक्षा गर्न नसके देशको निकास नहुने दाबी गर्छन् । जनमतका आधारमा गठबन्धनले जित्ने उनले बताए । ‘पवित्र उद्देश्यले बनेको गठबन्धन हो । गठबन्धनले संविधानको रक्षा गर्न सकेन, बृहत् शान्ति सम्झौताका अपूर्ण कामहरू गर्न सकेन भने म दाबीका साथ भन्न सक्छु, 'यो देशको निकास हुन्न भन्ने कुरा बुझ्न जरुरी छ ।’

उनले थपे, ‘चुनावी अभियानमा उम्मेदवार बन्ने साथीहरूले आफ्ना कुराहरू जनताबीच राख्छन् । राख्ने कुरा एउटा रह्यो । तर, समयानुसार वस्तुगत कुरालाई नियालेर हेर्दा, २०७४ मा बनेको वाम सरकारले राम्रो काम गर्न सकेन । यो गठबन्धनले पनि देशलाई सही दिशा दिन सकेन भने यो देशको अवस्था कस्तो बन्छ, कल्पना गर्न सक्नुहुन्न ? गठबन्धनका उम्मेदवारहरूको विजय सुनिश्चिततातिर गएको छ भन्ने मलाई लाग्छ ।’

केन्द्रदेखि प्रदेशबाट जनताले चाहेको विकासका लागि आवश्यक बजेट उपलब्ध गराउने पनि उनको भनाइ छ ।

रसुवामा पैसाको राजनीति अन्त्य : तामाङ

माहौल आफ्नो पक्षमा रहेको एमालेका उम्मेदवार छोवाङ तेन्जिङ तामाङको दाबी छ । जातीय भोटको फाइदा लिने रणनीतिमा एमाले देखिन्छ । ‘रसुवामा पैसाको राजनीति अन्त्य गर्ने पहिलो प्राथमिकता हो,’ एमालेका उम्मेदवार तामाङले शिलापत्रसँग भने, ‘झुप्रोमा जन्मिएको श्रमजीवीका सन्तानले पनि प्रतिनिधिसभामा प्रतिस्पर्धा गर्न सक्ने वातावरण र राजनीति गर्न सक्ने वातावरण बनाउन लाग्नेछौँ ।’

जिल्लाको प्राकृतिक स्रोतको सदुपयोग गर्ने नीति एमालेको रहेको उनले बताए । रसुवागढी नाका, शिक्षा, स्वास्थ्य रोजगार, जलविद्युत्‌लाई प्राथमिकतामा राखिएको उनले बताए ।

२०४७ सालमा जिल्लामा एमाले स्थापना गर्नेमध्येका एक थिए तामाङ । उनी एमालेको केन्द्रीय सल्लाहकार परिषद् समितिको सदस्यसमेत हुन् ।

स्थानीय चुनावको नतिजा

स्थानीय तहको चुनावमा एमालेले गोसाइँकुण्ड र उत्तरगया गाउँपालिकामा अध्यक्ष/उपाध्यक्ष, आमाछोदिङ्मो, नौकुण्ड, आमाछोदिङ्मो र कालिका गाउँपालिकामा उपाध्यक्ष, जितेको थियो । कांग्रेसले कालिका, नौकुण्ड, आमाछोदिङ्मोमा अध्यक्ष जितेको थियो ।

चारवटा गाउँपालिकामा आफू बलियो रहेको एमालेको दाबी छ । जिल्ला समन्वय समितिमा बराबरी हुँदा गोला तानेर अध्यक्ष एमालेले जितेको थियो ।

स्थानीय निर्वाचनको कुरा गर्दा पनि नेपाली कांग्रेसबाट वडाध्यक्षका उम्मेदवारहरूले ल्याएको मत धेरै छ । स्थानीय निर्वाचनमा रसुवामा २७ वटा वडामा कांग्रेसका वडाध्यक्षहरूले पाएको मत ११ हजार ८ सय ३९ छ । एमालेका वडाध्यक्षहरूले पाएको मत ११ हजार ४० मात्र छ ।

यता गठबन्धनमा आबद्ध दल नेकपा माओवादी केन्द्रले ४ हजार ३ सय ९२ मत पाएको छ । यसरी हेर्दा समग्र रूपमा हेर्दा सत्ता गठबन्धनको मत बढी देखिन्छ । तर, त्यसलाई उल्ट्याएर आफ्नै पल्ला भारी बनाउने नीतिमा एमाले छ ।

प्रकाशित मिति: बिहीबार, कात्तिक १७, २०७९ २०:१६