ओलीका चुनावी रणनीतिः धार्मिक–मौसमी भोट तान्नेदेखि गठबन्धन भत्काउनेसम्म, प्रत्यक्षमा ५० सिट जित्ने लक्ष्य

ओलीका चुनावी रणनीतिः धार्मिक–मौसमी भोट तान्नेदेखि गठबन्धन भत्काउनेसम्म, प्रत्यक्षमा ५० सिट जित्ने लक्ष्य

A+ A A-

एमालेले याे चुनावमा सत्ता गठबन्धन र विभाजनकाे चाेट ब्यहाेर्नुपर्नेछ । त्यसकारण एमाले निकै दबाबमा छ । एमाले चुनावी नतिजामा कमजाेर देखिए अध्यक्ष ओलीमाथि नैतिक प्रश्न पनि उठ्नेछ । त्यसैले ओलीले अहिलेकाे चुनावमा विभाजनबाट पुगेकाे मतकाे क्षति कम गर्ने प्रयासलाई जाेड दिएका छन् । अनि, सत्ता गठबन्धनकाे असन्ताेषलाई क्यास गर्ने रणनीति लिएका छन् । एमाले नेताहरूकाे भनाइमा एमालेले ४ म‌ंसिरकाे चुनावमा सत्ता गठबन्धनकाे तगाराे चिर्न पाँचवटा रणनीति लिने स‌ंकेत गरेकाे छ ।

चुनावमा थोरै कसरत गरेर जित्न सकिने निर्वाचन क्षेत्रमा पार्टी आफ्नो गोप्य रणनीति प्रयोग गर्ने र भोट तान्ने योजना अघि बढाउने एमालेका उपमहासचिव प्रदीप ज्ञवालीले बताए । 'चुनावका बेला पार्टी बलियो बनाउन र धेरै सिट जित्न सबै रणनीति प्रयोग गर्नुपर्नेछ । सबै पार्टीले निर्वाचनमा आफ्नो पार्टी पहिलो बनाउन सकेसम्म चुनावी रणनीति प्रयोग गर्ने गर्छन्,' ज्ञवालीले भने ।

एक: नेकपा एस र माओवादीको भोट तान्ने

सत्ता गठबन्धनबाट रुष्ट भएका एकीकृत समाजवादी र माओवादी केन्द्रको मत तान्ने रणनीति लिएकाे छ । केही जिल्ला र निर्वाचन क्षेत्रमा टिकट नपाएकाे भन्दै एकीकृत समाजवादी र माओवादी केन्द्रका नेता-कार्यकर्तालाई फकाउन थालेका छन् । जस्ताे, नुवाकाेटमा टिकट नपाएका कारण असन्तुष्ट समाजवादीका नेतासँग एमाले नेताहरूले स‌ंवाद गरिरहेका छन् । अनि, झापामा माओवादीको मत तान्ने रणनीति एमालेको छ । एमालेकाे आन्तरिक अध्ययनले पनि यस्ताे रणनीति अपनाउन सकिने निष्कर्ष निकालेकाे एमाले नेताकाे दाबी छ । शिलापत्रसँग कुराकानी गर्दै ती नेताले दिएकाे जानकारी अनुसार असन्तुष्ट समाजवादी र माओवादीकाे मत तान्न सक्दा एमालेले १४ वटा निर्वाचनमा क्षेत्रमा जित निकाल्न सकिने विश्लेषण गरेकाे छ । त्यसाे त एमाले अन्य कम्युनिस्ट पार्टीको मत तान्न पनि छलफल गरिरहेको स्रोतको भनाइ छ ।

दुई : जनजाति र धार्मिक मत आकर्षित गर्ने

एमालेले आदिवासी जनजाति र धार्मिक मत तान्ने रणनीति लिएको छ । जहाँ धार्मिक, आदिवासीजनजातिको मत बढी छ, त्यहाँ एमालेले अन्य पार्टीभन्दा फरक रणनीति लागू गर्ने योजनाका साथ आफ्ना नेतासमेत खटाएको छ । एक नेताले दिएकाे जानकारी अनुसार धार्मिक, आदिवासी जनजातिको मतबाटै ११ वटा निर्वाचन क्षेत्रमा जित्न सकिने एमालेको आन्तरिक आकलन छ ।

१६ कात्तिकमा काठमाडौं निर्वाचन क्षेत्र नम्बर १ मा चुनावी प्रचारप्रसार कार्यक्रममा निस्किँदा महादेव मन्दिरको दर्शनमा सहभागी हुनुलाई धार्मिक मत तान्ने रणनीतिसँग जाेडिएकाे छ । डेढ वर्षअघि ओली पशुपति दर्शनमा पुगेर त्यही स‌ंकेत गरेका थिए । १६ कात्तिकमा ओलीले संस्कृति सम्पदाको अवलोकन एवं दर्शनका लागि त्रिपुरेश्वर महादेव मन्दिर पुगेका थिए । एमाले अध्यक्ष ओलीले प्रधानमन्त्री हुँदादेखि नै धार्मिक आस्थामा जोड दिँदै आएका छन् ।

तीन: राष्ट्रवादको अभियान

ओलीले चुच्चे नक्सालाई चुनावी स्वार्थसँग जाेडेर मत तान्ने रणनीति लिएका छन् । १८ कात्तिकमा एमालेकाे पहिलाे चुनावी सभा दार्चुलाबाट सुरु गर्ने ओलीकाे मनसाय त्यही रणनीतिसँग जाेडिएकाे छ । ०७२ काे भारतीय नाकाबन्दीदेखि ओलीले भारतविराेधी राष्ट्रवादकाे छवि बनाएका छन् । त्यही छवि जाेगाउने र चुच्चे नक्सालाई मत तान्ने रणनीतिसँग जाेड्न चाहेका छन् ओलीले ।

त्यसका लागि सामाजिक सञ्जालकाे अलवा युवा परिचालन र स्वयम्‌सेवक टिम निर्माणमा रहन विगतका कमजाेरीबाट पाठ सिक्दै युवा, विद्यार्थी, ट्रेड युनियन, महिला, खेलाडी, भूपू सैनिक तथा प्रहरी संगठनका सदस्यहरूलाई यो मामिलामा अधिकतम परिचालन गर्ने एमाले नेताहरूले बताएका छन् ।

चार: मौसमी मत तान्ने

एमाले नेताकै भाषामा मौसमी मतदातासमेत आफ्नो पक्षमा तान्ने रणनीति अविलम्बन गरेको छ । एमालेकै अध्ययनका आधारमा ११ लाख मौसमी मतदाता रहेका छन् र यीमध्ये ७ लाख मौसमी मतदाता आकर्षण गर्न सक्दा काठमाडौंलगायत देशभरबाट ९ वटा निर्वाचन क्षेत्रमा जित्न सहज हुने बुझाइ छ । मौसमी मतदाताको घरघरमा जान कार्यकर्ता परिचालन गरेको र उनीहरूका समस्या बुझ्ने रणनीति समेत लिएको छ । सुकुम्बासी, मजदुर, युवा, महिला, पछाडिएको वर्ग र अन्य केही समुदायका मौसमी मतदाताको मत तान्दा करिब ९ वटा निर्वाचनमा क्षेत्रमा एमाले जित्ने अध्ययनमा भनिएको छ । २४ वटा निर्वाचन क्षेत्रमा मौसमी मतदाताका भरमा सबै पार्टी जित्दै आएको र यी निर्वाचनमा क्षेत्रमा एमाले पनि आफ्नो रणनीति अपनाउने एमाले नेताकाे दाबी छ ।

पाँच: सामाजिक सञ्जालमार्फत युवा तान्ने

एमाले अध्यक्ष ओलीले चुनावी अभियानको सम्मुखमा युवाहरूसँगको संवादलाई बढाएका छन् । सामाजिक सञ्जालदेखि प्रत्यक्ष फोन संवादसम्ममा ओली जोडिएका छन् । ओलीले पछिल्ला दिनमा ट्वीटर, फेसबुकमार्फत युवाहरूसँग अन्तरसंवाद गर्न थालेका छन् । केही दिनअघि 'कल केपी बा' भनेर केही युवाहरूलाई टेलिफोन गरेका थिए । यसबाट पनि युवाहरूलाई एमालेसँग जोड्न खोजेका छन् । केही महिनाअघि गोदावरीको राष्ट्रिय सभाहलमा युवाहरूसँग संवाद पनि गरेका थिए । ओलीले सामाजिक सञ्जालमा रहेको युवा पुस्तालाई विभिन्न माध्यमबाट एमालेमा जोडिने वा उनीहरूलाई आकर्षित गर्ने प्रयास गरिरहेका छन् ।

कहाँ-कहाँ जितेर ५० सिट पुर्‍याउँछ ?

एमालेले निर्वाचनमा जस्तोसुकै घेराबन्दी भए पनि प्रत्यक्षतर्फ ३२ वटा सिट जित्ने दाबी गरेको छ । एमालेले सत्तारुढ गठबन्धनभित्रकै उम्मेदवारीभित्र मतभेद भए त्यो मत पनि एमालेलाई आउने अड्कलबाजी गरेको छ । जसका कारण एमाले त्यस्तो निर्वाचन क्षेत्रबाट ११ वटा सिट जित्न सक्ने आकलन छ ।

साथै, एमालेले आफ्नो रणनीति प्रयोग गरी अन्य सातवटा निर्वाचन क्षेत्रमा पनि जित निकाल्न सकिने दाबी गरेको छ । 'अहिले हाम्रो आँकडा प्रत्यक्षतर्फ ५० सिट जित्ने हो । तर, यो सिट बढ्न पनि सक्छ,' एक नेताले शिलापत्रसँग भने ।

एमालेले प्रदेश-१, गण्डकी र लुम्बिनी प्रदेशबाटै २२ देखि २५ सिट, अन्य चार प्रदेशबाट योभन्दा धेरै संख्या सिटमा जित हासिल गर्न सकिने उनको दाबी छ ।

गत शुक्रबार तिहार मनाउन गृहजिल्ला झापा पुगेका अध्यक्ष ओलीले समानुपातिकतर्फ ५० सिट ल्याएर एकल बहुमत पुर्‍याउने दाबी गरेका थिए । उनले भनेका थिए, 'प्रत्यक्षमा कमसेकम एक सय सिट र समानुपातिकतर्फ ५० सिट एमालेले जित्छ ।'

तर, स्राेतको दाबीअनुसार, एमालेकाे आन्तरिक अध्ययनले समानुपातिक र प्रत्यक्षमा गरी ८५ वटा सिटसम्म जित्न सकिने देखाएको छ । एमालेका एक नेताकाे दाबीमा मदन भण्डारी फाउण्डेसनले पनि अनुसन्धान गरेकाे थियाे । स्राेतकाे दाबी अनुसार, एमालेले घोषणापत्र बनाउनुअघि देशव्यापी रूपमा गरेको अध्ययनका आधारमा ८५ सिट जित्ने आँकडा आएको थियो ।

गठबन्धन भत्काउने प्रयास

एमालेले प्रत्यक्ष र समानुपातिकमा ८५ सिटमाथि ल्याए सरकारको नेतृत्व गर्ने र सरकारको नेतृत्व गर्दा माओवादी र एसलाई कांग्रेससँगको गठबन्धनबाट अलग गराउने रणनीति पनि लिएको छ । गठबन्धन भत्काउने रणनीति भने माओवादी र एसले ल्याएको सिट संख्याका आधारमा मात्र बनाइने एमाले स्रोतले जनाएको छ ।

एमाले उपमहासचिव विष्णु रिमाल विभाजनकाे क्षति कम गरेर नै स्थानीय निर्वाचनमा सत्ता गठबन्धनको घेराबन्दी, आक्रमण र राज्यशक्तिको चरम दुरुपयोगका बाबजुद सर्वाधिक लोकप्रिय मत (३४ प्रतिशत) सहित पहिलो शक्तिका रूपमा स्थापित भएको बताउँछन् ।

विगतको निर्वाचन र स्थानीय चुनावको ट्रेन्ड हेर्दा २०६४ को चुनावमा इतिहासकै न्यून मत (करिब २० प्रतिशत) प्राप्त गरेको अपवादबाहेक निरन्तर बढ्दै गएको रिमालको दाबी छ ।

प्रकाशित मिति: बुधबार, कात्तिक १६, २०७९ २१:११