उम्मेदवार फेरि जनताका घर–घरमा, भएनन् बाचा पूरा

A+ A A-

आगामी मंसिर ४ गते हुने प्रतिनिधिसभा तथा प्रदेशसभा सदस्यका लागि विभिन्न दलका नेता तथा स्वतन्त्र उम्मेदवारहरू जनतामाझ गइरहेका छन् । घरदैलोका क्रममा उम्मेदवारहरूले जनताका माझ पुगेर उनीहरू समस्या सुनिरहेका छन् । तर, समस्या सुनिरहेको भए पनि आफूसँग गरिने बाँचा पूरा हुदैनकी भन्ने पिरमा जनता छन् । अघिल्लोपटक पनि आफूहरूसँग गरिएका बाँचा प्रतिबद्धता पूरा नभएको जनताको गुनासो छ ।

कैलालीको धनगढी उपमहानगरपालिका वडा नम्बर १८ तुलसीबारीका श्रीराम चौधरीले आफ्नो टोलमा चुनावका बेला विभिन्न दलका नेता तथा कार्यकर्ता आए पनि तर बाचा भने कहिल्यै पूरा नभएको बताउँछन् । आफ्नो टोल विगतदेखि नै हेपिएको उनी बताउँछन् । ‘धनगढीमै हाम्रो तुलसीबारी गाउँ छ, तर यो गाउँ र वडामा विकास हुन सकेन, हाम्रो गाउँमा अझै पनि पानी र बत्तीको पर्याप्त सुविधा छैन,’ उनले भने, ‘हरेकपटक यहाँ बिजुली, पानी र सडक बनाउँछु भनेर नेताहरू आउने गरेको भए पनि अझैसम्म कुनै पनि विकास हुन् सकेको छैन ।’

उम्मेदवारहरूले हरेक चुनावका बेला हामी नै टोल र गाउँको विकास गर्छु भनेर लागे पनि पछि फर्केर नहेर्ने गरेको दुखेसो पोखे । उनले अझैसम्म पनि एक घरबाट अर्को घरमा तार तानेरै बिजुली बाल्नुपर्ने अवस्था रहेको बताए । गाउँमा पोल नै नहुँदा टोल भरी बाँसका खम्बाबाट तार तानेर घरमा उज्यालो पुर्‍याउनुपर्ने अवस्था आएको उनले बताए । टोलमा विकास गर्छु भनेर अहिलेसम्म यहाँका जनतालाई नेताहरूले झुक्याउने काम मात्रै भइरहेको उनी बताउँछन् ।

उनी जस्तै पदम बिकले पनि टोलको विकास हुन नसकेको बताए । ठाउँअनुसारको बजेट नछुट्याउदाँ समस्या भएको उनको भनाइ छ । अहिलेसम्म गाउँमा सिचाईँको व्यवस्थासमेत नभएका बिकको भनाइ छ ।

‘बत्ती बालिएको छ तर पोल छैन । अझै पनि बाटोको सुविधा छैन,’ उनले भने, ‘नक्सामा बाटो भए पनि सडक आउन अझै सकेन ।’ नेताहरूले चुनावका बेला गरेका बाँचा पूरा हुनुपर्ने उनको भनाइ छ ।

फूलबारी १८ का उमेश चौधरीले पनि गाउँमा समस्या धेरै भए पनि तर समाधान हुन नसकेको बताए । ‘जति नेता आए पनि आफ्नै सिटका लागि मात्रै लड्ने गरेका छन्,’ चौधरीले भने, ‘भोटका लागि त आउँछन् तर पछि फर्किँदैनन् ।,’ चुनाव आउँदा घर घरमा पुग्ने नेताहरू समस्या पुग्दा उनीहरू सामु जाँदा पनि समस्या नसुन्ने उनीहरूको गुनासो छ ।

हसुलीया घर भएकी गीता भूलले पनि जनताका दुःख अझैसम्म नेताहरूले नबुझेको बताइन् । बाढीले किसानका पूरै धानबाली बगाउँदा पनि राहत नभएको उनको गुनासो छ । ‘वर्ष भरी खान पुग्ने अन्न बाली बाढीले बगाउँदा पनि राहतको नाममा १२ सय मात्रै पायौँ,’ उनले भनिन्, ‘त्यो पैसाले बिउ किन्नसमेत पुगेन ।,’ एक बिगाहा जमिनको धानबाली बग्दासमेत उचित राहत नपाउँदा किसानलाई समस्या भएको उनले दुखेसो पोखिन । जो सुकै जिते पनि तर जनताका समस्या बुझ्ने हुनुपर्ने उनी बताउछिन् ।

उम्मेदवारहरूले अहिले घरदैलो अभियानलाई तीव्रता दिएका छन् । जनताका समस्यालाई समाधान गर्छु भन्दै उम्मेदवारहरू अहिले जनताका घरघर पुगीरहेका छन् ।

प्रकाशित मिति: मंगलबार, कात्तिक १५, २०७९ १९:५४