सधैँ पूर्वबाट चुनावी सभा सुरु गर्ने ओली योपटक किन पुगे दार्चुला ?

A+ A A-

नेकपा एमाले अध्यक्ष केपी ओलीले १८ कात्तिकमा दार्चुला पुगेर पहिलो चुनावी सभालाई सम्बोधन गर्ने भएसँगै धेरैले चासो देखाएका छन्- पहिलो चुनावी सभाका लागि ओलीले दार्चुला किन रोजे ?

हुन पनि विगतमा एमालेले पूर्वी नेपालबाट चुनावीसभा सुरु गर्थ्यो । अहिले ओलीले दार्चुला रोज्नुमा दुईवटा कारण देखिन्छन् । एमाले नेताहरूकै भनाइमा पहिलो हो निरन्तरतामा क्रमभंग । अर्थात् विगतमा पूर्वबाट सुरु गरेको अभियानको निरन्तरतलाई यसपटक ओलीले तोड्न चाहेका हुन् ।

पछिल्ला दिनमा सुदूरपश्चिममा एमालेको संगठन कमजोर बनेको छ । एमाले विभाजनको निकै प्रभाव परेको यो प्रदेशमा भीम रावल प्रकरणले पनि घाटा पुर्‍याउन सक्ने आकलन छ । त्यसलाई कम गर्न रणनीतिक सन्देश प्रवाहका लागि ओलीले दार्चुला रोजेर सुदूरपश्चिमका निर्वाचन क्षेत्रलाई पहिलो प्राथमिकतामा राखेका हुन् ।

दोस्रो, राष्ट्रवादको नारा । ओली प्रधानमन्त्री हुँदा भारतले मिचेको दार्चुलाका लिम्पियाधुरा, लिपुलेक र कालापानी क्षेत्र समेटेर नेपालको नक्सा जारी भएको थियो । जसलाई चुच्चे नक्साको रूपमा चिनिन्छ र त्यही चुच्चे नक्सालाई ओलीले राष्ट्रवादसँग जोडेर चुनावी कार्डको रूपमा प्रयोग गर्ने प्रयास गर्दैछन् ।

हुन पनि पछिल्ला दिनमा विश्वभरि नै नेताहरूले राष्ट्रवादको लोकप्रिय नारालाई बोकेर चुनावी फण्डा चलाउने गरेका छन् । पाँच वर्षअघि भ्रष्टाचारको विरोध र राष्ट्रवादको चर्को नारासहित ब्राजिलको राष्ट्रपतिमा जाइर बोल्सोनारो निर्वाचित भएका थिए ।

ल्याटिन अमेरिकी देश ब्राजिलमा २०१९ मा निर्वाचित बोल्सोनारो जो, दक्षिणका ट्रम्पु उपनामले परिचित थिए । उनले पनि राष्ट्रवादी मुद्दाबाटै चुनावी नतिजा आफ्नो पक्षमा पारेका थिए । ओलीले २०७४ मा भारतीय नाकाबन्दीविरोधी जनमतसँग जोडिएर राष्ट्रवादको नारा निकै उरालेका थिए । अमेरिकी राष्ट्रपति डोनाल्ड ट्रम्पको उदय र बोल्सोनारोको उदय उस्तैउस्तै छ । उनीहरू सामाजिक सञ्जालमार्फत उग्रराष्ट्रवादी अभिव्यक्ति प्रवाह गर्दथे ।

चीनमा सी चिनफिङ सपनाको चीनसहित लोकप्रियताको तीव्र उडानमा छन् । भारतीय प्रधानमन्त्री नरेन्द्र मोदीमा पनि त्यस्तै महत्त्वाकांक्षा र प्रयासहरू छन् । उग्र राष्ट्रवाद र विकासको नारालाई अगाडि सारेर उनी चुनावमार्फत स्थापित भएका छन् ।

हुन त जापानका तत्कालीन प्रधानमन्त्री सिन्जो आबे हुन् या फिलिपिन्सका रोड्रिगो डुटेर्टे या हंगेरीका भिक्टर ओर्बान नै किन नहुन्, यी सबै राष्ट्रवादकै नारामार्फत उदाएका हुन् । आफ्नो लोकप्रियताका लागि उनीहरूले अपनाएको शैली मिल्दोजुल्दो छ । अनि ओलीले पनि त्यही पदचाप पछ्याएको देखिन्छ ।

नागरिक तहमा उठेका स–साना टिप्पणीको पनि प्रत्युत्तर दिने ओलीमा लोकप्रियताको अभूतपूर्व लोभ देखिन्छ । त्यही लोभले ओलीलाई दार्चुलाको चुनावी सभामा पुर्‍याउँदैछ ।

१८ कात्तिकदेखि ओली देश दौडाहामा निस्कँदैछन् । चार दिन झापा बसेर काठमाडौं फर्किएका उनले सोमबार साँझ कार्यक्रम तालिकालाई अन्तिम रूप दिएको सचिवालयले जनाएको छ । ओलीले १८ कात्तिकदेखि १ मंसिरसम्म कम्तीमा ४४ जिल्लामा करिब ५७ भन्दा बढी चुनावी सभालाई सम्बोधन गर्ने तालिका तय भएको उनको सचिवालयले जानकारी दिएको छ ।

निर्वाचन आयोगले दलहरूलाई १७ कात्तिकदेखि मात्र ठूला आमसभा गर्न स्वीकृति दिएको छ । एमालेले भने १८ कात्तिकदेखि चुनावी सभाको तयारी गरेको हो ।

दार्चुला नै किन ?

ओलीले २०७४ को चुनावमा झापाको काँकडभिट्टाबाट सभा सुरु गरेका थिए । गत स्थानीय चुनावमा ओलीले झापाको दमक नगरपालिकामा पहिलो चुनावी सभा गरे । २०७० को सविधानसभा चुनावमा पनि झापाको चन्द्रगढीमा पहिलो चुनावी सभा गरे । पार्टीको नेतृत्व सम्हालेयता ओलीले पूर्वबाटै चुनावी सभाको सुरुवात गर्दै आएका थिए ।

एमालेका उपमहासचिव विष्णु रिमाल दार्चुलाबाट चुनावी सभा सुरु गर्नु नौलो र त्यति ठूलो विषय नभएको बताउँछन् । एमाले नेतृत्वकै सरकारले जारी गरेको लिम्पियाधुरा, कालापानी र लिपुलेक समेटिएको नक्सा नेपालको पहिचान र सम्पत्ति भएकाले एमालेले एजेन्डा बनाइरहनु नपर्ने उनको भनाइ छ ।

‘देशको ठूलो राजनीतिक दलले जहाँबाट पनि आफ्नो चुनावी सभा आरम्भ गर्न सक्छ,' रिमाल भन्छन्, 'एमालेले दार्चुलाबाट चुनावी सभा सुरुवात गर्दा राष्ट्रवादको मुद्दा कहाँबाट आउँछ ? एमालेले त नक्सा जारी गरेसँगै राष्ट्रवादको पहिचान बनाइसकेको छ ।’

दार्चुलाजस्तो दुर्गम क्षेत्रबाट चुनावी सभा सुरु गर्दा त्यहाँको विकास र जनताको मनोभावना बढाउने उनको तर्क छ । ओलीले झापा, सुनसरी, उदयपुर, खोटाङ, संखुवासभा, मोरङ तथा पाँचथरलगायतका जिल्लामा चुनावी सभालाई सम्बोधन गर्ने रिमाल बताउँछन् । ओली गएका सबै कार्यक्रम दार्चुलाको जस्तै हुने उनको भनाइ छ ।

सामाजिक सञ्जालहरूमा भने एमालेले दार्चुलाबाट चुनावी सभा सुरु गरेर राष्ट्रवादको मुद्दा उठाउन खोजेको चर्चा सुरु भएको छ । तर, दार्चुलाबाट चुनावी सभा सुरु गर्दा राष्ट्रवाद मात्र नभएर देशभर नयाँ सन्देश जाने एमालेका नेताहरूको तर्क छ ।

ओलीको सचिवालयका अनुसार ओलीले बैतडी, कञ्चनपुर, कर्णालीका दुई जिल्ला सुर्खेत र दैलेखमा आयोजना हुने सभालाई सम्बोधन गर्न कार्यतालिका तय भएको छ ।

यस्तै, एमाले लुम्बिनी प्रदेशका अध्यक्ष राधाकृष्ण कँडेलका अनुसार लुम्बिनीका ६ वटा जिल्लामा सम्बोधनका लागि ओलीलाई प्रस्ताव गरिएको छ । गण्डकी प्रदेशका ६ वटा जिल्लामा कार्यक्रमको प्रस्ताव गरिएकोमा तीनवटा जिल्लाको समय निश्चित भइसकेको उनले जानकारी दिए ।

कात्तिक ३१ र मंसिर १ गते प्रदेश नं १ का सभालाई सम्बोधन गरेर ओलीले चुनावी सभा सकिने उनको सचिवालयले जनाएको छ ।

प्रकाशित मिति: मंगलबार, कात्तिक १५, २०७९ १६:१३