तेस्रो प्रयासमा संसद छिर्लान् रामनाथ ? रोक्ने रणनीतिमा लोहनी

A+ A A-

धादिङ २ मा सत्ता गठबन्धनबाट कांग्रेसका जिल्ला सभापति रामनाथ अधिकारी र एमालेबाट निवर्तमान सांसद एवं एमाले केन्द्रीय सदस्य खेम लोहनी चुनावी प्रतिस्पर्धामा उत्रिएका छन् । कांग्रेसका अधिकारीलाई माओवादी केन्द्र, एकीकृत समाजवादी र लोहनीलाई राष्ट्रिय प्रजातन्त्र पार्टीको साथ छ ।

राष्ट्रिय स्वतन्त्र पार्टीबाट बसुमाया तामाङ, कांग्रेस बीपीबाट शंकर दर्जी, जनता समाजवादी पार्टी नेपालबाट मेकरमान तामाङ, मंगोल नेसनल अर्गनाइजेसनबाट धनमाया तामाङ पनि चुनावी मैदानमा छन् । २०७४ को निर्वाचनमा एमालेका लोहनी निर्वाचित भएका थिए ।

कांग्रेसका दिलमान पाख्रिनलाई एमालेका लोहनीले ६ सय ४० मतले पराजित गरेका थिए । लोहनीले ३६ हजार २ सय ५३ मत ल्याए पाउँदा कांग्रेसका पाख्रिनले ३५ हजार ६ सय १४ मत पाएका थिए । अघिल्लो चुनावमा एमाले र माओवादी केन्द्रबीच गठबन्धन भएको थियो ।

आन्तरिक किचलोले घट्न सक्छ भोट

गठबन्धन र एमालेका दुवै उम्मेदवारलाई पार्टीभित्रको आन्तरिक कलह महँगो पर्न सक्छ । गठबन्धनबाट कांग्रेस उम्मेदवार अधिकारीविरुद्ध कांग्रेसकै रमेश धमलाले बागी उम्मेदवारी दिएका थिए । पछि उनले उम्मेदवारी फिर्ता लिए ।

राप्रपासँग भएको तालमेलपछि आफ्नो टिकट खोसिएको भन्दै एमाले जिल्ला उपाध्यक्ष धनबहादुर घलले पार्टी नै परित्याग गरे । उनी धादिङ २ 'ख' बाट प्रदेशसभाका आकांक्षी थिए । उनले बागी उम्मेदवारी दिए पनि राप्रपाका उम्मेदवार डम्बर तामाङलाई सहयोग गर्ने बताएका छन् ।

सुरुवातमै टिकट वितरणप्रति असहमति जनाएर पार्टीका आधिकारिक उम्मेदवारविरुद्ध बागी उम्मेदवार बनेर पछि फिर्ता लिए पनि यसको प्रत्यक्ष अप्रत्यक्ष प्रभाव पार्ने देखिन्छ ।

चुनाव जित्नेमा ढुक्क छन् अधिकारी

कांग्रेसबाट टिकटका लागि प्रत्यासी रहेका नेता दिलमान पाख्रिनले कस्तो भूमिका खेल्छन्, त्यसमा पनि चुनावी अंकगणित परिवर्तन हुन सक्छ । पार्टीभित्र भएका असहमति साम्य भएकाले कांग्रेस एकढिक्का रहेको र गठबन्धनको सहयोगमा चुनाव जित्नेमा ढुक्क छन् अधिकारी ।

आफ्नो इमानदारिता, त्याग र जनताप्रति उत्तरदायी बन्ने प्रवृत्तिले थप सहानुभूतिको भोट प्राप्त गरेर जित्ने उनको दाबी छ । ‘गठबन्धनको आसले मात्रै मैले उम्मेदवारी दिएको होइन, सक्रियता, इमानदारी र जनताप्रतिको सेवाभावले मेरो आफ्नै व्यक्तिगत भोट आउनेमा विश्वस्त छु, जित निश्चित छ,’ अधिकारीले शिलापत्रसँग भने । उनले हिमाली भेगबाट घरदैलो गर्दै चुनावी अभियान सुरु गरेका छन् । उनले गठबन्धनको साझा उम्मेदवार भन्दै मत मागिरहेका छन् ।

‘संविधानको रक्षा, स्थिरता र समृद्धिका लागि भ्रष्टाचारमुक्त समाजका लागि गठबन्धनको उम्मेदवारलाई जनताले जिताउनुहुनेछ,' अधिकारीले भने, ‘धादिङको समग्र विकास र जीवनस्तर उकास्ने प्रण मतदातामसक्ष गरेको छु । जनताको जनमत खेर गयो भन्ने पार्दिनँ ।’

अन्य उम्मेदवारप्रति टिप्पणी नगर्ने उनले बताए । अधिकारी २०६४ र २०७० को चुनावमा उम्मेदवार बने पनि पराजित भएका थिए ।

आफूले जित्ने लोहनीको दाबी

२०७४ को चुनावमा निर्वाचित भएका लोहनी फेरि संसद छिर्ने दाउमा छन् । स्थानीय तह र प्रतिनिधिसभा निर्वाचनमा फरक-फरक हिसाबमा मत खस्ने एमालेको बुझाइ छ । गठबन्धनप्रतिको वितृष्णा र गठबन्धन दलको केही असहमतिका भोटमा आफूतिर तानेर चुनाव जित्ने रणनीतिमा एमाले छ ।

‘मेरो चुनाव जित्ने आधार भनेकै विगतमा मैले गरेको काम हो, त्यसमाथि वर्तमान गठबन्धनविरुद्धको असन्तुष्टिको भोट मलाई आउँछ । गठबन्धन राष्ट्रहितविपरीत हिँडिरहेकाले पनि तमाम राष्ट्रवादी साथीहरूको भोट मलाई आउँछ र मैले जित्छु,’ लोहनीले शिलापत्रसँग भने । सत्ता गठबन्धनका असन्तुष्टहरूसँग नजिक भएर त्यसभित्रको मत तान्ने रणनीतिमा एमाले देखिन्छ ।

'देशलाई जोगाउने र विकासको रोडम्याप हामीसँग छ,’ लोहनीले भने, ‘राजनीतिक क्षेत्र बदनाम भएको छ । यसलाई सम्मान गर्ने वातावरण बनाउनेछौँ ।' पार्टीमा देखिएको विवाद अहिले नरहेको उनले बताए । ‘राजनीतिमा विकृतिसँगै स्वार्थ हाबी भयो । राप्रपा र एमालेको गठबन्धनलाई जिल्लामा असर पर्दैन,’ लोहनीले भने ।

स्थानीय तहको चुनावलाई आधार मान्दा गठबन्धन बलियो

धादिङ २ मा ५१ वटा वडा पर्छन् । स्थानीय तहको चुनावमा अधिकांश वडामा दलहरूले एक्लाएक्लै प्रतिस्पर्धा गरेका थिए । एमालेले ५१ वटै वडा, कांग्रेसले ४३ वटा वडा र माओवादी केन्द्रले ३४ वटा वडामा आफ्ना उम्मेदवार उठाएका थिए ।

एकीकृत समाजवादी पार्टीले २४ वटा वडा, राप्रपाले ४६ वटा वडा र जनता समाजवादी पार्टीले १३ वटा वडामा आफ्ना उम्मेदवार उठाएका थिए । जसमध्ये कांग्रेस २२ वटा वडामा विजयी हुँदा माओवादी केन्द्र १० वटा वडामा विजयी भएको थियो । एमालेले ८, राप्रपा ४, स्वतन्त्र ३, जनता समाजवादी १ र एकीकृत समाजवादीले ३ वटा वडा जितेका छन् ।

वडा अध्यक्षहरूले पाएको मत हेर्दा कांग्रेस २९ हजार ९ सय ६५, एमालेले २५ हजार ९ सय ३८ र माओवादीले १४ हजार ३ सय ८० मत ल्याएका थिए । त्यस्तै, राप्रपाले ५ हजार २ सय ८७ मत र नेकपा एकीकृत समाजवादीले ३ हजार ४ सय ५६ मत पाएका छन् । त्यस्तै, स्वतन्त्रलगायत अन्य साना दलहरूले ४ हजार ९ सय ४४ मत पाएका छन् ।

सत्ता गठबन्धनमा रहेका दलहरू कांग्रेस, माओवादी केन्द्र, एकीकृत समाजवादी र जनता समाजवादीका वडाध्यक्षले पाएको मत जोड्दा ४७ हजार ८ सय १ हुन आउँछ । त्यस्तै, एमाले र राप्रपाका वडाध्यक्षले पाएको मत जोड्दा ३१ हजार २ सय २५ मत हुन आउँछ ।

प्रकाशित मिति: मंगलबार, कात्तिक १५, २०७९ १७:३८