एमाले अध्यक्ष ओलीलाई सर्वसाधारणले फाेन संवादमा के प्रश्न साेधे ?

A+ A A-

नेकपा एमालेका अध्यक्ष केपी शर्मा ओलीले शुक्रबार सर्वसाधारणलाई टेलीफोन गरे । उनको सचिवालयका अनुसार ओलीले शुक्रबार ४ घण्टामा करिब ४ सयवटा फाेन नम्बरमा सम्पर्क गरी नागरिकसँग सम्वाद गरेका छन् ।

ओलीले यसअघि नै आफूले शुक्रबार सर्वसाधारणलाई फोन गर्ने भन्दै नम्बर टिपाउन आफनो फेसबुक पेजमा प्रचार र आग्रहसमेत गरेका थिए ।

ओलीको सचिवालयका अनुसार उनीसँग सम्वाद गर्न २ लाखभन्दा धेरै नागरिकले नम्बर र म्यासेज गरेका थिए । तीमध्ये गोलाप्रथाबाट सीमित व्यक्तिको नम्बर छानेर फोन सम्वाद गरेका हुन् । मंसिर ४ गतेको निर्वाचनलाई लक्षित गर्दै अध्यक्ष ओलीले नागरिकसँग प्रत्यक्ष संवाद थालेका हुन् । ओलीले बाँकी फाेन नम्बरमा पनि क्रमैसँग फाेन गर्ने बताएका छन् ।

ओलीलाई सोधिएका प्रश्न

‘बेरोजगारी अन्त्य गर्ने एमालेको विषेश योजना कहिले आँउछ । रेमिट्यान्समा मात्र कहिलेसम्म देशभर पर्ने र रोजगारीमैत्री शिक्षा चाहियो ? भन्दै दक्षिण कोरियामा रहेका पुरनमान तामाङले एमाले अध्यक्ष ओलीलाई प्रश्न गरेका थिए । तामाङलाई ओलीले शुक्रबार फाेन गरेका थिए ।

यस्तै, ललिपुरका आकाश खड्काले फाेन सम्वादमा ‘ओली बा जनताको घर–घरमा कहिले ग्यासको पाइप कहिले जोडिन्छ । देशप्रति तपाईंहरू कहिले जिम्मेवार हुने । नेपाली युवाहरू खाडीका देश र मलेसियामा पसिना बगाउन जाने दिनको अन्त्य कहिले हुन्छ । वैदेशिक अध्ययनको बाहानामा कहिलेसम्म विदेशीनुपर्ने हो’ भनेर ओलीलाई प्रश्न गरेका थिए ।

यसैगरी, कैलालीका डिकराज बजगाईंले ‘देशमा महँगी बढेर जनता बाँच्न नसक्ने अवस्थामा पुगेका छन् । एकतिर महँगी अर्कोतिर उपचार गराउन नसक्ने अवस्था भएको छ । यो विषयमा एमाले किन मौन बसेको हो’, ओलीलाई प्रश्न सोधे ।

धनकुटाका भक्तबहादुर थापाले ‘देशको अर्थतन्त्र, शेयरबजार, बेरोजगारी अवस्था, किसान भोकै बस्नुपर्ने अवस्था र बजारको महँगीले सामान्य जिवनयापन गर्नसमेत मुस्किल भएको’ भन्दै समाधानका लागि पहल गर्न ओलीलाई सुझाव दिएका थिए ।

फाेन सम्वादमा एमाले अध्यक्ष ओलीलाई व्यवसायी, शिक्षक, पत्रकार, विद्यार्थी, वैदेशिक रोजगारीमा कार्यरत कामदार, स्वदेशमा कार्यरत श्रमिक र सामाजिक अभियन्ताहरूले समेत आफ्नो जिज्ञासा, सुझाव र प्रश्न गरेको उनको सचिवालयका रामशरण बजगाईंले जानकारी दिए ।

ओलीसँग फोन सम्वादमा आमनागरिकले एमालेको घोषणापत्रमा कृषि रोजगारी, शिक्षा, स्वास्थ्य र अहिलेको सरकारले गरेको विकृत्तिका बारेमा समेत प्रश्न गदै समस्या समाधान गर्ने आग्रह गरेको उनले बताए । ‘जनताको राजीतिकप्रतिको चासो बुझन् र जनताले कस्तो समाज चाहिरहेका छने भनेर अध्यक्ष ओली ‘लाइभ डिबेट’ गर्नुभएको हो ।’ उनले भने, ‘जनताले देशको समसामयिक विषयमा केन्द्रित भएर ‘लाइभ डिबेट’मा प्रश्न र आफ्नो गुनासोसमेत टिपाए । एमालेले यसलाई गम्भीर रुपमा लिएको छ ।’

ओलीले किन ‘लाइभ डिबेट’ चाहे ?

एमाले अध्यक्ष ओलीले प्रधानमन्त्री तथा नेपाली कांग्रेसका सभापति शेरबहादुर देउवालाई चुनावी एजेन्डामा ‘लाइभ डिबेट’ गर्न चुनौती दिएका थिए । ओलीको प्रस्तावलाई प्रधानमन्त्री देउवाको सचिवालयले भने वेवास्ता गर्दै केही प्रतिक्रिया दिएन ।

तर, ओलीको प्रस्ताव स्वीकार गर्दै लाइभ डिबेट गर्न सभापति देउवालाई कांग्रेसका महामन्त्री गगन थापाले आग्रह गरेका थिए । यादि सभापति देउवाले लाइभ डिबेट नगरे आफू ओलीसँग यो विषयमा छलफल गर्न तयार रहेको समेत उनले बताएका थिए ।

प्रविधिको विकाससँगै जनताले राजनीतिक दलका एजेन्डाहरू सामाजिक सञ्जाल र सञ्चारमाध्यमको पहुँचबाट हेर्ने, सुन्ने सँगै सम्वाद गर्न रुचाउने गरेको एमालेका उपमहासचिव विष्णु रिमाल बताउँछन् ।

एमाले अध्यक्ष ओलीले किन प्रधानमन्त्री तथा नेपाली कांग्रेसका सभापति शेरबहादुर देउवासँग ‘लाइभ डिबेट’ गर्न खोजेका हुन् भन्ने प्रश्नमा उनले भने, ‘अन्तरपार्टी ‘लाइभ डिबेट’ गर्दा राजनीतिक योजनासँगै घोषणापत्रको एजेन्डाका बारेमा सामूहिक बहस र छलफल हुन्छ । ‘लाइभ डिबेट’बाट जनताले आगामी पाँच वर्षको राजनीतिक रणनीति, विकासका योजना र देशको आर्थिक विकास कसरी हुँदैछ भनेर थाहा पाउँछन् ।’

उनका अनुसार ‘लाइभ डिबेट’बाट राजनीतिक बहस गर्न एमाले अध्यक्षले कांग्रेसका सभापतिसँग खोजेको हो । उनले त्यही भएर प्रधानमन्त्री तथा कांग्रेस सभापतिलाई ‘लाइभ डिबेट’को आग्रह गरेकाे उनको भनाइ छ ।

नेपालमा मात्र होइन । छिमेकी देश भारत, पाकिस्तान, अमेरिका, बेलायत र क्यानडामा समेत निर्वाचनको मुखमा प्रतिस्प्रर्धीहरूले ‘लाइभ डिबेट’ गर्ने गरेका छन् ।

प्रकाशित मिति: शुक्रबार, कात्तिक ४, २०७९ १८:०५