एमालेको 'ट्रायल' क्षेत्रमा 'ह्याट्रिक' गर्न भीमसेनदासलाई सर्वेन्द्र चुनाैती

एमालेको 'ट्रायल' क्षेत्रमा 'ह्याट्रिक' गर्न भीमसेनदासलाई सर्वेन्द्र चुनाैती

A+ A A-

काँठे वस्ती र कोर सिटी समेटेर बनेको काठमाडौं क्षेत्र नं ६ मा सत्ता गठबन्धनकाे समर्थनमा नेपाली कांग्रेसबाट उम्मेदवार बनेका भीमसेनदास प्रधान र एमालेका उम्मेदवार सर्वेन्द्र खनालबीच मुख्य प्रतिस्पर्धा हुने देखिएको छ । प्रधान मन्त्रीसमेत भइसकेका र याे क्षेत्रबाट २ पटक जितिसकेका नेता हुन् । काठमाडौंको राजनीतिका लागि उनी खेलाडी मानिन्छन् ।

खनाल नेपाल प्रहरीका पूर्व महानिरीक्षक हुन् । एमालेबाट पहिलोपटक राजनीतिक मैदानमा उत्रिएका उनी प्रधानलाई पाखा लगाउँदै जनताबाट अनुमोदन हुने लक्ष्यमा छन् । सो क्षेत्रमा प्रधान र खनालसहित २४ जनाको उम्मेदवारी परेको छ । राप्रपाबाट विष्णुप्रसाद आचार्य, विवेकशील साझा पार्टीका अजित खड्का, राष्ट्रिय स्वतन्त्र पार्टीका शिशिर खनाल मैदानमा छन् ।

कांग्रेस बाहेकका उम्मेवार टिकेका छैनन्

२०६४ काे चुनावमा माओवादीका हिमाल कर्माचार्य विजयी हुँदा कांग्रेसका प्रधान दोस्रो, एमालेका योगेश भट्टराई तेस्रो भएका थिए । २०७० मा प्रधान विजयी हुँदा भट्टराई दोस्रो र कर्माचार्य तेस्रो भए । २०७४ मा वाम गठबन्धन हुँदा पनि प्रधानले जित हात पारे । २०६४ र २०७० मा हार व्यहोरेपछि भट्टराई गृहजिल्ला ताप्लेजुङ लागे ।

एमालेले नयाँ अनुहार मैदानमा उतारेको छ । ‘२०६४ सालदेखि हालसम्म अन्य पार्टीको उम्मेदवार परिवर्तन हुँदै आए । म निरन्तर छु । जनताले रुचाएका पनि छन् । कांग्रेसको सुरक्षित स्थान भएर अन्य दलका केन्द्रीय तहका नेता आए घाइते हुने भएर एमालेले नयाँ उम्मेदवार उठाएको छ,’ प्रधानले शिलापत्रसँग भने । २०७४ सालमा प्रधानले वाम गठबन्धनका झक्कु सुवेदीलाई हराएका थिए । प्रधान १६ हजार ७८५ मत पाएर विजयी हुँदा सुवेदीले १५ हजार ४८५ मत ल्याएका थिए । तेस्रो भएका विवेकशील साझाका उम्मेवार रमेश चिलुवालले ४ हजार २२५ मत ल्याएका थिए ।

एमालेमा असन्तुष्टि

नव आगन्तुक खनाललाई उम्मेदवार बनाएकोमा एमालेभित्र असन्तुष्टि छ । खनालको शैली राजनीतिक नभएको आरोप समेत लागेको छ । ‘२०४८ सालदेखि सो क्षेत्रमा हाम्रो फरक–फरक उम्मेदवार छन् । सबै टुरिस्ट भए यो पटक त्यहीँको स्थानीय उम्मेदवार हुन्छन् कि भनेको भएन,’ जिल्लाका एक नेताले शिलापत्रसँग भने, ‘स्थानीय उम्मेदवार बनाउने प्रयासमा हामी थियौं । माथिबाट सर्वेन्द्र खनालको नाम आयो । पार्टीको निर्णय ठिकै छ । उहाँलाई जिताउन लागेका छौं ।’

याे क्षेत्रमा एमालेले असुरक्षि ठानेर उम्मेदवारमा ट्रायल गरिरहेको छ । २०४८ सालमा पद्मरत्न तुलाधर, २०५६ मा भरत प्रधानलाई उम्मेदवार बनाएको थियो ।

तर एमालेका केन्द्रीय नेताहरू भने काठमाडौंको कुनै पनि क्षेत्रमा विवाद नरहेको बताउँछन् । ‘काठमाडौ ६ मात्र किन कुनै पनि क्षेत्रमा हाम्रो पार्टीमा विवाद छैन,’ केन्द्रीय सदस्य सरिता न्यौपानले शिलापत्रसँग भनिन्, ‘पार्टीका उम्मेदवारको विषयमा विवाद छैन । अहिले मैदानमा एमाले आफ्ना उम्मेदवार जिताउन लागि परेको छ ।’

खनाल गैरराजनीतिक उम्मेदवार भएकाे आरोप

कांग्रेस उम्मेदवार प्रधान राजनीति भनेको रिटायर्ड जीवन बिताउने ठाउँ नभएको बताउँछन् । ‘गैर राजनीतिक व्यक्ति जनतामा अनुमोदनका लागि पठाउनु राजनीतिक पार्टीमा कुसंस्कार हो । जीवनको रिटायर्ड लिनुपर्ने बेलामा राजनीतिमा आउनु राम्रो होइन । राजनीतिमा झन बढी सक्रियता चाहिन्छ ।', कांग्रेस उम्मेदवार प्रधानले भने, 'जसले जुन पेसा अपनाएको छ त्यही पेसा गर्न दिनपर्छ । राजनीति विश्राम लिने थलो होइन । अरुले बनाएको सिंहासनमा नयाँ मान्छे आएर बस्दा सिंहासन बनाउने मान्छे पीडामा हुन्छन् ।’

त्यागको राजनीति गर्ने विस्थाापन हुने प्रधानको भनाइ छ । ‘राजनीतिभन्दा बाहिरको मान्छे ल्याउँदा जेलनेल बसेको त्याग र तपस्या गरेका अन्यायमा पर्छन् । नत्र हामी पनि व्यापार गर्थ्यौं राजनीतिमा व्यापार गरेका छैनौं । कम्युनिस्ट होस् या कांग्रेस राजनीतिक मान्छेले त्याग गरेकै छन्,’ प्रधानले भने । पार्टीलाई फरक पृष्ठभूमिका व्यक्ति चाहिए समानुपातिक प्रणालीबाट ल्याउनुपर्ने उनले बताए । राष्ट्रिय योगदान गरेका व्यक्तिलाई राष्ट्रियसभामा लगेर जनताबाट अनुमोदन हुन राजनीतिक व्यक्तिलाई दिनुपर्ने प्रधानको भनाइ छ ।

ढुक्क खनाल

जित निकाल्न मैदानमा उत्रिएका खनाल मतदातालाई सेवा गर्ने मौका दिन अनुरोध गरिरहेका छन् । ‘यत्तिका समय प्रहरीमा रहेर देश र जनताको सेवा गरेँ । अब तपाईँहरूकाे प्रतिनिधि भएर सेवा गर्ने मौका दिनुहोस् ।’ उनले चुनावी कार्यक्रमाम भन्ने गरेका छन्, ‘प्रतिनिधिसभामा तपाईँहरूको शीर उचो बनाउने छु । यहाँका समस्या समाधानका लागि सार्थक पहल गर्नेछु ।’

एमाले उम्मेदवार खनाल नतिजा आफ्नो पक्षमा आउनेमा ढुक्क देखिए । ‘जनताले मलाई रुचाएका छन् । जनतामाझ पुग्दा माहोल मेरो पक्षमा पाएको छु ।' खनालले शिलापत्रसँग भने, ‘पहिला सिकेको अनुभव लगाएर देशको सेवा गर्नुछ ।’ राजनीतिमा रिटायर्ड जीवन बिताउन नआएको उनले बताए । ‘पहिलेदेखि नागरिकको सेवामा थिएँ । अहिले फरक ठाउँमा रहेर सेवा गर्न आएको छु', उनले भने, ‘यो सेवाको निरन्तरता हो ।’

तनहुँ गृहजिल्ला भए पनि प्रहरी संगठनमा रहँदा चर्चा र अवकाशपछि विवादमा छाएका खनाल काठमाडौंका लागि परिचित अनुहार हो । केही समयअघिमात्र एमाले प्रवेश गरेका खनालमाथि संगठनबाट अलग्गिएसँगै सांसद अपहरणको साक्षी बनेको आरोप लाग्यो ।

आगन्तुक मतदाताको मतले प्रभावित पार्न सक्छ

तारकेश्वर नगरपालिका र टोखा नगरपालिकाको उत्तरी भेगमा बाहिरी जिल्लाका मतदाता बढी छन् । छोर, नेपालटार, साङ्ला, कोभ्रस्थली, धर्मस्थलीलगायतका उत्तरी क्षेत्रमा नुवाकोट, धादिङ, रसुवा, लमजुङलगायतका जिल्लाका मतदाता बसाइ सरेर आएका छन् । ती जिल्लाबाट आएका मतदाताको मत जसले तान्छ उसको पल्ल भारी हुने देखिन्छ । ‘२०६४ मा चुनावमा जाँदा साङ्ला एकदमै दुर्गम अविकसित थियो । त्यहाँका मानिसको रोजगारी थिएन । बाटो थिएन’ प्रधानले भने, ‘मैले विकास गर्दा विकट क्षेत्रलाई विकास गर्ने बताएको थिएँ । झोर, साङ्ला, धर्मस्थली र काभ्रेस्थली हेर्नुस् ।’ चुनाव जित्दा तारकेश्वर नगर प्रमुख र काठमाडौ नगरका अधिकांश वडा कांग्रेसको जनप्रतिनिधि रहेकाले योजनाबद्ध विकास गर्ने उनले बताए ।

...

काठमाडौं ६ भित्र काठमाडौं महानगरका वडा नं २६, २७ र २८, टोखा नगरपालिकाका १, ८, ९, १० र ११ तथा तारकेश्वर नगरपालिकाका १, २, ६, ९, १० र ११ नं वडा पर्छन् । काठमाडौंको कोर सिटीको केही भाग र काँठका धेरै भाग मिलेर बनेका कारण यो क्षेत्रको मत परिणाम कता ढल्किन्छ यसै भन्न सकिन्न ।

स्थानीय चुनावको नतिजा

काठमाडौं क्षेत्र नं ६ मा गत स्थानीय तहको निर्वाचनमा वडाध्यक्षहरूले पाएको मतको आधारमा कांग्रेस अघि छ । कांग्रेसका वडाध्यक्षहरूले १७ हजार २ सय ७७ मत प्राप्त गरेका थिए । एमालेका वडाध्यक्षले १४ हजार ३ सय ३ मत प्राप्त गरेका छन् ।

यस्तै, माओवादीका उम्मेदवारले २ हजार ४ सय ६२ मत प्राप्त गर्दा एकीकृत समाजवादीका उम्मेदवारले १ हजार ८ सय ५९ मत प्राप्त गरेका थिए । राप्रपाका उम्मेदवारले १ हजार १६ मत ल्याएका छन् ।

प्रकाशित मिति: शुक्रबार, कात्तिक ४, २०७९ २१:११