योगेशलाई आफ्नैको डर, माओवादी उम्मेदवारलाई गठबन्धनको भर

A+ A A-

स्थानीय चुनावताका एमाले सचिव योगेश भट्टराईको काठमाडौं–ताप्लेजुङ दौडाहा हेर्नलायक थियो । एक दिनअघि काठमाडौं भएका उनी अर्को दिन मोरङ, सुनसरीका कोणसभा भ्याउँदै अर्को दिन ताप्लेजुङ पुगिहाल्थे । पार्टीले टिकट नदिँदै गृहजिल्ला पुगेका भट्टराईले भनेका थिए, ‘टिकट पाए जित्ने हो, नपाए जिताएर फर्किने हो ।’

टिकट वितरणमा एमालेभित्रको अन्तरकलह छिचोल्दै टिकट लिएका उनी अहिले निर्वाचन क्षेत्रमा घरदैलोमा व्यस्त छन् । २०७४ को निर्वाचनमा ताप्लेजुङबाट ‘डेब्यु’ जित हासिल गरेका भट्टराईलाई दोहोरिन यसपटक त्यति सजिलो भने देखिँदैन । उतिबेला आफूलाई सघाएको माओवादी केन्द्रकै उम्मेदवार खेलप्रसाद बुढाक्षेत्री ‘पराग’ले उनलाई चुनौती दिइरहेका छन् ।

२०७४ सालको निर्वाचनमा वाम गठबन्धनका उम्मेदवार भट्टराईले २९ हजार ४ सय ७९ मत ल्याएर विजयी हुँदा कांग्रेसका केशवप्रसाद दाहालले १६ हजार ८ सय ८८ मत प्राप्त गरेका थिए । काठमाडौंबाट चुनाव हारिरहेका भट्टराईलाई गृहजिल्ला ताप्लेजुङले पहिलोपटक सिंहदरबार पठाएको थियो । तर, यसपटक उनी बलियो सत्तारुढ गठबन्धनको सामना गर्दैछन् । त्यसमाथि विभाजनले एमालेको शक्ति क्षयीकरण भएको छ । तैपनि, उनी पार्टी र आफ्नो पपुलर भोट नघटेको दाबी गर्छन् । ‘यसपटक पनि ताप्लेजुङे जनताले मलाई २०७४ कै जस्तो पपुलर भोट दिएर प्रतिनिधि बनाएर पठाउँदैछन्,’ भट्टराईले भने ।

त्यसो त ६ महिनाअघि सम्पन्न स्थानीय निर्वाचनको जनमतले पनि ताप्लेजुङमा एमाले पहिलो शक्तिको रूपमा देखाउँछ । ६१ वडामध्ये एमालेले २९, कांग्रेसले १५, माओवादी केन्द्रले १०, नेकपा एसले २ वडामा जितेको छ भने अन्य चारवटा वडा स्वतन्त्रले जितेका छन् ।

स्थानीय निर्वाचनमा एमालेको २४ हजार २ सय ९५ मत प्राप्त गरेको थियो । त्यस्तै, कांग्रेसले १८ हजार २ सय २४, माओवादीले ४ हजार ४ सय ९७ मत, एसले १ हजार ३ सय ८ मत र जसपाले ९ सय २३ मत ल्याएका थिए । गठबन्धन दलहरू कांग्रेस, माओवादी, एस मात्र होइन, जसपाका वडाध्यक्षहरूको मतसमेत जोड्दा पनि एमाले एक्लैको मत हाराहारीमा छ । पालिका प्रमुखमा भने एमाले खुम्चिएको थियो ।

तर, २०७४ मा एक नगरपालिकासँगै पाँचवटा गाउँपालिका जितेको एमालेले वैशाखमा तीन पालिकामै चित्त बुझाउनुपरेको थियो । गत स्थानीय निर्वाचनमा जिल्लाका ९ वटा स्थानीय तहमध्ये गठबन्धनले छवटा पालिकाको प्रमुख गठबन्धनले जितेको जितेको छ भने एमालेले तीन पालिकाको प्रमुख जितेको थियो । त्यो परिणामलाई गठबन्धनले प्रदेश तथा प्रतिनिधिसभा सदस्य निर्वाचनमा जितको आधार मानेको छ । गठबन्धनका उम्मेदवार बुढाक्षेत्रीले एमालेका भट्टराई मौसमी भएको आरोप लगाउँदै यसपटक उनलाई हराउने दाबी गर्छन् ।

प्रस्तुत छ, ताप्लेजुङमा मुख्य प्रतिस्पर्धी मानिएका एमालेका भट्टराई र माओवादी केन्द्रका बुढाक्षेत्रीसँग शिलापत्रकर्मी रमेश भारतीले गरेको संवादको सम्पादित अंशः

तपाईलाई किन छान्ने ? जित्ने आधार के छ ?

योगेशः म एमालेको सचिव मात्र होइन, ताप्लेजुङको पारिवारिक सदस्यसमेत हुँ । ताप्लेजुङका लागि मैले गरेको काम यहाँका जनताले पक्कै मूल्याकंन गर्छन् । फेरि सत्ता गठबन्धनसँग ताप्लेजुङको विकासको प्रस्ट भिजन पनि म देख्दिनँ ।

मंसिर ४ को निर्वाचनपछि त्यो गठबन्धनबाट प्रधानमन्त्री को हुने भन्ने पनि निश्चित छैन । गठबन्धन चुनावपछि भिजनविहीन छ । जसका कारण ताप्लेजुङमा पनि गठबन्धनसँग मेरो खासै प्रतिस्पर्धा छैन । ताप्लेजुङको विकासलाई एमाले पार्टी र यसको नेतृत्व आवश्यक छ भन्ने यहाँ जनताले बुझेका छन् । त्यही भएर ताप्लेजुङको विकास, रोजगारी सिर्जना र स्वास्थ्य सुधारका लागि एमालेको नेतृत्व आवश्यक छ ।

खेलप्रसादः जनताले अहिले फ्रेस जनप्रतिनिधि चाहेका छन् । नयाँ अनुहार खोजिरहेका छन् । म किसान परिवारबाट आएको छु । मसँग कृषिलाई नयाँ ढाँचामा लैजाने योजना धेरै छन् । निर्वाचित भएँ भने पूरा समय ताप्लेजुङवासीका गाउँघरमा बिताउँछु ।

एमाले सचिव योगेश भट्टराई धेरैपटक निर्वाचनमा होमिनुभएको छ । उहाँले ताप्लेजुङबाट निर्वाचन जितेर गए पनि यो जिल्लाका लागि त्यस्तो उपलब्धि हुने केही काम गर्नुभएन । त्यही भएर योपटक ताप्लेजुङवासीले उहाँको विकल्प खोज्दैछन् । पूर्णकालीन राजनीतिक कार्यकर्ता भएर मैले ताप्लेजुङमै कार्यक्षेत्र बनाएर करिब तीन दशक बिताएको छु, । त्यही भएर मंसिरको निर्वाचनमा मेरो जित निश्चित छ ।

तपाईलाई आफ्नै पार्टी वा गठबन्धन दलका नेता/कार्यकर्ताबाटै सहयोग हुँदैन भनिँदैछ । त्यस्तै हो ?

योगेशः यो सबै गलत प्रचार हो । एमालेभित्र त्यस्तो असहयोग गर्ने भन्ने हुँदैन । ताप्लेजुङमा एमाले आफ्नो पार्टीलाई जिताउन सक्दो प्रयास गर्नेछ र सबै नेता/कार्यकर्ता लागिपरेका छन् । मलाई असहयोग होइन, ताप्लेजुङका एमाले मात्र होइन, सबै कम्युनिस्टहरूले भोट दिन्छन् ।

खेलप्रसादः गठबन्धनमा आबद्ध दलका नेता/कार्यकर्ताले भोट नदिने भन्ने हुँदैन । सबै साझा उम्मेदवार जिताउन लाग्नुभएको छ । किनभने, ताप्लेजुङले अहिलेसम्म स्थिर नेता पाएको छैन । यो जिल्लाले अतिथि नेता पाएकै कारण विकासमा हामी पछाडि पर्‍यौँ । त्यही भएर यहाँका जनताले ताप्लेजुङको विकासका लागि मात्र होइन, यहाँका समस्या समाधान गर्ने नेता खोजिरहेका छन् । योगेशजी त ताप्लेजुङका लागि मौसमी नेता हुन् ।

उनले २०७४ को निर्वाचनमा माओवादीकै सहयोग र आशीर्वादले सांसद हुने मौका पाए । जितेपछि ताप्लेजुङलाई पाहुना घरजस्तो आउने ठाउँ मात्र बनाए । त्यही भएर योपटक उनलाई ताप्लेजुङवासीले यसपटक रोक्छन् ।

सांसद भएर योगेशजीले के गर्नुभयो ? तपाईंहरूका अबका एजेण्डा के छन् ?

योगेशः कोसी कोरिडोर प्रसारण लाइन आयोजनामार्फत तुम्लिङटारदेखि वसन्तपुरसम्म करिब १ हजार मेगावाट, ढुंगेसाँघु (ताप्लेजुङ) देखि वसन्तपुरसम्म करिब १ हजार मेगावाट र वसन्तपुरदेखि इनरुवासम्म करिब २ हजार मेगावाट विद्युत प्रसारण जोडिएको छ । चीन, नेपाल र भारतलाई जोड्ने प्रदेश नं १ को मुख्य रणनीतिक योजनामा सरकारले अगाडि बढाएको यस राजमार्गको निर्माण कार्य भइरहेको छ । यस्तै, उत्तरी छिमेकी मुलुक चीनको सिमाना टिपताला भञ्ज्याङदेखि विराटनगर रानीसम्मको २७५ किलोमिटरको राजमार्ग (तमोर कोरिडोर) निर्माण भइरहेको छ । यसका लागि पनि मैले संसद्‌मा पटक–पटक आवाज उठाएको थिएँ ।

सांसद विकास कोष तथा साविकको ओलाङ्चुङगोला गाविसको अनुदान र स्थानीयको सहयोगले टिपताला हुँदै ओलाङचुङगोलासम्मको २१ किलोमिटर ट्रयाक खोलिएको छ । ताप्लेजुङसँग जोडिएका सिमानासमेत खोल्नका लागि मैले यहाँको संसद् भएका नाताले पहल गर्दै आएको छु । ताप्लेजुङको सडक निर्माण, पर्यटन विकास र अन्य विकासका साझेदारी काममा मैले प्रयास गरेँ ।

विशेषगरी कञ्चनजंघा, तिम्बुङ पोखरी, पाथीभरा, तोक्पेगोला तथा ओलाङचुङगोला क्षेत्रमा वन्यजन्तु तथा चराचुरुङ्गी संरक्षणका लागि मैले पाँचै वर्ष प्रयास गरेँ । ताप्लेजुङमा धार्मिक दृष्टिले अत्यन्त महत्त्वपूर्ण मानिएको पाथिभरा देवी पनि यसलाई दोस्रो पशुपति मानिन्छ । यसको विकास र व्यवस्थितका लागि प्रयास हुनेछ ।

ताप्लेजुङमा महत्त्वपूर्ण जडीबुटीहरू अत्यधिक रूपमा पाइन्छन् । जडीबुटी उत्पादन बढाउन, अलैँची जोन र कृषिक्षेत्र सुधार्न नयाँ योजनाका साथ काम गर्नेछु । दुर्लभ चराचुरुङ्गी, वन्यजन्तुको संरक्षणसँग पर्यटनलाई तान्ने आकर्षण बनाउने योजना छ ।

खेलप्रसादः म ताप्लेजुङमै जन्मिएँ, ताप्लेजुङमै हुर्किएँ, जीवनको धेरै लामो समय यहीँ बिताएँ । जनतालाई समस्या पर्दा म उहाँहरूसँगै थिएँ, छु र हुनेछु । शिक्षा, स्वास्थ्य, पर्यटन, कृषि, सिँचाइ, जडीबुटीलगायतको विकास गर्ने तथा सार्वजनिक सेवा सुविधा सुधार गर्ने मेरो योजना छ ।

म आफैँ कृषक हुँ । ताप्लेजुङमा किबी फलको खेती भित्र्याउने मै हुँ । यहाँको कृषिक्षेत्रका समस्या मलाई जानकारी छ । यहाँका थुप्रै भूमिमा सिँचाइको सुविधा पुगेको छैन । किसानहरू समस्यामा छन् । त्यसको पनि समाधान गर्नुपर्नेछ । कृषिको उत्पादन बढाएर प्रशोधन र बजारीकरणको उपयुक्त व्यवस्था मिलाउने आफ्नो एजेन्डा छ ।

प्रकाशित मिति: शुक्रबार, कात्तिक ४, २०७९ २०:००