नवौँ राष्ट्रिय खेलकुदमा विभागीय टिमको दबदबा, तेस्रोपटक च्याम्पियन बन्यो आर्मी

नवौँ राष्ट्रिय खेलकुदमा विभागीय टिमको दबदबा, तेस्रोपटक च्याम्पियन बन्यो आर्मी

A+ A A-

विभागीय त्रिभुवन आर्मी क्लब नवौँ राष्ट्रिय खेलकुदको च्याम्पियन बनेको छ । गण्डकी प्रदेशमा बिहीबार साँझ सम्पन्न नवौँ राष्ट्रिय खेलकुदमा सर्वाधिक पदक जित्दै आर्मी च्याम्पियन बनेको हो ।

आर्मी १७२ स्वर्ण, ११० रजत र ८९ कास्य गरि कुल ३७१ पदक जित्दै च्याम्पियन बनेको हो । आर्मी लगातार तेस्रो पटक च्याम्पियन बनेको हो । सातौँदेखि आर्मी लगातार टिम च्याम्पियन रहँदै आएको छ । पछिल्लो दुई संस्करण जस्तै शीर्ष ३ मा विभागीय टोली रहे ।

अर्को विभागीय टिम नेपाल एपीएफ क्लब ६५ स्वर्ण, ७३ रजत र ८१ कास्य गरी कूल २१९ पदक जित्दै दोस्रो स्थानमा रहेको छ । नेपाल पुलिस क्लबले कुल १ सय ९५ पदक जितेको छ । जहाँ पुलिस ६१ स्वर्ण, ६१ रजत र ७३ कास्य पदक जित्दै तेस्रो बनेको हो । गण्डकी प्रदेश चौथो स्थानमा रह्यो । गण्डकीले १२० पदक जित्ने क्रममा ३२ स्वर्ण, ३१ रजत र ५७ कास्य आफ्नो पोल्टामा पारेको हो ।

बागमती प्रदेश २४ स्वर्ण, ४७ रजत र ७४ कास्य गरी १४५ पदक जित्दै पाँचौँ स्थानमा रहन सफल भयो । प्रदेश १ अंकतालिको छैटौं स्थानमा रह्यो । प्रदेश १ ले १० स्वर्ण, २३ रजत र ५० कास्य गरि कुल ८३ पदक जितेको छ । सातौं स्थानको सुदूरपश्चिम प्रदेशले १० स्वर्ण र १० रजत र ४३ कास्य गरि कुल ६३ पदक जितेको छ ।

आठौँ स्थानमा रहेको एनआरएनएले १० स्वर्ण, ९ रजत र ७ कास्य गरि कुल २६ पदक जित्न सफल भयो । नवौं स्थानको लुम्बिनी प्रदेशले ६ स्वर्ण, २२ रजत र ४० कास्य गरि ६८ पदक जितेको हो । दशौं स्थानमा रहेको मधेस प्रदेशले ५ स्वर्ण, ८ रजत र २६ कास्य गरि ३९ पदक जित्दा कर्णाली प्रदेशले २ स्वर्ण, ४ रजत र १२ कास्य गरि कुल १८ पदक जितेको छ ।

कर्णाली प्रदेशले १०औँ राष्ट्रिय खेलकुद प्रतियोगिताको आयोजना गर्ने जिम्मा पाएको छ । २०८१ सालको मंसिर २ देखि ९ गतेसम्म कर्णाली प्रदेशमा १०औँ राष्ट्रिय खेलकुद प्रतियोगिता हुनेछ ।