सूर्यविनायकमा देउवाकाे त्याे भाषण ! ...अनि भक्तपुर २ मा महेश–दुर्लभकाे भिडन्त

सूर्यविनायकमा देउवाकाे त्याे भाषण ! ...अनि भक्तपुर २ मा महेश–दुर्लभकाे भिडन्त

A+ A A-

गत साल भदौ १८ को कुरा हो । भक्तपुर, सूर्यविनायकमा भएको कांग्रेस वडा अधिवेशनमा शेरबहादुर देउवाले भक्तपुर–२ का तत्कालीन सांसद महेश बस्नेतलाई आउने चुनावमा जितेर देखाउन ठाडो चुनौती दिए । ‘सक्नुहुन्छ भने भक्तपुरबाट हाम्रो पार्टी सभापति दुर्लभ थापालाई हराएर देखाउनुस्’, उनले भने ।

बस्नेतले भक्तपुरको एक कार्यक्रममा अब कांग्रेसलाई खोज्नुपर्ने बेला भएको भन्दै देउवालाई आफूसँग चुनाव लड्न आह्वान गरेपछि उनले यस्तो चुनौती दिएका थिए ।

नभन्दै आसन्न चुनावमा देउवाले चाहेझैँ भक्तपुर–२ मा नेकपा एमालेका महेश बस्नेत र कांग्रेसका दुर्लभ थापाबीच टकराव हुने भएको छ । भक्तपुर– २ मा एमाले र सत्ता गठबन्धनका तर्फबाट कांग्रेस जिल्ला सभापति दुर्लभ थापाबीच मुख्य प्रतिस्पर्धा हुने भएको हो ।

भक्तपुर– २ को उम्मेदवारी महेश बस्नेतका लागि नौलो भने होइन । यसअघि नै उनले यसै क्षेत्रबाट आफूलाई दुईपटक परीक्षण गराइसकेका छन् । २०७० को संविधानसभा निर्वाचनमा कांग्रेसका रामेश्वर ढुंगेल र नेपाल मजदुर किसान पार्टी (नेमकिपा)सँग पराजित भई १६ हजार २९ मत ल्याएर तेस्रो स्थानमा सीमित भएका बस्नेतले गएको २०७४ को चुनावमा भने फड्को मारे । १८ हजार २९ मत ल्याएका कांग्रेसका दमननाथ ढुंगानालाई पराजित गर्दै बस्नेतले दोब्बर मत अर्थात् ३६ हजार ४ सय १२ मत ल्याएर विजयी भए ।

यद्यपि २०७४ सालमा बस्नेतले वाम गठबन्धनको साथ र कांग्रेसबाट भएको कमजोर उम्मेदवारीको फाइदा उठाउँदै दोब्बर मतले निर्वाचित भएको टिप्पणी हुने गर्छ । हुन पनि गएको चुनावमा ‘टुरिस्ट’ उम्मेदवारको रूपमा कांग्रेसले ढुंगानालाई उठाएको थियो । त्यसैले यसपटक कांग्रेसले भक्तपुर–२ मा स्थानीयवासी एवम् जिल्ला सभापति थापालाई उठाएर बलियो प्रतिस्पर्धीलाई अगाडि सारेको आकलन गरिएको छ ।

गठबन्धन भर्सेस एमाले

गएको चुनावमा दोब्बर मतले विजयी भएका बस्नेतका लागि थापा चुनौतीका रूपमा देखिएका छन् । भक्तपुर–२ कांग्रेसको पकड क्षेत्र भएको थापा बताउँछन् । यहाँ कांग्रेसले २०४८, २०५६ र २०७० को चुनाव गरी तीनपटक जितिसकेको छ । २०५१ र २०६४ मा दुईपटक भने नेमकिपाले जितेको हो । प्रत्येकपटक कांग्रेसले नयाँनयाँ उम्मेदवार उठाउँदा पनि कांग्रेसले जित्ने गरेको थापा बताउँछन् । साथै, गठबन्धनअन्तर्गत माओवादी केन्द्र र नेकपा एकीकृत समाजवादीको साथ भएकाले पनि आफ्नो जित्ने आधार बलियो भएको उनले बताए ।

यद्यपि थापाको तर्कसँग सहमत छैनन् महेश । ‘गठबन्धन हाम्रा लागि खासै चुनौती हुन्छ जस्तो मलाई लागेको छैन । गठबन्धनभित्रै अन्तर्विरोधको समस्या छ । उनीहरूभित्रै मत विवादित छ’, उनले भने । गएको चुनावमा दोब्बर मतले जितेका बस्नेत यसपटक तेब्बर मतले जित्ने दाबी गर्छन् । ‘४५ हजारभन्दा बढी भोट ल्याउने अनुमान गरेको छु’, उनले भने, ‘कांग्रेसका दुर्लभ थापालाई प्रतिस्पर्धीको रूपमा मैले लिएकै छैन ।’

त्यसो त थापा पनि बस्नेत आफ्ना लागि चुनौती नभएको दाबी गर्छन् । ‘मेरो लागि चुनौती यहाँको भ्रष्टाचार, अशिक्षा, बेरोजगारी, स्वास्थ्यका समस्या, विकास निर्माणका समस्या हुन् । एउटा व्यक्ति मेरो लागि चुनौतीको रूपमा खडा हुनै सक्दैन’, उनले भने ।

२०७० सालमा कांग्रेसका रामेश्वर ढुंगेलसँग पराजित भएका बस्नेतले आसन्न चुनावमा ‘चुरीफुरी’ देखाउनुको कुनै तुक नभएको थापा बताउँछन् । गएको चुनावमा विभिन्न शक्ति केन्द्र हावी भएर कांग्रेसबाट ‘टुरिस्ट’ उम्मेदवार उठाइएकै कारण जनता रुष्ट भएर बस्नेतलाई भोट हाल्न पुगेको उनी दाबी गर्छन् । ‘अब त्यस्तो हुँदैन । मिडियाबाजी गर्ने, पिच रोड देखाएर, ड्रोन उडाएर विकास हुँदैन, डुबानमा परेको बस्ती पनि देख्नुपर्‍यो’, उनले भने ।

हाल मतदाताको घरदैलोमा सक्रिय बस्नेत भने आफ्नो चुनावी माहौल उत्साहजनक रहेको बताउँछन् । आफू जनतामाझ पुनः भोट माग्दा कुनै अपजस र असन्तुष्टि सुन्न नपरेको दाबी गर्छन् उनी । ‘त्यसैले म यतिखेर विपक्षी दलका जनतासँग भेटघाट गरिरहेको छु’, आफ्नो चुनावी अभियानलाई नै परिवर्तन गरेको उनले बताए । ‘मेरा मतदाता निकै उत्साहित र सन्तुष्ट पाएको छु’, उनले भने ।

सुगममा रहेर पनि विकासको दृष्टिकोणले पछाडि परेको भक्तपुरलाई सिंहदरबारसँग जोड्ने नारा बस्नेतले २०७४ को चुनावमा लगाएका थिए । यसपटक पनि उनले ‘भक्तपुरले सिंहदरबारमा नेतृत्व गर्ने’ नारालाई नै अगाडि सारेका छन् । भक्तपुरको आवाजलाई सघन र राष्ट्रिय राजनीतिमा मुखरित गर्न नसकेकै कारण आफूले यस्तो नारा लिएको उनले बताए । गएको कार्यकालमा बस्नेतले त्यस्तो के गर्न सकेनन् र यसपटक पनि उम्मेदवारी दिन आवश्यक ठाने त ?

‘चलनचल्तीका बाटो, पुल, स्कूल, अस्पताल, खानेपानीका धेरै काम भएका छन्’, उनले भने, ‘तर सबै काम सकिएको छैन । खानेपानीको आयोजना ९० प्रतिशत सकिएको छ । बाँकी मनोहरा करिडोर, पानी उद्यान, कमिसन हल, स्मार्ट सिटीमा पनि काम गर्नु छ ।’

दुर्लभ पनि आफ्नो एजेन्डा स्पष्ट भएको दाबी गर्छन् । मठमन्दिर, कलासंस्कृति, सम्पदा, जात्रा, मूर्त/अमूर्त सम्पदाले भरिपूर्ण भक्तपुरलाई सांस्कृतिक र पर्यटकीय शहरका रूपमा विकास गर्नुका साथै भौतिक पूर्वाधारमा काम गर्ने योजना रहेको थापाले बताए ।

‘म यस क्षेत्रको लोकप्रिय समाजसेवी हुँ । सधैँ ब्याकअपमा बसेर जनतासँग रहेर म काम गरिरहेको छु’, तीन दशकदेखि आफू सक्रिय रहेको बताउँदै उनले लोकप्रिय मत पाउने दाबी गरे ।

एमालेकाे युवा संघ नेपालबाट राजनीतिक करियर सुरु गरेका बस्नेत २३ वर्षकै उमेरमा भक्तपुरको गुन्डु गाविसका अध्यक्ष बनेका हुन् । यद्यपि एमालेभित्रै पनि ‘गुन्डागर्दी’को छवि बनाएका बस्नेत विवादबाट टाढा भने हुन सकेका छैनन् । २०७० को चुनावमा हार्दाहार्दै पनि ओलिनिकट रहेका बस्नेत सुशील कोइराला सरकारको पालामा उद्योगमन्त्री बनेका थिए ।

आकलन गर्नै मुस्किल

भक्तपुर– २ अन्तर्गत सूर्यविनायक नगरपालिका र मध्यपुर थिमि नगरपालिका पर्छन् । गएको स्थानीय चुनावमा सूर्यविनायकमा एमालेले प्रमुख, उपप्रमुखसहित वडा–१, ५, ७, ८ र १० र कांग्रेसले २, ३, ४, ६ र ९ मा जितेको थियो । मध्यपुर थिमिमा सत्ता गठबन्धनबाट कांग्रेसले प्रमुख र माओवादीले उपप्रमुखमा जितेका छन् । वडा नं १, २, ३, ५, ६ र ९ कांग्रेसले जित्दा ४ र ७ मा मात्रै एमालेले जितेको थियो । वडा–८ मा भने नेमकिपाले जितेको थियो । यस अर्थमा हेर्दा यो क्षेत्रमा मुख्य प्रतिस्पर्धा सत्ता गठबन्धन र एमालेबीच हुने देखिन्छ ।

नेमकिपाले दुईपटक जितेको यस क्षेत्रमा नेमकिपाको भूमिकालाई पनि नजरअन्दाज गर्न नमिल्ने अनुमान गरिन्छ । तर, गएको २०७४ को चुनावमा ५ हजार ४ सय ७१ मत ल्याई तेस्रो स्थानमा सीमित भएकी नेमकिपाकी उम्मेदवार अनुराधा थापा मगरलाई पुनः पार्टीले उठाउँदा मतपरिणाममा तात्त्विक भिन्नता देखिने छाँटकाँट छैन । तसर्थ भक्तपुर–२ को चुनाव जति रोचक हुने देखिन्छ, त्यति नै आकलन गर्न मुस्किल देखिन्छ । यस क्षेत्रमा कुल २६ उम्मेदवार छन् ।

प्रकाशित मिति: शुक्रबार, कात्तिक ४, २०७९ ०६:१५