गठबन्धनभन्दा एमाले बलियो देखिएको काठमाडौं ५ मा ईश्‍वरलाई प्रदीपकाे टक्कर

A+ A A-

काठमाडौं निर्वाचन क्षेत्र नम्बरबाट ५ मा प्रत्यक्षबाट प्रतिनिधिसभा छिर्नका लागि २९ जना उम्मेदवार कस्सिएका छन् । बसाइ सरेर आएका मतदाताको बाहुल्यता रहेको याे क्षेत्रमा उम्मेदवारहरू पनि 'बाहिर'बाटै आएकाहरू धेरै छन् ।

राजनीतिमा स्थापित र परिचित मात्रै होइन, प्रध्यापन पेसा र अन्य क्षेत्रमा परिचित अनुहारले पनि चुनाव जित्न कम्मर कसेका छन् । मुख्य प्रतिस्पर्धीका रूपमा २०७४ को निर्वाचनमा निर्वाचित एमाले वरिष्ठ उपाध्यक्ष ईश्‍वर पोखरेल र सत्तारुढ गठबन्धन (कांग्रेस, माओवादी केन्द्र, नेकपा एस र राष्ट्रिय जनमोर्चा) का प्रदीप पौडेल देखिएका छन् ।

यस्तै, २०७४ को स्थानीय तहको निर्वाचनमा काठमाडौं महानगरपालिकाकाे मेयरमा २३ हजार बढी मत ल्याएकी रञ्जु दर्शना, प्राध्यापक गोपीलाल न्यौपाने पनि यही निर्वाचन क्षेत्रबाट उम्मेदवार बनेका छन् ।

अरु उम्मेदवारभन्दा पोखरेल, पौडेल र रञ्जुकाे चर्चा बढी देखिएकाे छ । देशभर नै सत्ता गठबन्धन र एमालेबीच मुख्य प्रतिस्पर्धा मानिएकोमा यो क्षेत्रमा पनि यस्तै देखिएकाे छ । तर, दर्शनालगायतका स्वतन्त्र उम्मेदवारकाे प्रवेशले चुनावी प्रतिस्पर्धा राेचक हुने देखिएकाे छ ।

यद्यपि ५ महिनाअघिकाे स्थानीय तहको चुनावमा आएको मतपरिणामलाई हेर्ने हो भने यो क्षेत्रमा एमाले नेता ईश्‍वर पोखरेल बलियो देखिन्छन् । याे क्षेत्रमा पर्ने काठमाडाैं महानगरका चार, बूढानीलकण्ठ र टाेखा नगरपालिकाका १५ वडामध्ये ११ मा वडाध्यक्षसहित एमालेले जितेकाे थियाे । एमालेका वडाध्यक्षका उम्मेदवारले १९ हजार ७ सय ३ मत पाएका थिए । कांग्रेसले १४ हजार ८ सय ५३ मत पाउँदा सत्ता गठबन्धनका दल नेकपा माओवादी केन्द्रकाे मत १ हजार ८ सय २७ छ भने नेकपा एकीकृत समाजवादीकाे १ हजार १ सय ६१ मत छ । त्याे मत जाेड्दा गठबन्धनकाे मत १७ हजार ८ सय ८४ हुन्छ ।

गठबन्धनभन्दा एमाले १ हजार ८ सय १९ मतले अगाडि देखिएकाे छ । याे स्थानीय तहकाे चुनावमा यी दलका वडाध्यक्षले पाएकाे मत हाे । तर ४ मंसिरकाे चुनावमा पनि यही मत कायम रहन्छ भन्ने कुनै ग्यारेन्टी छैन ।

कांग्रेस उम्मेदवार पौडेल यो क्षेत्रमा कार्यकर्ता शैलीका भन्दा पनि बौद्धिक मतदाता भएकाले केही समयमा नै मतको प्यार्टन परिवर्तन हुन सक्ने विश्‍वास गर्छन् । 'यही क्षेत्रबाट कांग्रेसका बौद्धिक नेता नरहरि आचार्य विजयी हुनुभएको थियो, आवधिक निर्वाचनमा काम र जनतासँगको सामिप्यताको आधारमा मत तलमाथि पर्छ', पौडेलले भने, 'यो क्षेत्रमा उम्मेदवारको योग्यता र दक्षतालाई हेरर मतदान गर्छन् । अहिले मैले राख्ने एजेण्डा हिजो राष्ट्रिय राजनीतिमा मैले खेलेको भूमिकालाई हेरेर मतदान गर्ने भएको कारण मलाई असहज छैन ।'

पार्टीकाे प्रभाव र आफ्नो कामको कारणले नै यो क्षेत्रमा सहज रहेको दाबी एमाले उम्मेदवार पोखरेलको छ । उनी पनि उम्मेदवारको योग्यता र क्षमता हेरेर नै यो क्षेत्रका मतदाताले मत दिने हुँदा आफ्नो लागि लाभकाे अवस्था रहेको बताउँछन् । 'निर्वाचन प्रतिस्पर्धाको कुरा हो । पूर्ण रूपमा सचेत छु', पोखरेलले शिलापत्रसँग भने, 'जनताको सचेतना, एमालेकाे प्रभाव र त्यो क्षेत्रको सुखदु:खमा निरन्तर खटिएको र निष्ठाको राजनीतिमा लागिरहेको छु, प्रतिस्पर्धाका लागि मलाई सहज छ ।'

काठमाडौं– ५ मा काठमाडौं महानगरपालिकाकाे वडा २, ३, ४ र ५, बूढानीलकण्ठ नगरपालिकाको वडा ३,४,५,६ र ७ का साथै टोखा नगरपालिकाको २,३,४,५, ६ र ७ वडा पर्छन् । यी तीनवटा नगरपालिकामा प्रमुखको नतिजा हेर्ने हो भने दुईवटा नगरपालिकामा एमाले र महानगर प्रमुखमा स्वतन्त्र उम्मेदवार विजयी भएका छन् । वडाध्यक्षको चुनावी परिणाम हेर्ने हाे भने पनि एमाले बलियो देखिन्छ । एमालेले ११ वटा वडा जितेको छ । कांग्रेसले तीनवटा र स्वतन्त्रले दुईवटा वडा जितेका छन् ।

वडाध्यक्ष पदमा प्राप्त मत

एमाले : १९ हजार ७ सय ३
कांग्रेस : १४ हजार ८ सय ५३
राप्रपा : २ हजार ८ सय २२
माओवादी : १ हजार ८ सय २७
नेकपा एस : १ हजार १ सय ६१
स्वतन्त्र : ७ सय ८१
अन्य : ४ सय ७१

दलका उम्मेदवार एक्ला एक्लैले पाएकाे मतका आधारमा एमाले निकै बलियो छ । दोस्रो हुने कांग्रेससँग तुलना गर्ने हो भने पनि एमालेले प्राप्त गरेकाे मत ५ हजारभन्दा बढी छ ।

सत्तारुढ दलहरूले प्राप्त गरेकाे मतभन्दा पनि एमालेकाे मत ज्यादा छ । अहिलेकाे स्थिति ४ मंसिरमा दाेहाेरिँदा एमालेले चुनाव जित्न सक्छ । तर, निर्वाचनमा उम्मेदवारकाे व्यक्तित्वले पनि अर्थ राख्छ । रञ्जु दर्शनालगायतका स्वतन्त्र उम्मेदवारले कति मत पाउँछन् र उनीहरूले पाउने मतले कसलाई नाेक्सान हुन्छ, त्याे अहिले नै भन्न सकिने अवस्था छैन । त्यसैले पनि काठमाडाैं ५ मा प्रतिस्पर्धा राेचक नै हुने देखिएकाे छ ।

प्रकाशित मिति: शुक्रबार, कात्तिक ४, २०७९ १२:२३