नेमकिपाकाे किल्ला ताेड्ने कसरतमा एमाले र गठबन्धन, प्रेम सुवाललाई दाेहाेरिन कति सहज ?

नेमकिपाकाे किल्ला ताेड्ने कसरतमा एमाले र गठबन्धन, प्रेम सुवाललाई दाेहाेरिन कति सहज ?

A+ A A-

भक्तपुर- १ त्यस्तो क्षेत्र हो, जहाँ प्रजातन्त्र प्राप्तिपछि भएका हरेक चुनावमा नेपाल मजदुर किसान पार्टी (नेमकिपा) ले जित्दै आएको छ । २०४८ यताका सबै संसदीय चुनावमा यो क्षेत्रबाट नेमकिपाका उम्मेदवार विजयी हुँदै आएका छन् ।

यो क्षेत्रबाट २०४८, २०५१, २०५६, २०६४ र २०७० को चुनावमा नेमकिपा अध्यक्ष नारायणमान बिजुक्छेँ (रोहित) निर्वाचित भएका थिए । त्यसपछि उनले संसदीय राजनीतिबाट सन्यास लिए ।

२०७४ को चुनावमा नेमकिपाले यो क्षेत्रबाट पार्टी सचिव प्रेम सुवाललाई प्रतिनिधिसभाको उम्मेदवार बनायो । नेमकिपाले उम्मेदवार परिवर्तन गरेर चुनाव लडे पनि यो क्षेत्रबाट नेमकिपा नै विजयी भयो ।

विजुक्छेँले लगातार चुनाव जितेको क्षेत्र भए पनि उम्मेदवार परिवर्तन भएपछि सुवालले पार्टीको विरासत जोगाउलान् कि नजोगाउलान् भन्ने प्रश्न पनि नउठेको होइन । तर, सुवालले झण्डै दोब्बर मतले कांग्रेसका बाबुराजा जोशीलाई पराजित गरे ।

प्रेम सुवाल

सुवालले ३३ हजार ७६ मत प्राप्त गर्दा जोशीले १७ हजार ८ सय १८ मत ल्याएका थिए । तत्कालीन वाम गठबन्धनका मिलन सुवाल १५ हजार ३ सय ७४ मतमा सीमित भए ।

यसपटक पनि नेमकिपाले ६२ वर्षीय सुवाललाई नै दाेहाेर्‍याएर चुनावी मैदानमा उतारेको छ ।

नेमकिपाको किल्लाका रूपमा परिचित भक्तपुर-१ मा सत्ता गठबन्धनबाट माओवादी केन्द्रका सुनील गोठे प्रतिनिधिसभाका उम्मेदवार छन् । नेकपा एमालेबाट जिल्ला समन्वय समितिका निर्वतमान प्रमुख नवराज गेलाल चुनावी मैदानमा उत्रिएका छन् ।

नेमकिपाबाट उम्मेदवारी दिएका प्रेम सुवाल आफ्नो जित पक्का भएको दाबी गर्छन् । ‘हामीले इमानदारिताका साथ जनातासँग जनताका लागि काम गरिरहेका छौँ,’ सुवाल भन्छन्, ‘बहुदल आएदेखि नेमकिपाले जित्दै आएको छ । हामीलाई जनताले राम्ररी चिनेका छन् ।’

सत्तारुढ गठबन्धनबाट आएको उम्मेदवारीले समेत आफूलाई चुनौती दिन नसक्ने सुवालले दाबी गरे । ‘यस्तो सिद्धान्तविहीन गठबन्धन पुँजीवादी सरकारको भागवण्डा गर्ने चाँजोपाँजो मात्रै हो । यस्तो गठबन्धनलाई अबका दिनमा जनताले विश्वास गर्ने छैनन्’, उनले भने ।

सुनील गोठे

तर, सत्ता गठबन्धनको तर्फबाट माओवादी केन्द्रका उम्मेदवार सुनील गोठे भने यसपटक भक्तपुरमा नेमकिपाको विरासत भत्काएर आफू निर्वाचित हुने दाबी गर्छन् । गठबन्धनको साथ पाएकाले आफूले चुनाव जित्ने उनको भनाइ छ ।

हालसम्म नेमकिपाले भौतिक पूर्वाधारमा काम नगरेको भन्दै आफ्नो उम्मेदवारी नीतिगत परिवर्तन र राष्ट्रिय बजेटमा जनतालाई पहुँचको विस्तार गर्न केन्द्रित हुने उनले बताए । ‘मेरो उम्मेदवारी कसैका विरुद्ध र प्रतिस्पर्धाका लागि होइन । गणतन्त्रलाई संस्थागत गर्नका लागि हो’, उनले भने । युवा पुस्ता राजनीतिमा होमिएको बेला चुनावी प्रतिस्पर्धामा पहिलेको स्वरुपले काम नगर्ने उनको तर्क छ ।

उता एमालेका उम्मेदवार रहेका गेलाल पनि चुनाव जित्ने लक्ष्यसहित प्रचारप्रसारमा उत्रिसकेका छन् । जनताले भक्तपुरमा नयाँ अनुहार खोजीरहेकाले आफूले चुनाव जित्ने उनको तर्को छ ।

तर, ६ महिनाअघिको स्थानीय चुनावमा यो क्षेत्रमा नेमकिपाले प्राप्त गरेको मत हेर्दा एमाले र सत्तारुढ गठबन्धनलाई नेमकिपाका उम्मेदवारलाई टक्कर दिन नै चुनौती देखिएको छ । तैपनि, प्रतिस्पर्धी उम्मेदवारले आशा भने मारिसकेका छैनन् ।

नवराज गेलाल

एमालेका उम्मेदवार गेलाल भन्छन्, ‘हामी योबीचमा मतदाताको घरघरमा पुगेका छौँ । सबैको कुरा सुन्दा जनता यसपटक नयाँ प्रतिनिधिलाई संसदमा पठाउँदैछन् । त्यो एमालेको उम्मेदवार हुनेछ ।’

बीसको दशकदेखि नै कृषि आन्दोलन, मोहियानी हक सुरक्षा आन्दोलन, बाली काट्ने आन्दोलनको नेतृत्व गर्दै स्वास्थ्य, शिक्षा, सम्पदा संरक्षमा प्रमुख भूमिका निभाउँदै आएको नेमकिपाको विरासतमा गठबन्धन कत्तिको चुनौती बन्न सक्छ ? त्यो भने हेर्न बाँकी नै छ ।

भक्तपुर–१ अन्तर्गत भक्तपुर नगरपालिका र चाँगुनारायण नगरपालिका पर्छ । गएकाे स्थानीय चुनावकाे मतपरिणामअनुसार भक्तपुर नगरपालिकामा नेमकिपाकाे प्रभाव बलियाे भए पनि चाँगुनारायण नगरपालिकामा भने कांग्रेस र एमालेकै वर्चश्व छ ।

प्रकाशित मिति: बुधबार, कात्तिक २, २०७९ २०:२८