कांग्रेस सहमहामन्त्री डिनालाई प्रश्न : यो चुनाव पनि नजिते के गर्नुहुन्छ ?

A+ A A-

नेपाली कांग्रेसकी सहमहामन्त्री महालक्ष्मी उपाध्याय ‘डिना’ मकवानपुरको प्रतिनिधिसभा क्षेत्र नम्बर १ बाट उम्मेदवार बनेकी छन् । यसअघिका तीनवटा संसदीय निर्वाचनमा पराजित डिना प्रत्यक्ष निर्वाचन जित्न नसके पनि पार्टीको समानुपातिकबाट दुईपटक संसद् छिरेकी छन् ।

राज्यमन्त्रीसमेत भइसकेकी उनी २०४८, २०५१ र २०७४ सालको निर्वाचनमा मकवानुपर क्षेत्र नम्बर २ बाट कम्युनिस्ट उम्मेदवारसँग पराजित भएकी थिइन् । कम्युनिस्टको गढ मकवानपुरको संसदीय राजनीतिमा निरन्तर पराजित भए पनि कांग्रेसको राजनीतिमा भने डिनाले छलाङ मार्दै आएकी छन् । मकवानपुरकी डिनाले पार्टीमा भने अवसर र भूमिका पाइरहिन् ।

१४औँ महाधिवेशनबाट कांग्रेसको उपल्लो तह अर्थात् सहमहामन्त्रीमा निर्वाचित भएपछि डिनाको राजनीतिक उचाइ झन् बढेको छ । उनै डिना आगामी ४ मंसिरमा हुने प्रतिनिधिसभा निर्वाचनमा मकवानपुर–१ बाट उम्मेदवार छिन् । उनको प्रतिद्वन्द्वीमा एमालेबाट राप्रपा नेपालका अध्यक्ष अध्यक्ष कमल थापा र राप्रपाबाट दीपकबहादुर सिंह छन् । हेभिवेट नेताहरूबीचको भिडन्तमा रहेकी डिनासँग निर्वाचनको गतिविधि, ऐजेन्डा र आगामी राजनीतिक जीवनबारे शिलापत्रकर्मी नवीन तिमल्सिनाले कुराकानी गरेका छन् ।

निर्वाचनमा होमिनुभएको छ, चुनाव जित्ने एजेन्डा के छन् ?

उम्मेदवार भएको छु । यसअघि संसदमा बसेर धेरै काम गर्ने अवसर पाएँ । राज्यमन्त्री भएर काम पनि गरेँ । यसबीचमा जनताको अपेक्षा डिनाले चुनाव जितोस् र हाम्रो काम गरोस् भन्ने छ । मैले यसअघि चुनाव हारेर पनि निरन्तर जनताकै काम गरेर हिँडेको थिएँ । मकवानपुरका जनताको आशा र भरोसा बन्दै पार्टीका साथीहरूको विश्वास जितेको छु । म प्रत्यक्षमा चुनाव लड्दैछु भन्दा एउटा ऊर्जा देखिएको छ । मैले सांसद मात्रै बन्न उम्मेदवारी दिएको हैन । सांसद बन्नकै लागि भए समानुपातिकको पहिलो नम्बरमा बस्थेँ । प्रत्यक्ष निर्वाचन जितेर जनताको विश्वास जित्ने मेरो अभिप्राय हो । मलाई सबैको माया प्राप्त भएको छ ।

तपाईंले प्रत्यक्ष निर्वाचन जितेर मकवानपुर क्षेत्र नम्बर १ र यहाँका जनताले के पाउँछन् ?

मैले १ नम्बर क्षेत्रमा धेरै कामहरू गरेको छु । राईगाउँदेखि मकवानपुरगढी, बकैया, हेटौँडासम्मका धेरै समस्याहरू मैले महसुस गरेको छु । यस क्षेत्रका महिलाहरूको समस्या नजिकबाट नियाल्दै निरन्तर काम गरेको छु । मैले सुरुवातदेखि नै महिलाहरूको शिक्षा र स्वास्थ्यको विषयमा कुरा उठाउँदै आएको हुँ । गर्वका साथ भन्छु, मकवानपुरमा पहिलोपटक २०४६ सालको जनआन्दोलनपछि जिल्लाका महिलाहरूलाई प्रौढ शिक्षा दिन संस्था स्थापना गरेर काम गरेको थिएँ, रेकर्ड पल्टाएर हेर्न सक्नुहुन्छ । अहिले मान्छेको आवधारणा फेरिएको छ । विकास भनेको सडक, डोजर मात्रै हैन । विकास भनेको जनताको जीवन पद्धतिकाे विकास पनि हो । स्वास्थ्य, शिक्षा, रोजगारमा सहज र सरल पहुँच नै जीवन पद्धतिको विकास हो । यस कारण मूल उद्देश्य भनेको सडकको मात्रै निर्माण हैन, जनविकासको पक्षमा भएका काम मैले धेरै मुलुक घुमेर देखेको छु । घरघरको समस्यालाई कसरी समाधान गर्ने, जनतामा अमनचयन र शान्तिपूर्ण वातावरण कसरी बनाउने र समाज स्वस्थ कसरी बनाउने भन्नेमा मेरो काम हुन्छ ।

हेभिवेट नेताहरूबीचको चुनावी भिडन्तले तपाईंलाई जित्छुजस्तो लाग्छ ?

म पनि धेरै हेभिवेट हुँ । उहाँहरूभन्दा पनि म हेभिवेट छु त । म चुनाव जित्छु भन्ने आत्मविश्वासले नै मैदानमा आएको हुँ । म पदका लागि आएको हैन । मैले पाएको पद छोडेरै आएको हुँ । त्यस कारण म विश्वस्त छु कि चुनाव जित्छु ।

आफ्नै पार्टीभित्र अधिकतम महिलाहरूलाई प्रत्यक्ष टिकट दिनुपर्छ भनेर आवाज उठाउनुभएको थियो । त्यसमा तपाईं सफल हुनुभए पनि पार्टीभित्र मागको सम्बोधन कति भयो ?

मेरो मागको सम्बोधन एकदम कम भयो । त्यस कारण पनि म सन्तुष्ट छैन । भोलिका दिनमा अझै बढाएर लैजान्छु । गठबन्धनका कारण स्थानीय तहको निर्वाचनमा महिला सहभागितालाई न्यून बनायो, त्यो हामीले क्षतिपूर्ति लिन सकेका छैनौँ । स्थानीय तहको क्षतिपूर्ति आगामी प्रतिनिधिसभा र प्रदेशसभा निर्वाचनमा प्राप्त गर्छौ कि भन्ने लागेको थियो । तर, म सन्तुष्ट छैन । भोलिका दिनमा यसलाई वृद्धि गरेर जानुपर्छ भन्ने माग सधैँ रहिरहन्छ । पहिला हामीले महिलाको अवसरका विषयमा आवाज उठाउँदा नेतृत्वहरूले खोई त महिला भनेर प्रश्न गर्नुहुन्थ्यो । अहिले के देखेँ भने टिकट बाँड्ने ठाउँमा पनि महिला छौँ, यति धेरै महिलाहरू प्रत्यक्ष निर्वाचन लड्छु भनेर आउनुभयो तर, अवसर पाउन सक्नुभएन । मैले नेताहरूलाई हिजो महिला खोई भनेको जस्तै अहिले महिलाहरूलाई प्रत्यक्ष निर्वाचन उठाउनुस् भनेको छु । सशक्त महिलाहरू तयार भइसकेका छन् ।

योपटक पनि निर्वाचन जित्नुभएन भने ?

निर्वाचन जितिनँ भने पार्टीमै काम गरेर बस्छु । नसा–नसामा त्यही पार्टी छ । अबको निर्वाचन हारेँ भने आगामी निर्वाचन उठ्दिनँ । आगामी निर्वाचनमा अन्य महिलाहरूलाई अवसर दिन्छु । मैले समानुपातिक छोडेको कारण पनि अर्को महिला आओस् भनेर नै हो । मैले सधैँ किन ओगट्ने भनेर हो । महिलाको मुद्दामा म देशभरि उदाहरणीय काम गरेर अरु महिलाहरूलाई ऊर्जा थप्ने काम गर्छु । पार्टीको नेतृत्वमा पुगेपछि यी सबै विषयको समाधान गर्छु ।

प्रकाशित मिति: मंगलबार, कात्तिक १, २०७९ १३:३९