म्याराथनमा स्वर्ण जितेका अनिश भन्छन्- देशको लागि खेल्ने मन छ

A+ A A-

गण्डकी प्रदेशका अनिश थापा मगरले नवौँ राष्ट्रिय खेलकुदअन्तर्गत एथ्लेटिक्सको म्याराथनमा स्वर्ण पदक जितेका छन् । भारतीय सेनामा कार्यरत लाउरे अनिशले चर्चित खेलाडीलाई पछि पार्दै स्वर्ण जितेका हुन् । पोखरा रंगशालामा सम्पन्न म्याराथनमा अनिशले २ घण्टा २२ मिनेट ५४ सेकेन्डमा निर्धारित दूरी पूरा गर्दै स्वर्ण जितेका हुन् ।

उनले आर्मीका कृष्ण बस्नेतलाई पछि पारे । रजत पदक जितेका कृष्णले निर्धारित दूरी २ घण्टा २३ मिनेट १४ सेकेन्डमा पूरा गरे । तेस्रो बनेका एपीएफका सन्तोष विक्रम विष्टले २ घण्टा ३० मिनेट ५४ सेकेन्डमा निर्धारित दूरी पार गरे । रायफल बोकेर भारतीय भूमिमा लाउरेको जीवन बिताउँदै आएका अनिशका लागि कातिक १ गते मंगलबार ऐतिहासिक दिन बन्यो ।

परदेशी जीवन बिताइरहेका उनी छुट्टी लिएर नवौँ राष्ट्रिय खेलकुद प्रतियोगिता खेल्न केही दिनअघि मात्रै नेपाल आए । उनलाई गण्डकी प्रदेशका प्रशिक्षकले नै बोलाएका थिए । भेट्रान खेलाडीहरू विरुद्ध उनी स्वर्ण आससहित म्याराथनमा भाग लिए । अन्ततः उनले म्याराथनमा भाग लिएका १७ जनालाई पछि पार्दै स्वर्ण जिते ।

स्वर्ण जितिसकेपछि उनमा खुसीको सीमा रहेन । भारतीय सेनामा जागिरे अनिशको यो सबैभन्दा ठूलो उपलब्धि हो । उनी भन्छन्, ‘एकदम खुसी छु । म यहाँ ट्रायलको लागि आएको थिए । गुरुहरूले नै बोलाउनुभएको थियो ।’

अवसर पाए देशको लागि खेल्नेछु

स्वर्ण जितेपछि अनिशले आफूले अवसर पाए देशको लागि खेल्ने पनि बताए । अन्तर्राष्ट्रिय खेलकुद प्रतियोगिता खेल्ने सबैको लक्ष्य नै हुन्छ । त्यो लक्ष्य अनिशमा पनि छ । उनले नवौँकै लागि भनेर राम्रो तयारी भने गर्न पाएनन् । ३३ वर्षीय अनिशको यो तेस्रो पटक राष्ट्रिय खेलकुदमा सहभागिता हो ।

यसअघि उनले भारतीय सेनामा भर्ति हुनुअघि नै पाँचौँ राष्ट्रिय खेलकुद खेलेका थिए । तर उनको प्रदर्शन राम्रो भएन । लुम्बिनी प्रदेशमा भएको आठौँ राष्ट्रिय खेलकुदमा पनि उनले भाग लिएका थिए । १० हजार मिटरमा भाग लिएका उनले त्यो प्रतियोगितामा रजत पदक जितेका थिए । तर म्याराथनमै भने उनले भाग लिएका थिएनन् ।

उनी भन्छन्, ‘म्याराथनमा राष्ट्रिय खेलकुदमा पहिलो पटक भाग लिए । तयारी ठीकै थियो । त्यति राम्रो थिएन । हरेक दिन अभ्यास भने गरिरहेको थिए ।’ उनी भारतीय सेनामा आबद्ध भएको १३ वर्ष भइसक्यो । देशले उनलाई खेल्न मौका दिए झनै राम्रो गर्ने उनको लक्ष्य छ ।

पर्वत घर भएका उनी भन्छन्, ‘देशले राष्ट्रका लागि खेल्नुपर्छ भन्छ भने म तयार छु । अन्तर्राष्ट्रिय खेल खेल्न पाउनु ठूलो कुरा हो । त्यो अवसर पाए भने सबै मिलाएर आउनेछु ।’

प्रकाशित मिति: मंगलबार, कात्तिक १, २०७९ ११:०७