झापा–३ : बागी उम्मेदवार गिरीलाई एमाले नेताको साथ, सिटौला–लिङ्देन प्रतिस्पर्धा रोचक मोडमा

झापा–३ : बागी उम्मेदवार गिरीलाई एमाले नेताको साथ, सिटौला–लिङ्देन प्रतिस्पर्धा रोचक मोडमा

A+ A A-

झापा निर्वाचन क्षेत्र नम्बर ३ नेपाली कांग्रेसका पूर्वमहामन्त्री कृष्णप्रसाद सिटौला र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन ४ मंसिरको चुनावी प्रतिस्पर्धामा छन् । उनीहरूसँगै एमालेका बागी उम्मेदवार डम्बर गिरी पनि यो क्षेत्रमा प्रतिस्पर्धी थपिएका छन् ।

एमालेले पार्टीका जिल्ला सचिवालय सदस्य एवं हल्दिबारी गाउँपालिकाका निवर्तमान उपाध्यक्ष गिरीलाई गत साता नै पार्टीको सबै जिम्मेवारी तथा पार्टीको साधारण सदस्यसमेत नरहने गरी कारबाही गर्‍यो ।

झापामा प्रतिनिधिसभा तथा प्रदेशसभा निर्वाचनमा नेकपा एमाले र राप्रपाबीच चुनावी तालमेल भएको छ । तर, पार्टीको निर्णयविपरीत गिरीले प्रतिनिधिसभा निर्वाचनमा स्वतन्त्र उम्मेदवारी फिर्ता नगरेको भन्दै एमालेले उनलाई कारबाही गरेको हो ।

गिरी झापा– ३ को स्थानीय तहमा परिचित युवानेता हुन् । उनी झापामा एमालेको नेताभन्दा समाजसेवी भनेर निचिन्छन् ।

गिरीलाई एमालेकै नेता भोट माग्दै

एमाले गठबन्धनका तर्फबाट राप्रपाका उम्मेदवार राजेन्द्र लिङ्देनविरुद्ध बागी उम्मेदवारी दिएका गिरीले चुनाव चिह्न सूर्यमुखी फूल पाएका छन् । गत स्थानीय तहको निर्वाचनमा उनी एमालेका तर्फबाट हल्दिवारी गाउँपालिकाको अध्यक्ष पदमा उठेका थिए । उनी राप्रपासँग पराजित भए ।

गिरीको उम्मेदवारी लिङ्देनप्रति लक्षित छ । लिङ्देनसँग नै प्रतिस्पर्धा गर्न उठेका गिरीले एमालेका प्रदेशसभा सदस्यका उम्मेदवारहरू वसन्त बानियाँ र छवि चुडालका लागि भने भोट मागिरहेका छन् ।

बानियाँ र चुडालसमेत आन्तरिक रूपमा गिरीलाई भोट माग्दै घरदैलो कार्यक्रममा हिँड्ने गरेको राप्रपाको नेताहरूले आरोप लगाउँदै आएका छन् ।

आफूहरूले गिरीका लागि भोट माग्दै नहिँडेको नेता बानियाँले शिलापत्रसँग बताए । कसैले बाहिर हल्ला गरेको जस्तो राप्रपासँगको गठबन्धनविपरीत भोट नमागेको उनको भनाइ छ ।

एमालेको मात्र होइन । कांग्रेसको मत पनि आफूलाई आउनेमा गिरी ढुक्क छन् । झापा– ३ मा एमाले जहिल्यै कांग्रेस र राप्रपाको दास भएका कारण आफूले एमालेको प्रतिनिधित्व गर्दै बागी उम्मेदवारी दिएको उनले शिलापत्रसँग बताए ।

‘झापा–३ का जनता कांग्रेसका कृष्णप्रसाद सिटौला र राप्रपाका अध्यक्ष लिङ्देनसँग वाक्क भएका कारण यहाँको मत पाउनेमा म ढुक्क छु । यहाँका जनता परिवर्तन चाहन्छन्’, उनले भने, ‘झापा– ३ का लागि तीन दशकदेखि नेतृत्व गर्दै आएका सिटौला र लिङ्देनले के गरे । यो प्रश्न यहाँका जनताले सोधिरहेका छन् । उनीहरूसँग जवाफ पनि छैन ।’

एमालेले कारबाही गरे पनि झापा–३ मा एमाले प्रस्तिस्पर्धी पार्टी हो भनेर आफूले मंसिरको निर्वाचनमा देखाउने उनको दाबी छ । झापा– ३ को समस्यामा सिटौला र लिङ्देन केन्द्रित भएका कारण योपटक नयाँ अनुहार र युवालाई यहाँका जनताले छान्ने उनको बुझाइ छ ।

तर, झापामा एमालेले राप्रपासँग गठबन्धन गरेका कारण झापा– ३ मा एमालेको मत राप्रपाका उम्मेदवारलाई जाने र बागी उम्मेदवारको खासै प्रभाव नपर्ने एमाले झापा जिल्ला कमिटी अध्यक्ष डम्बर कार्कीले बताए । लोकतन्त्रमा स्वतन्त्र उम्मेदवारी दिने सबैलाई अधिकार हुने तर, पार्टीको निर्णयविपरीत बागी उम्मेदवार दिनेलाई कारबाही भएको उनको भनाइ छ ।

झापा– ३ मा कचनकवल गाउँपालिका, बाह्रदसी गाउँपालिका, हल्दिबारी गाउँपालिका, भद्रपुर नगरपालिकाका १, २, ३, ४, ५, ६, ७ तथा ८ नम्बर वडाहरू र बिर्तामोड नगरपालिकाको वडा नम्बर १० पर्छन् ।

झापा– ३ मा कांग्रेसका वडाध्यक्षका उम्मेदवारले पाएको मत २५ हजार ९ सय ४९, राप्रपाका वडाध्यक्षले २१ हजार १ सय ५१, एमालेका वडाध्यक्षले २१ हजार ८५, माओवादीका वडाध्यक्षका उम्मेदवारले ६ हजार ६ सय ८८ तथा जसपाका उम्मेदवारले ५ सय ३७ मत र लोसपाका उम्मेदवारले पाएकाे मत २ सय ७ छ ।

गत स्थानीय निर्वाचनका आधारमा सत्तारुढ गठबन्धन कांग्रेस र माओवादीको ३२ हजार ६ सय ३७ मत मात्र छ । एमाले–राप्रपाको ४२ हजार ७ सय ७३ मत छ । यसअनुसार सिटौलाभन्दा लिङ्देन अगाडि देखिन्छन् । तर, एमालेका बागी उम्मेदवार गिरीले राप्रपाका लिङ्देनको मत काटे उनलाई जित्न सहज नहुने एमालेका जिल्लास्तरीय नेताहरू बताउँछन् ।

हल्दिबारी गाउँपालिका, भद्रपुर नगरपालिका र बाह्रदसी गाउँपालिका राप्रपाको पकड क्षेत्र हो । तर, यी तीनैवटा स्थानीय तहमा बागी उम्मेदवार गिरीको प्रभाव राम्रो भएका कारण राप्रपा अध्यक्ष लिङ्देनको मत काटिने कांग्रेसका जिल्लास्तरीय नेताहरूको अनुमान छ । तर, मंसिरको निर्वाचनमा दुवै नेताको मत गिरीले काट्ने राप्रपा–कांग्रेसकै अनुमान छ ।

प्रकाशित मिति: सोमबार, असोज ३१, २०७९ १६:३३