कांग्रेस महाधिवेशनः अन्तरिम संरचना हत्याउन गुटहरु सक्रिय

A+ A A-

नेपाली कांग्रेस १४औं महाधिवशेनका लागि संगठनका अन्तरिम संरचना नबन्दै नेताहरु आफ्नो मान्छेलाई कसरी पार्ने भन्ने दौडधूपमा छन् ।

पार्टी महाधिवेशनमा सभापति तथा पदाधिकारीको आकांक्षी नेता भने तल्लो तहसम्मै आ–आफ्नो गुट बनाएर लागिपरेका छन् । संगठनको अन्तरिम संरचनामा आफ्नो मान्छे पार्न सके आगामी महाधिवेशनमा व्यक्तिगत र गुटगत प्रभाव पार्न सहज हुने अनुमान गर्दै नेताहरुले यस्तो सक्रियता बढाएका हुन् ।

विधानबमोजिम सभापति शेरबहादुर देउवा नेतृत्वको कार्यकाल आगामी फागुनमा सकिँदै छ । तर, उनले विधानको सुविधालाई उपयोग गर्दै एक वर्ष कार्यकाल थप्ने संकेत दिएका छन् । महाधिवेशनका लागि संगठनको अन्तरिम संरचनामा आफू निकटलाई कसरी अवसर दिन सकिन्छ भनेर कसरत सुरु भएको हो ।

संस्थापन पक्षमा समेत उपगुटको दबाब सभापति देउवामाथि पर्न थालेको छ । संस्थापन पक्षमा ३ उपगुट छन् । असन्तुष्ट पक्षमा पनि ३ उपगुट देखापरेका छन् ।

संस्थापन पक्षमा सभापति देउवाबाहेक उपसभापति विमलेन्द्र निधि, विजयकुमार गच्छदार र महामन्त्री पूर्णबहादुर खड्काका तीन उपगुट सक्रिय छन् ।

असन्तुष्ट पक्षमा पनि आफू निकटकालाई क्रियाशील सदस्यबाटै माथि पुर्‍याउन पहल भएकाे छ । असन्तुष्ट पक्षमा वरिष्ठ नेता रामचन्द्र पौडेल, शशांक कोइराला, शेखर कोइराला र कृष्णप्रसाद सिटौलाका तीन उपगुट छन् ।

संस्थापन पक्षबाट सभापतिको उम्मेदवारमा पुनः देउवा नै अघि बढ्ने देखिन्छ भने दुई उपसभापतिमा विमलेन्द्र निधि र विजयकुमार गच्छदारले पुनः सोही पदको दाबी गर्ने देखिन्छ ।

संस्थापक्ष पक्षबाट महामन्त्रीमा वर्तमान महामन्त्री पूर्णबहादुर खड्काका साथै सहमहामन्त्री प्रकाशशरण महत र प्रवक्ता विश्वप्रकाश शर्मा प्रमुख दाबेदारका रुपमा देखिएका छन् ।

संस्थापन पक्षबाट महामन्त्रीमा बालकृष्ण खाँड र पूर्वअर्थमन्त्री ज्ञानेन्द्रबहादुर कार्कीको पनि चाहना देखिन्छ । सहमहामन्त्रीमा भने मुस्लिमबाट फर्मुला मन्सुर, दलितबाट मीनबहादुर विश्वकर्मा, जनजाति/आदिवासीमा भीष्मराज आङदम्बे, खस आर्यबाट एनपी साउद र रमेश लेखक, महिलाबाट पुष्पा भुसाल, डा. डिला संग्रौला, उमा रेग्मी र महालक्ष्मी उपाध्यायले दाबी गरेका छन् ।

असन्तुष्ट पक्षबाट नेता पौडेलले पुनः सभापतिकै लबिङ सुरु गरेका छन् । पौडेलको गुटबाट उपसभापतिमा प्रकाशमान सिंह र अर्जुननरसिंह केसीले दाबी गरेका छन् । उनको गुटबाट महामन्त्रीको प्रमुख दाबेदारमा डा. रामशरण महत देखिएका छन् । सहमहामन्त्रीमा खस आर्यबाट बलबहादुर केसी र नवीन्द्रराज जोशी, महिलाबाट कमला पन्त र मीना पाण्डे र जनजातिबाट धनराज गुरुङले दाबी गरेका छन् ।

पौडेल गुटमै देखिए पनि कोइराला परिवारले बेग्लै गुट बनाएको छ । कोइराला गुटबाट महामन्त्री डा. शशांक कोइराला र डा. शेखर कोइरालामध्ये एकजना सभापतिको उम्मेदवार हुने पक्काजस्तै छ । यो उपगुटबाट उपसभापतिमा सुजाता कोइराला र महामन्त्रीमा डा. मीनेन्द्र रिजाल आकांक्षी देखिएका छन् । यो गुटबाट खस–आर्य सहमहामन्त्रीमा दीपक गिरी र महिला सहमहामन्त्रीमा सरिता प्रसाईंलाई अघि सारिने भएको छ ।

त्यस्तै, सभापतिका अर्का आकांक्षी कृष्णप्रसाद सिटौला गुटले उपसभापतिमा सुजाता कोइराला र प्रकाशमानलाई नै समर्थन गर्ने तथा महामन्त्री गगन थापालाई पुनः उम्मेदवार बनाउने रणनीति तय गरेको छ । अर्को महामन्त्री डा. मीनेन्द्र रिजाललाई समर्थन गरिने भएको छ ।

सिटौला गुटले सहमहामन्त्रीमा खस/आर्यबाट प्रदीप पौडेललाई, थारु कोटाबाट उमाकान्त चौधरीलाई, आदिवासी/जनजातिबाट भीमसेनदास प्रधान र धनराज गुरुङमध्ये एकलाई अघि सार्ने भएको छ । सहमहामन्त्रीमा मधेसी कोटाबाट डा. अमरेशकुमार सिंहलाई अघि सारिने भएको छ ।

प्रकाशित मिति: सोमबार, साउन २०, २०७६ २२:२९