स्वर्ण जितेपछि सन्तोषीकाे प्रतिक्रिया, ‘जेका लागि दौडिएकी थिएँ, त्याे पाएँ'

स्वर्ण जितेपछि सन्तोषीकाे प्रतिक्रिया, ‘जेका लागि दौडिएकी थिएँ, त्याे पाएँ'

A+ A A-

बागमती प्रदेशकी सन्तोषी श्रेष्ठले नवौँ राष्ट्रिय खेलकुदअन्तर्गत एथ्लक्सिको १० हजार मिटरमा स्वर्ण पदक जितेकी छिन् । उनले निर्धारित दूरी ३६ मिनेट १२.३६ सेकेन्डमा पूरा गर्दै स्वर्ण जितेकी हुन् । गाेल्ड मेडल हात पार्न उनले नेपाल पुलिस क्लबकी राजपुरा पछाईलाई पछि पारिन् ।

राजपुराले रजत पदक जित्ने क्रममा निर्धारित दूरी ३६ मिनेट २९.४५ सेकेन्डमा पूरा गरिन् । कास्य पदक जितेकी एपीएफकी पुष्पा भण्डारीले निर्धारित दूरी ३७ मिनेट ०४.२ सेकेन्डमा पूरा गरिन् ।

स्वर्ण जितेपछि सन्तोषीले आफू स्वर्णकै लागि दौडिएको बताइन् । उनले भनिन्, ‘म स्वर्णको लागि नै दौडिएकी थिएँ । सोचेजस्तै भयो । मेरो यो स्वर्ण बागमती प्रदेशलाई समर्पण गर्न चाहन्छु ।’

सन्तोषीले अन्तिम राउण्डमा मात्रै राजपुरालाई उछिनेकी थिइन् । उनी २४ राउण्डसम्म राजपुराभन्दापछि दौडिएकी थिइन् । भन्छिन्, ‘मेरो मन र दिमागले अगाडि बढ्न दबाब दिइरहेको थियो । तर खुट्टाले साथ दिएन ।’

उनी पूर्णरूपमा फिट भएकी छैनन् । उनी केही महिनाअघि घाइते भएकी थिइन् । सन्तोषीले अबको लक्ष्य पाँच हजारमा स्वर्ण जित्ने रहेको पनि बताइन् । पाँच हजार मिटर दौड कातिक २ गते हुँदैछ ।

यसअघि लुम्बिनी प्रदेशमा भएको आठौँ राष्ट्रिय खेलकुदमा सन्तोषीले पाँच हजार मिटर दौडमा स्वर्ण जितेकी थिइन् । उनले १६ मिनेट ३८.३५ सेकेन्डमा स्वर्ण जितेकी थिइन् । रजत पदक जितेकी विश्वरुपा बुढाले १६ मिनेट ४६.०३ सेकेन्डमा दुरी पूरा गरेकी थिइन् ।

सन्तोषीको २०७६ मंसिरमा नेपालमा सम्पन्न १३औँ दक्षिण एसियाली खेलकुद (साग) मा एथ्लेटिक्सको १० हजार मिटरमा स्वर्ण जितेकी थिइन् । सन्तोषीले ३५ मिनेट ०७.९४ सेकेन्डमा निर्धारित दूरी पूरा गरेकी थिइन् । दोस्रो भएकी भारतकी कविता यादवको समय ३५ मिनेट ०७.९५ सेकेन्डको थियो । सन्तोषीले मात्र एक मिलिसेकेन्डले स्वर्ण जितेकी थिइन् ।

प्रकाशित मिति: शनिबार, असोज २९, २०७९ १०:५६