मधेस प्रदेशमा एपीएफको कमजोर कमाण्ड , असई यादव हत्या छानबिन गर्न एआईजी गौतमको टोली सप्तरी जाने

मधेस प्रदेशमा एपीएफको कमजोर कमाण्ड , असई यादव हत्या छानबिन गर्न एआईजी गौतमको टोली सप्तरी जाने

A+ A A-

सशस्त्र प्रहरी बल (एपीएफ) का प्रहरी सहायक निरीक्षक (असई) सत्यनारायण यादव २० असोजमा मृत फेला परे । उनको शव नेपाल–भारत सीमा क्षेत्रको भारततर्फ बिहारको मधुवनी जिल्लाको जिरोगा पुनर्वासस्थित घोडदह खोलामा फेला परेको थियो ।

बिहार प्रहरीले शव नांगो अवस्थामा फेला पारेपछि सप्तरी प्रहरीसँग समन्वय गर्‍याे । त्यसपछि शव यादवको भएको पुष्टि भयाे । यादव मधेस प्रदेश सशस्त्र प्रहरी बल गण नम्बर ६ हेडक्वार्टर राजविराजमा दरबन्दी भई बोर्डर आउट पोस्ट (बीओपी) छिन्नमस्तामा कार्यरत थिए ।

हत्या भएको आशंकामा अनुसन्धान थालेको सप्तरी प्रहरीले यादवको हत्या तस्करहरूसँगको मिलेमतोमा सशस्त्र प्रहरी बलकै जवान होमबहादुर खत्रीसमेतको संलग्ना देखिएपछि उनलाई समेत पक्राउ गरेको छ । खत्री पनि बीओपी छिन्नमस्तामै कार्यरत थिए ।

प्रहरी स्रोतका अनुसार छिन्नमस्ताको मोहनपुर नाकाबाट तस्करी हुने र असई यादव भने तस्करी नियन्त्रणका लागि खटिने गरेकाले तस्करहरूसँग दुश्मिनी भएपछि तस्करसँग जवान खत्री मिलेर हत्या गरेको आशंका प्रहरीले गरेको छ । तर असई यादवको आचरणबारे पनि यसअघि पटक–पटक उजुरी आउने गरेको सशस्त्र प्रहरी बलको भनाइ छ ।

यादवलाई शसस्त्र प्रहरी बलले आचरणविपरीत काम गरेको खुलेपछि ५ वर्ष बढुवा रोक्का हुने गरी विभागीय कारबाहीसमेत गरेको थियो ।

सप्तरी प्रहरी स्रोतले भन्यो, ‘घटना रहस्यमयी नै छ । तर, सशस्त्र प्रहरी बलकै जवानको भूमिकासमेत शंकास्पद छ । तस्कर र युवतीको समेत प्रयोग भएको जस्तो हाम्रो प्रारम्भिक अनुसन्धानले देखाएको छ । हामी अनुसन्धानकै क्रममा छौं ।’

सप्तरी प्रहरीका अनुसार १९ असोजमा असई यादव ड्युटीका लागि भन्दै मोहनपुरतर्फ गएका थिए । जवान खत्रीसमेत उनीसँग ड्युटीमै थिए । त्यही दिन खत्रीले एक युवतीलाई मोहनपुरमै बोलाएको खुलेको छ ।

ती युवतीलाई एक युवाले मोटरसाइकलमा मोहनपुर पुर्‍याएका थिए । ती युवतीमार्फत तस्कर समूहसहित खत्रीको योजनामा यादवलाई बोलाएर हत्या गरेको अनुमान प्रहरीको छ । असई यादवको हत्या प्रकरणबारे प्रहरीबाहेक सशस्त्र प्रहरी बल आफैँले समेत छानबिन छालेको छ ।

बिहीबार सो बिषयबारे छानबिन गर्न सशस्त्र प्रहरी हेडक्वार्टरले शस्त्र प्रहरी बलका कार्य विभाग प्रमुख एआईजी चन्द्रप्रकाश गौतमको नेतृत्त्वमा तीन सदस्यीय समिति नै गठन गरेको छ ।

त्योबाहेक सशस्त्र प्रधान कार्यालयले मंगलबारै राजविराजस्थित सशस्त्र प्रहरी गण नम्बर ६ का गणपति सशस्त्र प्रहरी उपरीक्षक (एसपी) प्रदीप खड्कालाई हेडक्वार्टर तानेको छ । सशस्त्र प्रहरी स्रोतका अनुसार घटनाबारे एसपी खड्कामाथि समेत सोधपुछ भइरहेको छ ।

छिन्नमस्ता बीओपी प्रमुखमा सशस्त्र प्रहरी निरीक्षक ‘इन्सपेक्टर’ रहँदै आएका थिए । तर, पछिल्लो समयदेखि बीओपी प्रमुखमा सई कृष्णबहादुर मगर कार्यरत थिए । असई यादवको हत्यापछिदेखि भने उनी बिरामी भएको भन्दै सशस्त्र प्रहरी अस्पताल काठमाडौंमा भर्ना भएका छन् ।

उनीमाथि समेत सोधपुछ गर्नेे तयारी छानबिन समितिको छ । सशस्त्रका प्रवक्ता एसएसपी पुरुषोतम थापाले घटनाबारे समितिले छानबिन छालेको बताए । आवश्यकपरे समिति स्थलगत छानबिनका लागि सप्तरी जाने पनि उनको भनाइ छ।

डीआईजीकै कारण तस्करी

सीमा सुरक्षा र सीमा तस्करी नियन्त्रणका लागि खटिएकाे सशस्त्र प्रहरी बलकै कारण मधेस प्रदेशमा तस्करी बढेको स्थानीयहरूको आरोप छ ।

हाल मधेस प्रदेश छिन्नमस्ता बाहिनीमा सशस्त्र प्रहरी नायव महानिरीक्षक (डीआईजी) गणेश ठाडा मगर प्रमुख छन् । डीआईजी मगरको कमजोर कमण्डका कारण तस्करी बढेको सशस्त्र प्रहरी बलकै केही अधिकारीको दाबी छ ।

डीआईजी मगरको कमाण्डमाथि यसअघिसमेत पटक–पटक प्रश्न उठ्दै आएको छ । एक महिना अघिमात्रै सिरहाहुँदै भारत तस्करी हुन लागेको भारतीय नम्बर प्लेटको गाडीको ठक्टरबाट एक जना भारतीय सीमा सूरक्षा बल एसएसबीका जवानको मृत्यु भएको थियो ।

पछिल्लो समयसमेत चाडपर्वको समयमा सीमा क्षेत्रमा तस्करी बढेको आरोप स्थानीयको छ । उसो त यसअघिसमेत सशस्त्र प्रहरी बलकै जवानहरू हतियार तस्करीमा लागेको अनुसन्धानमा खुलेको थियो ।

डीआईजी गणेश ठाडामगरको निर्देशनमा खटिएका चारजना सादा पोशाकका सशस्त्रका कर्मचारीमाथि जिल्ला अदालत बाराले पक्राउ पुर्जी नै जारी गरेको थियो ।

हतियारसहित बारा प्रहरीले भारतीय नागरिक लालबाबु कुसहवालाई पक्राउ परेपछि सशस्त्र प्रहरी बलका सादा पोसाकका जवानहरू सुनिल यादव, आत्माराम राउत र अशोक सोनारसहित तस्करीमा चारजना सिपाहीको भूमिका खुलेको थियो ।

सशस्त्र प्रहरी बलको प्रधान कार्यालयबाहेक अन्य बाहिनी तथा युनिटहरूले सादा पोशाकका सुरक्षाकर्मी खटाउन नपाइने व्यवस्था छ । तर, डीआईजी मगरले प्रधान कार्यालयको निर्देनशबिनै आफैँले सादा पोशाकमा सशस्त्र प्रहरी बलका सिपाही खटाउने गरेका थिए ।

सो बारेसमेत प्रधान कार्यालयले उनीमाथि छानबिन गरेको थियो । तर, छानबिनबारे भने सशस्त्र प्रहरी प्रधान कार्यालयले केही बाहिर ल्याउन खोजको छैन ।

सशस्त्र प्रहरी बलका प्रवक्ता एसएसपी पुरुषोत्तम थापा उक्त समितिको प्रतिवेदनबारे आफूलाई जानकारी नभएको भन्दै पन्छिन खोजे ।

प्रकाशित मिति: शुक्रबार, असोज २८, २०७९ १५:३२