बागमतीको मुख्यमन्त्री बन्न चुनावमा दोहोरिँदै यी अनुहार, आठ मन्त्री फेरि उम्मेदवार

बागमतीको मुख्यमन्त्री बन्न चुनावमा दोहोरिँदै यी अनुहार, आठ मन्त्री फेरि उम्मेदवार

A+ A A-

बागमती प्रदेशसभाको १ सय १० सिटका लागि आगामी ४ मंसिरमा प्रदेशसभा निर्वाचन हुँदैछ । बागमती प्रदेशमा प्रमुखतः सत्ता गठबन्धन र नेकपा एमालेका उम्मेदवारबीच कडा प्रतिस्पर्धा हुने देखिन्छ । सत्तागठबन्धनबाट नेपाली कांग्रेस, नेकपा (माओवादी केन्द्र), नेकपा (एकीकृत समाजवादी)ले उम्मेदवार उठाएका छन् भने नेकपा एमालेले पनि अधिकांश प्रदेशसभा निर्वाचन क्षेत्रमा नयाँ अनुहारहरूलाई मौका दिएको छ ।

२०७४ को निर्वाचनमा वामगठबन्धनको प्रभावले बागमती प्रदेशसभामा एमालेको एकल बहुमत आयो । एकल बहुमत भएकै अवस्थामा एमाले विभाजनसँगै बनेको नेकपा (एकीकृत समाजवादी)ले गठबन्धनका कांग्रेस र माओवादी केन्द्रसँग मिलेर गत ११ कार्तिकमा नयाँ सरकार गठन गरेको थियो । यो कार्यकालमा बागमतीले ३ मुख्यमन्त्री र ३० हाराहारीमा मन्त्री पाएको थियो ।

आगामी ४ मंसिरमा हुने निर्वाचनपछि बागमतीमा अर्को नयाँ सरकार बन्नेछ । प्रदेशसभा निर्वाचनपश्चात आगामी सरकारको नेतृत्व गर्ने दलको टुंगो लाग्छ नै । तर, भावी मुख्यमन्त्रीका लागि सत्ता गठबन्धन र नेकपा एमालेबाट सम्भावित अनुहारहरू देखिएका छन् । यसअघि मन्त्री भइसकेकादेखि मुख्यमन्त्रीमा दाबी गर्ने नेताहरू प्रदेशसभा निर्वाचन दोहोर्‍याएर चुनाव लड्दैछन् । हारजित आफ्नो ठाउँमा भए पनि दोहोर्‍याएर निर्वाचन लड्न लागेका अनुहार नै बागमतीको भावी मुख्यमन्त्रीका रूपमा चर्चा हुन थालेको छ ।

सत्ता गठबन्धनबाट भावी मुख्यमन्त्रीको पहिलो दाबेदारमा नेपाली कांग्रेसका इन्द्रबहादुर बानियाँ छन् । आगामी निर्वाचनपछि वर्तमान सत्तागठबन्धन कायम रहनु र बहुमत आएर सरकार बनाउने स्थितिमा पुगे बानियाँ नै मुख्यमन्त्री हुने सम्भावना बढी छ । यही कार्यकालमै मुख्यमन्त्री बन्न कम्मर कसेर लागे पनि अन्ततः सफल हुन नसकेका बानियाँले आफू भावी मुख्यमन्त्रीको रूपमा प्रस्तुत हुने संकेत दिइसकेका छन् । बानियाँ प्रदेशसभाको पूरा कार्यकाल कांग्रेस संसदीय दलको नेता बने ।

मुख्यमन्त्री ताकेका बानियाँले वर्तमान प्रदेश सरकारमा दोस्रो वरियताको मन्त्रालय लिन सक्ने भए पनि मन्त्री बनेनन् । बानियाँ प्रदेशसभा २ को (ख)बाट गठबन्धनका साझा उम्मेदवार बनेका छन् । उनले २०७४ मा पनि सोही क्षेत्रबाट चुनाव जितेका थिए । गठबन्धनकै माओवादी केन्द्रबाट बहालवाला आर्थिक मामिला तथा योजना मन्त्री शालिकराम जम्मकट्टेल पनि मुख्यमन्त्रीको दाबेदार हुन् ।

उनले तत्कालीन नेकपा सरकार हुँदा दोस्रो वरियताको आन्तरिक मामिला तथा कानुन मन्त्रालय सम्हालेका थिए । प्रदेशको सुरक्षादेखि ढुकुटी चलाइसकेका जम्मकट्टेल अब मुख्यमन्त्रीका रूपमा दाबेदार छन् । उनी धादिङबाट प्रदेश १ को (ख)बाट गठबन्धनका साझा उम्मेदवार छन् ।

एमालेबाट बागमती प्रदेशसभाका सभामुख सानुकुमार श्रेष्ठ मुख्यमन्त्रीका दाबेदार रहनेछन् । उनी काठमाडौंबाट प्रदेशसभा २ को (क)बाट श्रेष्ठ उम्मेदवार बनेका छन् । प्रदेशसभाको पूरा कार्यकाल सभामुख चलाएका उनको मुख्यमन्त्रीमा दाबी रहने एमालेभित्र चर्चा छ । एमालेबाटै मुख्यमन्त्रीको दाबेदारका रूपमा नुवाकोटका केशवप्रसाद पाण्डे पनि छन् । बागमतीको अघिल्लो सरकारमा आन्तरिक मामिला तथा कानुन मन्त्रालय चलाएका एमाले प्रदेश कमिटी अध्यक्षसमेत रहेका पाण्डे पनि मुख्यमन्त्रीको दाबेदार हुन् ।

बागमतीले अघिल्लो कार्यकालमा तीन मुख्यमन्त्री पाएको थियो । जसमध्ये दुई जना मुख्यमन्त्री आगामी निर्वाचनभन्दा बाहिर छन् । पहिलो मुख्यमन्त्री एमालेका डोरमणि पौडेल र दोस्रो मुख्यमन्त्री अष्टलक्ष्मी शाक्य निर्वाचन नलड्ने भएका हुन् । वर्तमान मुख्यमन्त्री नेकपा (एकीकृत समाजवादी) उपाध्यक्षसमेत रहेका राजेन्द्रप्रसाद पाण्डे प्रदेशसभा छोडेर धादिङबाट प्रतिनिधिसभा निर्वाचन लड्दैछन् ।

बागमतीका बहालवाला आठ मन्त्री फेरि उम्मेदवार

प्रदेशसभा निर्वाचनमा बागमती प्रदेश सरकारका आठ जना बहालवाला मन्त्री फेरि उम्मेदवार बनेका छन् । २०७४ सालको निर्वाचनमा प्रदेशसभा सदस्य निर्वाचन लडेका मकवानपुरकी कुमारी मोक्तानसहितका नाै जना मन्त्रीहरू प्रतिनिधिसभा र प्रदेशसभा निर्वाचनका लागि उम्मेदवार बनेका हुन् ।

उम्मेदवार बन्नेहरूमा नेकपा माओवादी केन्द्र र नेकपा (एकीकृत समाजवादी)का अधिकांश छन् । प्रदेश सरकारमा सबैभन्दा धेरै मन्त्री रहेको कांग्रेसले आगामी निर्वाचनमा भने थोरैलाई मात्र उम्मेदवार बनाएको छ । कांग्रेसका आठ जना मन्त्रीमध्ये सात जना उम्मेदवार बन्न सकेनन् । कांग्रेसबाट मन्त्री बनेका प्रदेशका संस्कृति तथा पर्यटन मन्त्री दीपेन्द्र श्रेष्ठ आगामी निर्वाचनमा प्रदेशसभा सदस्यका लागि काठमाडौं–१ (क)मा उम्मेदवार बनेका छन् । उनी प्रदेश मन्त्रीमध्ये कांग्रेसबाट टिकट पाउने एकमात्र व्यक्ति हुन् ।

बागमतीमा राज्यमन्त्रीसमेत गरेर कुल १८ जना मन्त्री छन् । जसमध्ये १० जना निर्वाचन नलड्ने भएका छन् । अधिकांशले गठबन्धनका कारण उम्मेदवार हुन नपाएका हुन् । कृषि तथा पशुपन्छी विकास मन्त्री बसुन्धरा हुमागाई गठबन्धनको भागवण्डाका कारण चुनाव लड्न पाएनन् । उनले पार्टीको निर्देशनपछि उम्मेदवारी फिर्ता लिएका छन् ।

बागमती प्रदेशका वर्तमान मुख्यमन्त्री पाण्डे प्रतिनिधिसभामा लड्दैछन् । विगतमा केन्द्रीय मन्त्रीसमेत भइसकेका पाण्डे बागमतीको प्रथम मुख्यमन्त्री हुने चाहनाले २०७४ मा धादिङबाट प्रदेशसभा निर्वाचन लडेका थिए । तर, पार्टीभित्रको गुटको खेलका कारण पाण्डे पहिलो मुख्यमन्त्री हुनबाट रोकिए । अन्ततः पाण्डे प्रदेश सरकारको अन्तिम कार्यकालको अर्थात बागमतीको तेस्रो मुख्यमन्त्री बने । उनै पाण्डे सत्ता गठबन्धनबाट संघीय संसदका लागि धादिङ क्षेत्र नम्बर–१ बाट उम्मेदवार बनेका हुन् ।

माओवादी केन्द्रबाट प्रदेशको मन्त्री बनेका पाँच जना मध्ये चार जना आगामी निर्वाचनका लागि उम्मेदवार बनेका छन् । प्रदेशको आर्थिक मामिला तथा योजना मन्त्री जम्मकट्टेल प्रदेशसभा सदस्यमा उम्मेदवार छन् । प्रदेशको सामाजिक विकास मन्त्री कुमारी मोक्तान पनि प्रदेशसभा सदस्यका लागि मओवादी केन्द्रबाट मकवानपुर–२ (क) मा उम्मेदवार बनेकी छन् ।

प्रदेशका युवा तथा खेलकुद मन्त्री रत्नप्रसाद ढकाल माओवादी केन्द्रबाट प्रदेशसभामा काभ्रे–१ (क)मा उम्मेदवार बनेका छन् । श्रम, रोजगार तथा यातायात मन्त्री घनश्याम दाहाल माओवादी केन्द्रबाट प्रदेशसभाका लागि चितवन–२ (क)मा उम्मेदवार बनेका छन् । उनीहरू सबै सत्ता गठबन्धनका तर्फबाट साझा उम्मेदवार बनेका हुन् ।

एकीकृत समाजवादीबाट मन्त्री बनेका पाँच जनामध्ये तीन जना फेरि उम्मेदवार बनेका छन् । प्रदेशका आन्तरिक मामिला तथा कानुन मन्त्री कृष्णप्रसाद शर्मा खनाल प्रदेशसभा सदस्यका लागि एकीकृत समाजवादीबाट सत्ता गठबन्धनको समर्थनमा चितवन–१ (ख) बाट उम्मेदवार छन् । प्रदेशको खानेपानी, ऊर्जा तथा सिँचाइ मन्त्री बसन्तप्रसाद मानन्धर पनि एकीकृत समाजवादीबाट सत्तारुढ गठबन्धनको सहयोगमा काठमाडौं–७ (ख)बाट प्रदेशसभा सदस्यका लागि उम्मेदवार बनेका छन् ।

प्रकाशित मिति: शुक्रबार, असोज २८, २०७९ ११:४५