मकवानपुरबाट प्रतिनिधिसभाको समानुपातिकमा एमाले र माओवादी केन्द्रका उम्मेदवार शून्य

मकवानपुरबाट प्रतिनिधिसभाको समानुपातिकमा एमाले र माओवादी केन्द्रका उम्मेदवार शून्य

A+ A A-

आगामी ४ मंसिरमा हुने चुनावमा नेकपा एमाले र माओवादी केन्द्रले मकवानपुरबाट प्रतिनिधिसभाको समानुपातिकतर्फ कसैलाई पनि उम्मेदवार बनाएनन् । प्रतिनिधिसभाको समानुपातिकतर्फको बन्दसूचीमा मकवानपुरबाट एमाले र माओवादीका उम्मेदवार शून्य देखिएका हुन् ।

मकवानपुरमा दुई वटा प्रतिनिधिसभा र ४ वटा प्रदेशसभा निर्वाचन क्षेत्र छन् । मकवानपुर बागमती प्रदेशको राजधानीसँगै ठूला दलका शिर्ष तहका नेताहरू भएको जिल्ला पनि हो । तर, प्रतिनिधिसभाको चुनावमा समानुपातिकतर्फको बन्दसूचीमा भने प्रमुख दलहरूबाटै मकवानपुरमा नेताहरू अटाउन सकेनन् ।

पार्टीबाट समानुपातिकमा एक जना पनि पार्न नसकिएको एमाले मकवानपुरका अध्यक्ष एकालाल श्रेष्ठले बताए । जिल्लाको १ नम्बर निर्वाचन क्षेत्र नचाहेरै गुमाएको एमाले मकवानपुरले बन्दसूचीमा पनि नाम पार्न सकेन ।

एमालेले मकवानपुर–१ मा आफ्नै पार्टीको उम्मेदवार उठाउन चाहे पनि केन्द्रबाट पार्टीले राप्रपा नेपालका अध्यक्ष कमल थापालाई समर्थन गरेपछि प्रत्यक्षतर्फको उम्मेदवार गुमाएको थियो । समानुपातिकतर्फ पनि एमालेले उम्मेदवार बनाउन सकेन । प्रदेशसभातर्फ तीन जनाको नाम समानुपातिकमा परेको भन्दै त्यसैमा चित्त बुझाउनुपर्ने अध्यक्ष श्रेष्ठले बताए ।

२०७४ सालको चुनावमा वाम गठबन्धनका कारण दुवै प्रतिनिधिसभा क्षेत्र गुमाएको माओवादी केन्द्रले आगामी चुनावमा पनि दुवै क्षेत्रमा प्रत्यक्षतर्फका उम्मेदवार उठाउन सकेन । आगामी चुनावमा प्रत्यक्षतर्फ वाम–लोकतान्त्रिक गठबन्धनका कारण नेपाली कांग्रेस र एकीकृत समाजवादीले एक–एक क्षेत्र लिएपछि माओवादी केन्द्र पुनः प्रदेशमै खुम्चिएको छ । एउटा प्रतिनिधिसभा दाबी गरेको माओवादी प्रदेशसभातर्फ दुई वटा क्षेत्रमा चित्त बुझाउन बाध्य भयो ।

माओवादी केन्द्रले प्रत्यक्षमा मात्र होइन समानुपातिकमा पनि प्रतिनिधिसभातर्फ नाम पार्न सकेन । माओवादी केन्द्र बागमती प्रदेश उपाध्यक्ष प्रेमबहादुर पुलामीले पार्टीले मकवानपुरमा आगामी चुनावमा प्रतिनिधिसभातर्फ प्रत्यक्ष र समानुपातिक दुवैमा उम्मेदवार नबनाएको बताए । उनले यस विषयमा थप बोल्न भने चाहेनन् । तर, माओवादीका नेताहरू भने प्रतिनिधिसभा छोडेर प्रदेशसमा मात्रै खुम्चिन परेको भन्दै असन्तुष्ट छन् ।

नेपाली कांग्रेसबाट भने एक जनाको नाम समानुपातिकको बन्दसूचीमा परेको छ । गठबन्धनसँगको भागवण्डामा पनि प्रतिनिधिसभातर्फ मकवानपुर–१ मा प्रतयक्षतर्फको उम्मेदवार महिलालाई बनाएको कांग्रेसले समानुपातिकमा पनि महिलालाई नै अवसर दिएको छ । कांग्रेसले समानुपातिकमा मकवानपुरकी उमा दाहालको नाम बन्दसूचीमा राखेको छ ।

मकवानपुरमा एकीकृत समाजवादीबाट बन्दसूचीमा आदिवासी जनजाति महिलातर्फबाट राजाराम स्याङ्तान र दलिततर्फ कल्पना विश्वकर्मा परेका छन् ।

नेपाली कांग्रेस (बीपी) बाट खसआर्यतर्फ रिताकुमारी खनाल, दलिततर्फ चुनुकुमारी दमाई, आदिवासी जनजातितर्फ रामबहादुर थिङ र रामकुमारी घलान रहेका छन् ।

विवेकशील साझा पार्टीबाट भने दलिततर्फ मकवानपुरकी सोभिता परियार बन्दसूचीमा परेकी छन् ।

रवि लामिछाने नेतृत्वको पार्टी राष्ट्रिय स्वतन्त्र पार्टीबाट सीता पौडेल, निर्माण प्रजा मनहरी र सुनिता राई (दनुवार)को नाम समानुपातिकमा परेको पार्टीको जिल्ला अध्यक्ष राजकुमार न्यौपानेले जानकारी दिए ।

राप्रपा नेपालबाट शान्ति बुलुन, राधिका श्रेष्ठ, बालकृष्ण कार्की, अम्बिका कुमारी, सुमित्रा कठायत र कृष्णराम परियार परेका छन् ।

राप्रपाबाट रामबहादुर थोकर र इन्दिरा न्यौपाने परेकी छन् । राष्ट्रिय जनमोर्चाबाट भने शुभराज गोले परेका छन् ।

मुख्य निर्वाचन अधिकृतको कार्यालयका अनुसार प्रतिनिधिसभा क्षेत्र नम्बर १ र २ मा गरी २६ जनाले प्रत्यक्षतर्फ उम्मेदवारी दिएका छन् । हेटौँडाको १५ वटा वडा, बागमती गाउँपालिका, बकैया गाउँपालिका र मकवानपुरगढीको ४ वटा वडा रहेको १ नम्बर क्षेत्रमा १६ जनाले उम्मेदवारी दिएका छन् ।

हेटौँडाको ४ वटा वडा, थाहा नगरपालिका, मनहरी, राक्सिराङ, कैलाश, इन्द्रसरोबर, भीमफेदी र मकवानपुरगढी गाउँपालिकाको ४ वटा वडा रहेको २ नम्बर क्षेत्रमा १० जनाको उम्मेदवारी परेको निर्वाचन अधिकृतको कार्यालयले जनाएको छ ।

प्रतिनिधिसभा क्षेत्र नम्बर १ मा एमालेको तर्फबाट राप्रपा नेपालका अध्यक्ष कमल थापा, गठबन्धनको तर्फबाट कांग्रेसकी सहमहामन्त्री महालक्ष्मी उपाध्याय (डीना), राप्रपाका केन्द्रीय सदस्य दीपकबहादुर सिंह, हाम्रो नेपाली पार्टीका दिपेन्द्र सिंह ठकुरी, राष्ट्रिय स्वतन्त्र पार्टीका टीकराम थापालगायतले उम्मेदवारी दिएका छन् ।

प्रतिनिधिसभा क्षेत्र नम्बर २ मा गठबन्धनबाट एकिकृत समाजवादीका स्थायी कमिटी सदस्य तथा पूर्वमन्त्री विरोध खतिवडा, एमालेबाट बागमती प्रदेश कमिटीका उपसचिव महेशकुमार बर्तौला, राष्ट्रिय स्वतन्त्र पार्टीका भरत पराजुली, राप्रपाका राजन मैनालीलगायतले उम्मेदवारी दर्ता गरेका छन् ।

प्रकाशित मिति: बिहीबार, असोज २७, २०७९ २०:१४