लगातार जित निकाल्न नसकेका बडूलाई गठबन्धनको भर, आफ्नै बलमा ह्याट्रिक गर्ने ठगुन्नाको लक्ष्य

लगातार जित निकाल्न नसकेका बडूलाई गठबन्धनको भर, आफ्नै बलमा ह्याट्रिक गर्ने ठगुन्नाको लक्ष्य

A+ A A-

४ मंसिरमा हुने प्रदेशसभा र प्रतिनिधिसभाको चुनावको सरगर्मी देशभर बढेको छ । प्रतिनिधिसभाको एकमात्रै निर्वाचन क्षेत्र रहेको दार्चुलामा पनि चुनावी रौनक बढेको छ ।

दार्चुलामा सत्ता गठबन्धनका तर्फबाट कांग्रेस नेता तथा उद्योग वाणिज्य तथा आपूर्तिमन्त्री दिलेन्द्रप्रसाद बडू र एमालेका तर्फबाट पूर्व संघीय तथा सामान्य प्रशासनमन्त्री गणेश ठगुन्ना चुनावी मैदानमा उत्रिएका छन् । यी दुई प्रतिस्पर्धीबीचकाे राेचक संयाेग के छ भने हालसम्म बडूले लगातार दुईपटक जित्न सकेका छैनन् । ठगुन्नाले पहिलाे जितपछि हारेका छैनन् । अहिले गठबन्धनकाे बलमा बडू जित निकाल्न चाहन्छन् भने ठगुन्ना जितकाे ह्याट्रिक ।

दार्चुलामा प्रदेशसभातर्फ २ क्षेत्र छन् । क्षेत्र ‘१’ मा गठबन्धनका तर्फबाट माओवादी केन्द्रका नेता मानबहादु धामी ‘सन्तोष’ र ‘२’ मा कांग्रेसका विक्रमसिंह धामी चुनावी मैदानमा छन् ।

धामी सूदुरपश्चिम प्रदेशका उद्योगका पर्यटन तथा वातावरमन्त्रीसमेत छन् । विक्रम धामी भने यसअघिको चुनावमा प्रतिनिधिसभा सदस्यमा गणेश ठगुन्नासँग पराजित भएका थिए ।

एमालेका तर्फबाट १ मा हरिदेव जोशी र २ मा रामदत्त जोशी उम्मेदवार छन् । प्रतिनिधिसभामा उम्मेदवार दिलेन्द्रप्रसाद बडू गठबन्धनको बलमा आफ्नो इतिहास दोहोर्‍याउने दाउँमा छन् ।

त्यस्तै एमाले उम्मेदवार ठगुन्ना जितलाई निरन्तरता दिन चाहन्छन् । बडू २०४८ सालमा पहिलोपटक आम निर्वाचनबाट सांसदमा विजयी भए ।

तर, २०५१ मा दिवंगत एमाले नेता प्रेमसिंह धामीले पराजित गरे । ४८ सालदेखिनै कांग्रेसको जिल्लाका एकछत्र राज जमाएका बडूले फेरि २०५६ मा एमालेका उम्मेदवार विरबहादुर ठगुन्नालाई पराजित गर्दै केन्द्रीय राजनीतिमा कमब्याक गरे ।

तर, २०६४ को पहिलो संविधानसभा चुनावमा भने माओवादीका लक्ष्मणदत्त जोशीले फेरि उनलाई पराजित गरे । २०६४ सालको चुनावमा माओवादीका जोशी विजयी हुँदा बडू दोस्रो र एमालेका गणेश ठगुन्ना तेस्रो स्थानमा थिए ।

त्यसपछि दोस्रो पल्ट २०७० मा भएको संविधानसभाको चुनावबाट एमाले नेता गणेश ठगुन्ना उदाए । माओवादीका जोशी र कांग्रेसका बडूलाई हराउँदै उनी पहिलोपकट दार्चुलाबाट प्रतिनिधित्त्व गर्दै संसद छिरे । सयताभने ठगुन्नालाई पछि फर्किनु परेको छैन । २०७४ मा भएको चुनावमा माओवादीसँगको गठबन्धनबाट उनि फेरि विजयी भए ।

उनले कांग्रेसका विक्रमसिंह धामीलाई पराजित गरेका थिए । बडू भने समानुपातिकतर्फबाट सांसद बने । ठगुन्ना २८ हजार ९ सय ९८ मत ल्याएर विजयी भएका थिए । कांग्रेसका धामीले २२ हजार दुइ सय ३३ मत पाएका थिए ।

त्यो धामीको सम्मानजनक मत थियो । उनले माओवादीको साथ गणेशलाई हुँदा आफूले हार व्यहाेर्नु परेको बताउँदै आएका छन् । अहिले परिस्थित ठिक उल्टो छ । कांग्रेस र माओवादी एक भएका छन् एमाले एक्लै छ ।

यो बीचमै दुवै नेताको राजनीतिक यात्राले समेत फड्को मारिसकेको छ । ठगुन्ना संघीय तथा सामान्य प्रशासनमन्त्री बने भने हाल बडू उद्योग वाणीज्य तथा आपूर्तिमन्त्री छन् ।

दुवै नेताको पहुँच केन्द्रीय राजनीतिमा राम्रो छ । त्यसकारण बडू आफ्नो विरासतमा फर्किएर इतिहास रच्न चाहान्छन् भने ठगुन्ना जितको निरन्तरको खोजीमा छन् ।

स्थानीय तहको चुनावको परिणामलाई हेर्दा कांग्रेस कमजोर अवस्थामा छ । जिल्लाका भएका ९ पालिकामै कांग्रेसले जित निकाल्न सकेन । जिल्लाका दुवै नगरपालिका महाकाली र शैल्यशिखर नगर प्रमुखमा एमाले विजयी भएको छ ।

त्यस्तै अन्य तीन गाउँपालिका दुहुँ, ब्यास र मालिकार्जुनमा समेत एमाले विजयी भएको थियो । बाँकी चार पालिका प्रमुख माओवादी केन्द्रले जितेको छ । लेकम, अपी हिमाल, नौगाड र मार्मा पालिका प्रमुखमा माओवादी छन् ।

९ वटा पालिकाको ६१ वडामध्ये ३४ एमालेले जितेकाे छ । स्थानीय तहमा समेत कांग्रेस माओवादीबीच गठबन्धान थियो । कांग्रेस र माओवादीका तर्फबाट २७ वटा वडामा जित हात पारेको छ । स्थानीय तहकाे परिणामलाई हेर्दा गठबन्धनभन्दा एमाले बलियो छ ।

दुवै पक्षले आफ्नो जित निश्चित रहेको दावी गर्दै आएका छन् ।

प्रकाशित मिति: बिहीबार, असोज २७, २०७९ १४:२८