२०४८ सालमै चुनाव जितेका यी तीन दर्जन अनुहार, अहिले पनि उम्मेदवार छन्

A+ A A-

२०४६ को जनआन्दोलनपछि २०४७ मा संविधान जारी भयो । सोही संविधानको जगमा २०४८ मा भएको निर्वाचनलाई नेपालको संसदीय राजनीतिक इतिहासमा महत्त्वका साथ लिइन्छ ।

२०४७ को संविधानले निर्वाचन आयोगको संवैधानिक स्वरूपलाई यथावत् राखेपछि आयोगले संवैधानिक अङ्गका रूपमा निरन्तरता पायो । निर्वाचन आयोगको भूमिका र जिम्मेवारीलाई संविधानले थप स्पष्ट पार्‍यो । यही संवैधानिक व्यवस्थाअनुसार २०४८ मा प्रतिनिधिसभाको निर्वाचन भएको हो ।

यो निर्वाचन मुलुकको संसदीय इतिहासमा दोस्रो र बहुदलीय प्रजातन्त्रको पुनर्स्थापनापछिको पहिलो चुनाव हो ।

२०४८ सालयता छवटा संसदीय चुनाव भइसकेका छन् । आगामी मंसिर ४ मा सातौँ निर्वाचन हुने तयारी छ । ३१ वर्षयताका यी सात चुनावमा करिब तीन दर्जन प्रतिस्पर्धी अनुहारहरू भने उनै छन् ।

२०४८ सालको निर्वाचनमा विजयी भएकाहरूले अहिले पनि उम्मेदवारी दिएका छन् । त्यसमध्ये करिब एक दर्जा उम्मेदवार लगातार मैदानमा छन् भने दुई दर्जन उम्मेदवार बीचमा छुटेका देखिन्छन् । अझ रोचक त के छ भने, २०४८ सालदेखि लगातार चुनाव जितेकाहरू पनि आगामी चुनावको मैदानमा उत्रिइसकेका छन् ।

२०४८ यता लगातार जित, फेरि पनि मैदानमा

नेपाली कांग्रेसका सभापति तथा प्रधानमन्त्री शेरबहादुर देउवाले आगामी चुनावका लागि पनि डेडेलधुरा- १ बाट प्रतिनिधिसभा सदस्यमा उम्मेदवारी दिएका छन् । त्यस्तै, कांग्रेसनेता विजयकुमार गच्छदारले सुनसरी- १ बाट उम्मेदवारी दिएका छन् । यी दुई पात्र २०४८ सालयताका सबै निर्वाचनमा भाग लिएर निर्वाचित हुँदै आएका छन् ।

यी दुई पात्रमा देउवाले संसदीय चुनावमा कहिल्यै पराजय व्यहोरेका छैनन् । गच्छदार भने दुईवटा निर्वाचन क्षेत्रबाट लड्ने क्रममा एउटामा पराजित भए पनि अर्को निर्वाचन क्षेत्रबाट विजयी भएका थिए । सोही कारण उनी २०४८ यताको संसदमा निरन्तर पुगेका छन् ।

देउवाले २०४८ सालदेखि हालसम्म कुनै पनि निर्वाचन हारेका छैनन् । यसपटक उनले सातौँपटक जितका लागि उम्मेदवारी दिएका छन् । देउवाले लगातार तीनपटक माओवादी केन्द्रका नेता खगराज भट्टलाई पराजित गरेका थिए, अहिले भने देउवाका प्रतिस्पर्धी भट्ट छैनन् ।

लगातार निर्वाचन जितेर पनि नथाक्‍ने अर्का नेता हुन् गच्छदार । गच्छदारले नेपाली कांग्रेसबाट २०४८, २०५१ र २०५६ र २०७४ को निर्वाचन जितेका थिए । २०६४ सालको संंविधानसभा निर्वाचन मधेसी जनाधिकार फोरमबाट जितेका थिए । २०७० सालको निर्वाचन आफैँले नेतृत्व गरेको पार्टी फोरम लोकतान्त्रिकबाट जित निकालेका थिए ।

२०७० को संविधानसभा निर्वाचनमा गच्छदारले २ क्षेत्रबाट उम्मेदवारी दिएका थिए । त्यसबेला मोरङबाट भने पराजित भएका थिए ।

छपटक उम्मेदवार, पाँचपटक विजयी, फेरि प्रतिस्पर्धामा

नेकपा एमालेका अध्यक्ष केपी शर्मा ओली, नेकपा एकीकृत समाजवादीका अध्यक्ष माधवकुमार नेपाल, एकीकृत समाजवादीका नेता झलनाथ खनाल, कांग्रेसनेता रामचन्द्र पौडेल ४ मंसिरको निर्वाचनसहित सातपटक मैदानमा छन् । सम्पन्न भएका छवटा निर्वाचनहरूमध्ये पाँचवटा निर्वाचनमा उनीहरू विजयी भएका थिए भने एउटामा पराजित ।

एमाले अध्यक्ष केपी शर्मा ओलीले विगतमा लडेका छवटा निर्वाचनमध्ये २०६४ सालमा पराजित भए । उनी माओवादीका विश्वदीप लिङ्देन लिम्बूसँग २ हजार मतले पराजित भएका थिए । २०६४ को निर्वाचनबाहेक उनी सबै निर्वाचनमा विजयी भएका छन् ।

एकीकृत समाजवादीका अध्यक्ष माधवकुमार नेपाल पनि २०६४ सालमा नै पराजित भएका थिए उनी यसअघि एमालेको प्रतिनिधित्व गर्दै निर्वाचन लड्दै आएकोमा अहिले एकीकृत समाजवादीको तर्फबाट रौतहटबाट निर्वाचन लड्दैछन् ।

त्यस्तै, एकीकृत समाजवादीका सम्मानित नेता झलनाथ खनालले पनि २०४८ यता छवटा चुनाव लडे । त्यसमध्ये २०५६ को चुनावमा उनी पराजित भए भने अन्य सबै चुनाव जित्दै आएका छन् ।

त्यस्तै, स्वतन्त्र उम्मेदवार हृदयेश त्रिपाठी पनि विगतमा छवटा निर्वाचनमध्ये २०७० सालमा भएको दोस्रो संविधानसभाको निर्वाचनमा पराजित भए पनि त्यसबाहेकका सबै निर्वाचन जितेका छन् ।

जो २०४८ सालमा नै निर्वाचित भएका थिए, अहिले पनि उम्मेदवार छन्

२०४८ सालमै चुनाव जितेर संसद छिरेका झण्डै तीन दर्जन नेताहरू अहिले पनि चुनावी मैदानमा छन् । त्यसमध्ये केही लगातार संसदमा छन् भने केही बीचमा संसदबाहिर थिए ।

नेकपा एसका नेता विरोध खतिवडा २०४८ मै प्रतिनिधिसभामा निर्वाचित भएका थिए । उनले बीचका दुईवटा निर्वाचनमा टिकट पाएनन् । तर, खतिवडाले प्रतिस्पर्धा गरेका सबै चुनाव जितेका छन् । २०४८ यता उनी चारपटक निर्वाचित भएका छन् ।

त्यस्तै, चारपटक निर्वाचित हुनेमा कांग्रेस नेता कृष्णप्रसाद सिटौला पनि हुन् । २०४८ मा चुनाव जितेका र अहिले मैदानमा उत्रिएका उम्मेदवारहरूको संख्या करिब तीन दर्जन रहेको छ ।

हेर्नुस् सूची

प्रकाशित मिति: मंगलबार, असोज २५, २०७९ १५:२२