एकै पार्टीका आधिकारिक दुई टिकटमा सहमति नभए ‘फस्ट कम फस्ट’

A+ A A-

रूपन्देहीको क्षेत्र नम्बर ५ बाट प्रतिनिधि सभा सदस्यमा एमालेका दुई जनाले उम्मेदवारी दर्ता भयो । आइतबार दिउँसो एमाले बाटै बासुदेव घिमिरे र खिमलाल भट्टराईले उम्मेदवारी दर्ता गरे । जिल्लामा रहेका घिमिरले पहिला उम्मेदवारी दर्ता गरेका हुन् भने काठमाडौंमा रहेका भट्टराईले केही ढिलो गरी मनोनयद दर्ता गरे ।

घिमिरेलाई सुरुमा टिकट दिए पनि अन्तिम समयमा अध्यक्ष केपी शर्मा ओलीले खोसेर भट्टराईलाई टिकट दिएका थिए । घिमिरेले आफू नै आधिकारिक उम्मेदवार रहेको भन्दै दिउँसो ३ बजे उम्मेदवारी दर्ता गरे । भट्टराईले निर्वाचन कर्यालय रूपन्देही क्षेत्र नम्बर ५ लाई उम्मेदवारी सच्चाइएको पार्टीको आधिकारिक पत्रसहित उम्मेदवारी दर्ता गरे । निर्वाचन अधिकृतका कार्यालयले दुवै उम्मेदवारलाई मनोनयम दर्ता गरेको पत्र दियो । छानबिनपछि अन्तिम उम्मेदवरको नामावली सार्वजनिक आयोगले गर्नेछ ।

घिमिरे तिलोत्तमा नगरपालिका पूर्व नगरप्रमुख हुन् । नगर क्षेत्रमा लोकप्रिय भए पनि उनी अर्को क्षेत्रमा गएर उम्मेदवारी दिएका हुन् । एमालेको विष्णु पौडेल गुटमा रहेका घिमिरे तिलोत्तमा दोहोरिन चाहान्थे । तर, शंकर पोखरेल गुटले रोकेको कारण उनले नगर प्रमुखमा दोहोरिन पाएनन् ।

भट्टराई एमालेको तर्फबाट राष्ट्रियसभाका प्रमुख सचेतक समेत हुन् । उनी पनि एमालेमा पौडेल गुटका हुन् । दुवै एकै गुटको भएपनि टिकटको लागि लफडा भएको छ । ‘पार्टीले पहिलो टिकट रद्द गरिसकेको छ । मै आधिकारिक उम्मेदवार हुँ,’ भट्टराईले शिलापत्रसँग भने, ‘अब निर्वाचन आयोगले के गर्छ हेर्नुपर्छ ।’

यता बर्दिया क्षेत्र नम्बर १ मा पनि उस्तै घटना भयो । सो क्षेत्रमा नेपाली कांग्रेसका तर्फबाट दुई जनाको उम्मेदवारी परेको छ । कांग्रेस केन्द्रीय सदस्य सञ्जय गौतम र जिल्ला सभापति अरुणप्रकाश सिंह राठौरले उम्मेदवारी दर्ता गराए । दुवै जनालाई पार्टीले आधिकारिक टिकट दिएको छ । कांग्रसभित्रको गुटगत शक्ति संघर्षको परिणाम थियो दुईवटा आधिकारिक टिकट । गौतम इतर समूहका प्रभावशाली नेतामध्ये एक हुन् भने राठौर संस्थापन समूहका । उनी सहमहामन्त्री किशोरसिंह राठौर नजिक छन् । इतर समूहको माग र आफ्नैमा सहमहामन्त्रीले टिकट मागेपछि तत्कालको घाँडो पन्छाउने उपाय सभापति शेरबहादुुर देउवाले अपनाएका हुन् ।

‘मलाई संसदीय समिति र कार्यसम्पादन समितिले निर्णय गरेर टिकट दिएको हो, मैले आधिकारिकता हो भनेर खोज्नुपर्दैन स्वतः आधिकारिक हुँ,’ गौतमले शिलापत्रसँग भने, ‘पार्टीले मलाई आधिकारिकता दिएर पठाएपछि त्यस्तो नगर्नुपर्ने गल्ति गर्‍यो ।’ पार्टी नेतृत्वबाट आधिकारिकता पाउने आश्वासन गौतमले पाएका छन् । ‘मैले पाएको टिकट नै आधिकारिक हुने जानकारी पार्टी नेतृत्वप्रंक्तिबाट पाएको छु,’ गौतमले भने ।

पहिला राठौरले मनोनयन दर्ता गराए भने पछि गौतमले । उता राठौर पार्टीको आधिकारिक निर्णय पर्खिएका छन् । ‘मैले पहिला आधिकारिक टिकट ल्याएर उम्मेदवारी दर्ता गराएको हुँ । दोस्रोमा कसले दर्ता गरायो त्यो गलत हो,’ राठौरले शिलापत्रसँग भने, ‘यसबारे पार्टीले को आधिकारिक भनेर निर्णय गर्ला ।’

निर्वाचन आयोगका अुनुसार ‘फस्ट कम फस्ट’ हुनेछ । दोस्रो व्यत्ति आधिकारिक उम्मेदवा हुनका लागि दुवै उम्मेदवार र राजनीकि दल सहमत हुनुपर्ने छ ।

‘पार्टी र दुई उम्मेदवारले सहमति गरेको खण्डमामात्र दोस्रो व्यक्तिले आधिकारिकता पाउनेछन्,’ निर्वाचन आयोगका प्रवक्ता शालिग्राम शर्माले शिलापत्रसँग भने, ‘सहमति नभएको खण्डमा पहिले दर्ता गराएको उम्मेदवारले नै आधिकारिकता पाउनेछन् ।’ याे विषयमा सम्बन्धित जिल्ला निर्वाचन अधिकृत कार्यालयले निर्णय गर्नेछ । कानुनी रुपमा प्रष्ट नभए पनि व्यवहारिक हिसाबले मिलाउँदा दलहरूलाई सहज हुने शर्माले बताए ।

प्रकाशित मिति: सोमबार, असोज २४, २०७९ १६:१३