लोकतन्त्रको उत्सव : काेही उम्मेदवारहरू बाटाेमै अलपत्र, कसैले केन्द्रबाटै दिए उम्मेदवारी

लोकतन्त्रको उत्सव : काेही उम्मेदवारहरू बाटाेमै अलपत्र, कसैले केन्द्रबाटै दिए उम्मेदवारी

A+ A A-

४ मंसिरमा हुने प्रतिनिधिसभा र प्रदेशसभा सदस्य निर्वाचनका लागि उम्मेदवारहरूले आइतबार मनोनयन दर्ता गरे । निर्वाचन आयोगका अनुसार देशभर शान्तिपूर्ण रूपमा मनोनयन दर्ता भयो । तर, बाढीपहिरो र हिमपातका कारण कर्णाली, सुदूरपश्चिम र लुम्बिनी प्रदेशका जिल्लाहरूमा कतिपय पार्टी र स्वतन्त्र उम्मेदवारहरूले आफैँ आफ्नो निर्वाचन क्षेत्रमा गएर मनोनयन दर्ता गर्न पाएनन् ।

कोहीले वारेसबाट त कोहीले निर्वाचन आयोगको केन्द्रीय कार्यालय काठमाडौंमा नै उम्मेदवारीको कागजात पेस गरे । उक्त कागजात आयोगले सम्बन्धित निर्वाचन अधिकृतको कार्यालयमा पुर्‍याउने काम गर्‍यो । लोकतन्त्रको उत्सवको दिन आफैँ आफ्नो निर्वाचन क्षेत्रमा जान नपाएकोमा उम्मेदवारहरू खिन्न देखिन्थे । हुम्लाबाट प्रदेश र प्रतिनिधिसभा सदस्यका लागि नेकपा एमालेको टोलीले निर्वाचन आयोगको केन्द्रीय कार्यालयमा आएर कागजात पेस गर्‍यो । पार्टीले दिएको टिकटसहितको कागजात उनीहरूले आयोगको केन्द्रीय कार्यालयमा बुझाए ।

प्रतिनिधिसभातर्फ दल रावल र प्रदेशतर्फ क मा दल फडेरा र ख मा छक्कबहादुर लामाले मनोनयन दर्ताका लागि कागजात बुझाएका हुन् । ‘पाँच दिनदेखि हुम्लामा हिमपात भएको छ । जहाज गएको छैन । सडक सुविधा भएको भए पुग्ने थियौँ । सडक पनि भएन,’ प्रतिनिधिसभातर्फका उम्मेदवार दल रावलले भने, ‘यो लोकतनन्त्रको उत्सव हो । उत्सवको दिन आफ्नो क्षेत्रमा जान सकेनौँ ।’

काठमाडौंमा कागजात बुझाएका उनीहरूले अब सडक पुर्‍याउने वाचा भने गरे । ‘मौसम खुलेपछि आफ्नो क्षेत्रमा जान्छौँ । अब सडक पुर्‍याउने हो,’ उनले थपे ।

उम्मेदवार बाटोमै अलपत्र

काठमाडौं आएर पार्टीबाट टिकट लिएर आफ्नो क्षेत्रमा हिँडेका कतिपय उम्मेदवारहरू बाटोमै अलपत्र परे । बाढीपहिरो र पानी परेका कारण बाटोमै रोकिएका हुन् । ‘पार्टीको पत्र लिएर उम्मेदवारहरू कर्णाली, लुम्बिनी र सुदूरपश्चिममा आफ्नो क्षेत्रमा जानुभएको थियो । २० गते हिँडेको आजसम्म पुग्नुभएको छैन । उम्मेदवार बाटोमै रोकिएपछि उम्मेदवारको डकुमेन्ट बुझाउन आएका हौँ,’ नेमकिपाका नेता प्रेम सुवालले भने ।

बाटोमा अलपत्र परेका र जान नपाएकाहरूकको हकमा भने सहजीकरण गरेर मनोनयन दर्ता गरिएको आयोगले जनाएको छ । ‘सम्बन्धित निर्वाचन अधिकृतको कार्यालयमा पुगी मनोनयन दर्ता गर्न नसक्ने उम्मेदवारहरूका हकमा सम्बन्धित दलले उम्मेदवार मनोनयन गरेको औपचारिक पत्र, प्रतिनिधि मुकरर गरिएको पत्रलगायत आवश्यक कागजात आयोग तथा आयोगअन्तर्गतका निर्वाचन कार्यालयले बुझी सम्बन्धित निर्वाचन अधिकृतको कार्यालयमा पठाई सहजीकरण गरिएको छ,’ आयोगका प्रवक्ता शालिग्राम शर्मा पौडेलले भने ।

पार्टीले टिकट ढिला दिँदा...

दिउँसोसम्म पार्टीले टिकट दिने नदिने निश्चित थिएन । टिकटका लागि उम्मेदवाहरू शीर्ष नेताहरूकोमा धाइरहेका थिए । त्योमध्येका एक हुन् नेपाली कांग्रेसका सिन्धुलीका छेत्रबहादुर बम्जन । उनले आइतबार दिउँसो मात्र सिन्धुली प्रदेश २ क को टिकट हात पारे । ढिला गरी टिकट पाएकाले उनी आफ्नो निर्वाचन क्षेत्रमा पुग्न भ्याएनन् । ‘भर्खर टिकट पाइयो । उता जान भ्याइएन । पुग्दा समय सकिने भएकाले यतैबाट कागजात पठाएको,’ उनले भने । कांग्रेस, एमाले, माओवादी, जसपालगायतका कतिपय उम्मेदवाहरूले ढिला गरी टिकट पाएकाले आयोगको केन्द्रीय कार्यालयमा नै आएर कागजात पेस गरे ।

दसैँको असर : उत्साह देखिएन

यसअघिका निर्वाचनमा मनोनयन दर्ताको दिन दलबलसहित उम्मेदवारहरू मनोनयन दर्ता गर्न जाने चलन थियो । तर, यसपटक त्यो दृश्य देखिएन । दसैँ पर्वका कारण पनि नेता तथा कार्यकताहरू जिल्लाभन्दा बाहिर रहेको र पर्वको माहौल भएकाले उत्साह कम देखियो । अर्कोे कारण हो, आयोगले २५ जनाभन्दा बढी जान रोक लगाउनु ।

तर आयोग भन्छ– उत्साहपूर्ण

निर्वाचन आयोगले उम्मेदवारहरूको मनोनयनपत्र दर्ता गर्ने कार्य उत्साहपूर्ण रूपमा भएको जनाएको छ । शान्तिपूर्ण रूपमा मनोनयनको काम भयो । १६५ मुख्य निर्वाचन अधिकृत कार्यालयमा उम्मेदवारहरूको मनोनयनपत्र दर्ता गर्ने कार्य उत्साहपूर्ण रूपमा भएको छ,’ आयोगका प्रवक्ता शालिग्राम शर्मा पौडेलले भने ।

अहिलेसम्म कति दर्ता भयो ?

प्रतिनिधि र प्रदेशसभा सदस्यका लागि उम्मेदवारहरूले मनोनयन दर्ता गर्ने क्रम अहिले पनि जारी छ । साँझ ७ बजेसम्म प्रतिनिधिसभातर्फ १९३७ पुरुष र १९१ महिला गरी कुल २१२८ उम्मेदवारहरूले आफ्नो उम्मेदवारी दर्ता गरेका छन् । प्रदेशसभातर्फ २६०० पुरुष, २४४ महिला र १ अन्य गरी २८४५ जनाको उम्मेदवारी दर्ता भएको छ ।

प्रदेश १ मा ४४५ पुरुष,४९ महिला गरी ४९४, मधेश प्रदेशमा ७११ पुरुष, ५५ महिला र १ अन्य गरी ७६७, बागमती प्रदेशमा ५६१ पुरुष, ७४ महिला गरी ६३५, गण्डकी प्रदेशमा १९९ पुरुष, २९ महिला गरी २२८, लुम्बिनी प्रदेशमा ४१४ पुरुष, २३ महिला गरी ४३७, कर्णाली प्रदेशमा ७९ पुरुष, २ महिला गरी ८१ र सुदुरपश्चिम प्रदेशमा १९१ पुरुष, १२ महिला गरी २०३ उम्मेदवारहरूले प्रदेशसभा सदस्यका लागि उम्मेदवारी दर्ता भएको छ । आयोगका अनुसार अहिले पनि दर्ता गर्ने काम भइरहेको छ ।

‘कतिपय जिल्ला र निर्वाचन क्षेत्रमा सञ्चार सम्पर्क सहज नभएकाले यकिन विवरण आउन बाँकी छ । कति ठाउँमा इन्ट्रीको काम भइरहेको छ । मनोनयनका लागि अधिकृतको कार्यालयमा छिरेकाको मनोनयन हुँदैछ’, प्रवक्ता पौडेलले भने । मनोनयनका लागि आज बिहान १० बजेदेखि साँझ ५ बजेसम्म समय दिइएको थियो । तर, ५ बजेभित्र निर्वाचन अधिकृतको कार्यालय छिरिसकेका सबैको मनोनयन दर्ता गरिने प्रवक्ता पौडेलले जानकारी दिए ।

उम्मेदवारको विरोधमा उजुरी कहिले ?

आयोगका अनुसार आज उम्मेदवारी दिएका उम्मेदवारको विरोधमा असोज २४ गते उउजुरी दिन सकिने जनाएको छ । आयोगले असोज २४ देखि २५ गतेसम्म मनोनयनपत्र र उजुरीउपर जाँचबुझ गरी निर्णय गर्ने, असोज २५ गते उम्मेदवारको नामावली प्रकाशन गर्ने र असोज २६ गते उम्मेदवारको नाम फिर्ता लिने, उम्मेदवारको अन्तिम नामावली प्रकाशन गर्ने एवम् उम्मेदवारलाई निर्वाचन चिह्न प्रदान गर्ने कार्यक्रम छ ।