मकवानपुरमा कमललाई रोक्न मध्यराति बालकोट पुगे एमाले नेता, रामेश्वरको सम्भावना कति ?

मकवानपुरमा कमललाई रोक्न मध्यराति बालकोट पुगे एमाले नेता, रामेश्वरको सम्भावना कति ?

A+ A A-

नेकपा एमालेको समर्थनमा मकवानपुर–१ बाट प्रतिनिधिसभा निर्वाचन लड्ने तयारी गरेका राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापा संकटमा परेका छन् । थापालाई रोक्न एमाले मकवानपुरका नेताहरू गए राति बालकोट पुगेका हुन् ।

बागमतीका पूर्वमुख्यमन्त्री तथा पार्टी सल्लाहकार परिषद् सदस्य डोरमणि पौडेल, एमाले केन्द्रीय सदस्य तथा जिल्ला इञ्चार्ज रामेश्वर राना, एमाले मकवानपुरका अध्यक्ष एकलाल श्रेष्ठ, जिल्ला सचिव नवीन सिग्देलले गए राति १ बजे बालकोट पुगेर पार्टी अध्यक्ष केपी शर्मा ओलीसँग भेट गरेका छन् ।

ओलीसँगको भेटमा नेकपा एमाले मकवानपुरले जिल्लाका दुवै निर्वाचन क्षेत्रमा पार्टीबाट सिफारिस भएर आएकामध्येबाट उम्मेदवार बनाउन पार्टी नेतृत्वसँग माग गरेको छ । जिल्लास्थित १ र २ नम्बर प्रतिनिधिसभा क्षेत्रमा पार्टीका उम्मेदवार उठाउन माग गरिएको हो । एमालेको समर्थनमा राप्रपा नेपालका अध्यक्ष थापाले १ नम्बर क्षेत्रबाट निर्वाचन लड्ने चर्चा छ ।

तर, एमालेभित्र पार्टीबाट सिफारिस भएकामध्येबाटै उम्मेदवार बनाउनुपर्ने स्वर बलियो बन्दा थापा संकटमा परेका छन् । २०७४ मा नेपाली कांग्रेससँग गठबन्धन गरेर मकवानपुर–१ बाटै प्रतिनिधिसभा लडेका थापा एमाले र माओवादी केन्द्रबीचको बामगठबन्धनका उम्मेदवार कृष्ण दाहालसँग पराजित भएका थिए । एमालेले थापालाई रोक्न खोज्दा उनलाई थप संकट देखिएको छ । १ नम्बर क्षेत्रमा एक्लै लडे निर्वाचन हार्ने डर थापाभित्रै छ ।

१ नम्बर क्षेत्रमा राप्रपाको जनमत राम्रो भए पनि पार्टी छोडेर पुरानै दल (राप्रपा नेपाल) ब्युँताएका थापालाई निर्वाचन जित्न गठबन्धन गर्नुको विकल्प नभएको विश्लेषण छ । एमाले केन्द्रीय सदस्य तथा जिल्ला इञ्चार्ज रामेश्वर रानाको नाम एमालेले १ नम्बर क्षेत्रमा प्रतिनिधिसभाका लागि सिफारिस गरिसकेको छ । रानाको भूगोल २ नम्बर क्षेत्र भए पनि उनलाई १ नम्बर क्षेत्रबाट सिफारिस गरी पठाइएको थियो ।

अध्यक्ष ओलीसँग रानालाई १ नम्बर क्षेत्रबाट उम्मेदवार बनाउनुपर्ने माग राखिएको एमाले मकवानपुरका अध्यक्ष एकलाल श्रेष्ठले जानकारी दिए । उनले अध्यक्ष ओलीसँगको भेट सकारात्मक भएको भन्दै दुई दिनभित्रै उम्मेदवारहरूको नाम टुंगो लाग्ने बताए । पार्टीबाट सिफारिस भएका मध्येबाटै उम्मेदवार बन्नेमा आफू ढुक्क रहेको श्रेष्ठ बताउँछन् । १ नम्बर क्षेत्रमा एमालेले कमल थापालाई समर्थन गरे २ नम्बर क्षेत्रबाट रामेश्वर रानाको सम्भावना कति भनेर शिलापत्रको प्रश्नमा श्रेष्ठले भने, ‘त्यो सम्भावना कम छ । हाम्रो प्राथमिकता दुवै क्षेत्रबाट पार्टीका उम्मेदवार हुनुपर्छ भन्ने हो ।,’

एमालेको ठूलो जनमत रहेको १ नम्बर क्षेत्रमा पार्टीबाटै सिफारिस भएकालाई उम्मेदवार बनाउनु पर्ने भेटमा जोड दिइएको पार्टी जिल्ला सचिव नवीन सिग्देलले बताए । उनले १ नम्बर क्षेत्रबाट राना नै एमालेका आधिकारिक उम्मेदवार हुने बताए । सिग्देलले दुईवटा प्रतिनिधिसभा मात्र नभई चारवटै प्रदेश निर्वाचन क्षेत्रमा पनि पार्टीका उम्मेदवार उठाउनु पर्नेमा अध्यक्ष ओलीसँग कुरा भएको बताए ।

स्रोतका अनुसार भेटमा अध्यक्ष ओलीले कमल थापालाई सहयोग गरेर जानुपर्नेमा जोड दिएको बुझिएको छ । एमाले स्रोतका अनुसार थापाले १ नम्बर क्षेत्रबाट एमालेको समर्थन पाए २ नम्बर क्षेत्रबाट रानालाई उठाउन सक्ने सम्भावना बलियो रहेको बताइएको छ ।

राप्रपा नेपालका महामन्त्री राजाराम बर्तौलाले कमल थापालाई १ नम्बर क्षेत्रमा एमालेको समर्थन रहने बताए । उनले एमाले अध्यक्ष ओली थापालाई उम्मेदवार बनाउने विषयमा सकारात्मक भएको बताए । थापालाई रोक्न एमाले नेताहरू बालकोट पुगे नी भन्ने प्रश्नमा बर्तौलाले भने, ‘आफ्नो पार्टीको उम्मेदवार हुनुपर्छ भनेर जानु स्वभाविकै होला । तर, उहाँहरू रोक्नकै लागि जानु भएको जस्तो लाग्दैन । एमालेले समर्थन गरेमा हाम्रो अध्यक्ष ज्यूलाई जिताउन सबै लाग्नुहुनेछ भन्ने विश्वास छ ।’

प्रकाशित मिति: शनिबार, असोज १५, २०७९ ११:५१