हेटौँडाको ६२ लाख अनुदान दुरुपयोग प्रकरणः छानबिन गर्न अख्तियारलाई परिपत्र

A+ A A-

हेटौँडा औद्योगिक क्षेत्रमा वधशाला खोल्ने नाममा सरकारी अनुदान दुरुपयोग भएको ठहर गर्दै छानबिन गर्न अख्तियार दुरुपयोग अनुसन्धान आयोगको कार्यालय हेटौँडामा परिपत्र गरिएको छ ।

बागमती प्रदेशको कृषि तथा पशुपन्छी विकास मन्त्रालयबाट वधशाला सञ्चालनका लागि बफेलो क्वालिटी फुड प्रालिले लिएको ६२ लाख रुपैयाँ अनुदान दुरुपयोग भएको प्रदेशको सार्वजनिक लेखा समितिले ठहर गरेको हो । प्रदेशभर वितरित कृषि अनुदानको अनुसन्धान गर्न गठित कृषि अनुदान वितरण छानबिन उपसमितिले लेखा समितिलाई वधशालामा अनुदान हिनामिना भएको प्रमाणसहित प्रतिवेदन पेश गरेको थियो ।

लेखा समितिले छानबिन उपसमितिको अनुसन्धान प्रतिवेदनका आधारमा अनुदानग्राहीले सम्झौताविपरीत कार्य नगरी अनुदान दुरुपयोग गरेको भन्दै असुलउपर गर्न मन्त्रालयलाई निर्देशनसमेत दिएको छ । ११ असोजमा समितिले अख्तियारलाई छानबिन अघि बढाउन परिपत्र र मन्त्रालयलाई तत्काल बफेलो क्वालिटी फुड प्रालिलाई कारबाहीको दायरामा ल्याई अनुदान रकम असुलउपर गर्न निर्देशन दिएको समिति सचिव दिपक अधिकारीले जानकारी दिए ।

समितिको निर्देशनपछि मन्त्रालयले अनुदानग्राहीलाई पत्राचार गर्ने तयारी गरेको मन्त्रालयका प्रवक्ता तथा योजना महाशाखा प्रमुख झलकनाथ कँडेलले बताए । ‘११ गते निर्देशन दिइएको रहेछ । हामीसँग १२ गतेमात्रै पत्र प्राप्त भयो । अब अनुदानग्राहीलाई पत्र काट्ने प्रक्रिया अगाडि बढाउँदै छौं । पत्र भने काटेका छैनौं,’ कंडेलले भने ।

बफेलो फुड मुस्लिम आयोगका अध्यक्ष समिम मिया अन्सारीको कम्पनी हो । राजनीतिक पहुँचका आधारमा अनुदान लिएर त्यसको दुरुपयोग हुँदासमेत प्रदेशको कृषि तथा पशुपन्छी विकास मन्त्रालयले कारबाही गर्न सकेको थिएन । सम्झौतामै अनुदान रकम दुरुपयोग हुन सक्ने देखेमा एक पटकलाई सचेत गराउने र सुधार नदेखिए एक पक्षीय रुपमा सम्झौता भंग गर्ने तथा हिनामिना भए बराबरको रकम दोस्रो पक्ष (बफेलो क्वालिटी फुड)बाट सरकारी बाँकी सरह असुलउपरको प्रक्रिया अगाडि बढाउन सक्ने उल्लेख छ ।

तर, मन्त्रालयले आफ्नै सम्झौता कार्यान्वयन गरेको थिएन् । सार्वजनिक लेखा समितिले पनि मन्त्रालयले कारबाही प्रक्रिया अगाडि बढाउनेमा आशंका व्यक्त गर्दै अख्तियारलाई छानबिन गरेर दोषिलाई कानुनी कारबाहीको दायरामा ल्याउने गरी परिपत्र गरेको छानबिन उपसमितिका एक सदस्यले जानकारी दिए । बफेलो क्वालिटी फुड प्रालिले प्रदश सरकारसँग वधशाला सञ्चालन गर्ने नाममा ६२ लाख २२ हजार ५ सय रुपैयाँअनुदान लिएको थियो ।

वधशालाको कुल परियोजनालागत १ करोड ४२ लाख ८४ हजार हो । सम्झौताअनुसार वधशाला सञ्चालनको लागत इष्टिमेट अनुसारको रकमको ५० प्रतिशत बढीमा ७१ लख ४२ हजार भुक्तानी हुने भनिएको छ । बफेलो क्वालिटी फुडले १ करोड ३१ लख १९ हजार ५ सय २४ रुपैयाँको सञ्चालन खर्च पेश गरेपछि ६२ लाख २२ हजार ५ सय रुपैयाँ अनुदान पाएको हो । सरकारको अनुदानसँगै उद्योगको मेसिनसँगै अस्तित्व नै गायव छ ।

उक्त जग्गासमेत एसियन पेन्ट्स कम्पनीले भाडामा लिएको छ । संरचनासहित बफेलो फुडले वधशाला त्रिशक्ति पोलिब्याग इण्डष्ट्रिजलाई १२ करोडमा बिक्री गरेको थियो । वधशालाको मेसिन कवाडीमा बिक्री गरिएको थियो । बफेलो फुडले १६ जेठ २०७६ साउनमा तत्कालीन भूमि व्यवस्था कृषि तथा सहकारी मन्त्रालयसँग हेटौँडा औद्योगिक क्षेत्रमा वधशाला सञ्चालन गर्नेभन्दै अनुदान लिन सम्झौता गरेको थियो । वधशालाको उद्घाटन गरिए पनि नियमित सञ्चालन नगरी बफेलो फुड केही समयभित्रै औद्योगिक क्षेत्रबाट हिँडेको थियो ।

सार्वजनिक लेखा समिति सभापति न्हुछेनारायण श्रेष्ठले दुरुपयोग भएको अनुदान रकम असुलउपर गर्न ढिलाई गर्न नहुने बताए । अनुदान प्राप्त गरेको छोटो समयमा नै उपकरण र संरचनाहरु योजनास्थलमा नहुनुले भ्रष्टाचार भएको ठहर गर्दै अनुदान प्रदान गर्ने निर्णयमा मुख्य भूमिका निर्वाह गर्नेहरुमाथि कारबाही गर्न निर्देशन दिएको बताए । कृषि अनुदान वितरण छानबिन उपसमिति संयोजक मुनु सिग्देल, सदस्यहरु ओमबहादुर ग्लान, प्रदीप खड्का लगायतले घटनाको अनुसन्धान गरेका थिए ।

प्रकाशित मिति: शुक्रबार, असोज १४, २०७९ १६:१४