उसुकी निमा भन्छिन्– दसैँमा थोरै खानुहोस्, स्वस्थ रहनुहोस्

A+ A A-

निमा घर्तीमगर दक्षिण एसियाली खेलकुद (साग) प्रतियोगितामा दुईपटक स्वर्ण पदक जित्ने खेलाडी हुन् । उसुकी निमाले योपटकको बडादसैँ कसरी मनाउँदैछिन् ?

बाल्यकालमा मनाइने दसैँ अब उस्तै रहेन । यहाँ हरेक वस्तुको अवस्था परिवर्तित छ । हाम्रो लागि दसैँ पनि यस्तै हो । बाल्यकालमा मनाइने त्यो दसैँ र अहिले मनाइने दसैँ धेरै फरक छ । यस्तै लाग्छ निमालाई पनि । सन् २०१६ मा भारतमा सम्पन्न १२औँ सागमा नेपालले तीनवटा मात्रै स्वर्ण पदक जित्दा, निमाको नाममा एउटा स्वर्ण पदक थियो । उनै निमाले २०१९ मा नेपालमा सम्पन्न १३औँ सागमा पनि स्वर्ण नै जितिन् ।

आर्मी क्लबमा कन्ट्र्याक्टमा खेल्दै आएकी निमा अहिले नवौँ राष्ट्रिय खेलकुदको तयारीमा छिन् । गण्डकी प्रदेशमा असोज २८ देखि कात्तिक ३ गतेसम्म प्रतियोगिता हुँदैछ । राष्ट्रियस्तरको सबैभन्दा ठूलो प्रतियोगिता भनेकै यही हो । नवौँ राष्ट्रिय प्रतियोगिताको तयारी गरिरहेकी उसुकी निमा घर्तीमगरलाई दसैँसम्बन्धी दश प्रश्नः

योपटकको दसैँ कसरी मनाउँदै हुनुहुन्छ ?

दसैँमा जुन किसिमको रमाइलो हुन्थ्यो, त्यो योपटक हुँदैन । नवौँ राष्ट्रिय खेलकुदले गर्दा दसैँ खासै स्पेसल हुँदैन । खेलकै दबाब हुन्छ । ध्यान नै खेलतिर हुन्छ । टीकाको दिन बिदा त हुन्छ । घरमा ठूलाबडाको हातबाट आशीर्वाद लिने हो । तर, पहिलेको जस्तो हुँदैन ।

खेलाडी भइसकेपछि आफूलाई सधैँ फिट राख्नुपर्ने हुन्छ । दसैँलगत्तै नवौँ राष्ट्रिय खेलकुद प्रतियोगिता हुँदैछ । खानपिनमा खेलाडीले कत्तिको ध्यान दिनु आवश्यक छ ?

खाने कुरामा धेरै ध्यान दिनुपर्छ । झन् दसैँ भएका कारणले स्वाभाविक रूपमा सबैको घरमा मासुदेखि अत्यधिक चिल्लो खानेकुराहरू, जङ्क फुडदेखि मद्यपानहरू खाने गरिन्छ । हामीले ध्यान दिनुपर्ने नै यसैमा छ । हामी प्रतियोगिताको मुखैमा छौँ । शरीरलाई आवश्यकभन्दा धेरै खानेकुरा खानु भएन । जस्तो पखाला नै लागिहाल्यो भने पनि नवौँ प्रतियोगिता गुमाउने सम्भावना हुन्छ । त्यसैले दसैँ भन्दैमा आफ्नो करिअरलाई नै धक्का पुग्ने गरी गर्नु भएन ।

सानो छँदा तपाईंको दसैँ कस्तो हुने गरेको थियो ?

दसैँको बिदा भन्नेबित्तिकै स्कुले जीवनमा छुट्टै उत्साह आउँथ्यो । आफन्तहरूसँग रमाइलो गर्ने, टीका लगाउने, दक्षिणा थाप्ने, पिङ खेल्ने गरिन्थ्यो । धेरै नै रमाइलो हुन्थ्यो त्यो बेला ।

आफूले मागेको कुरा पूरा नहुँदा दसैँमा रुनुभएको छ ?

दसैँमा नयाँ लुगा त चाहियो भनेपछि चाहिन्थ्यो नै । पूरा गरिदिनु पनि हुन्थ्यो ।

विगतका दसैँहरू कसरी मनाउनुभयो ?

आफन्तहरूसँग भेट्ने, ठूलाबडाको हातबाट आशीर्वाद लिने गरिन्थ्यो । साथीहरूसँग भेट्ने । रमाइलोका लागि तास खेल्ने, लेट नाइट बसिन्थ्यो । योपटक पनि हुन त हुन्छ तर मचाहिँ परिवारसँग टीकाको दिन मात्रै हुन्छु । टीकाकै भोलिपल्टदेखि अभ्यास सुरु हुने भएकाले योपटकको दसैँचाहिँ अलिक खल्लो होला ।

परिवारले उता दसैँ मनाइरहँदा तपाईं काठमाडौंमै भएर पनि त्यो रमाइलोमा सामेल हुन नपाउँदा कत्तिको मिस हुन्छ ?

टीका त म लगाउँछु । तर, उहाँहरूले जसरी मनाउनुहुन्छ । रमाइलो गर्नुहुन्छ । त्यो समयमा चाहिँ म हुँदिनँ, त्यति मात्रै हो ।

पहिलेको दसैँ र अहिलेको दसैँमा के फरक पाउनुहुन्छ ?

धेरै फरक छ । पहिले सानै भएर होला, समय धेरै हुन्थ्यो । केही गर्नुपर्दैनथ्यो । कहिले दसैँ आउँछ र टीका लगाएर दक्षिणा पाइन्छ भन्ने हुन्थ्यो । तर, अहिले भने हरेक कुराको ध्यान दिनुपर्छ । एउटा खेलाडी भइसकेपछि देशसँग जोडिएर आउँछ । आफूलाई सधैँ राम्रो बनाइराख्न त्यहीअनुसारको परिश्रम चाहिन्छ । एउटा उद्देश्य लिएर हिँडेपछि दसैँलगायतका चाडपर्वहरूप्रति खासै ध्यान नजाँदोरहेछ ।

तपाईंलाई दसैँमा सधैँ याद आइरहने पलचाहिँ के छ ?

बाजेबोजूको हातबाट टीका लगाउने क्षणचाहिँ याद आइरहन्छ ।

दसैँकै लागि भनेर विशेष किनमेल गर्नुभएको छ ?

त्यस्तो विशेष त छैन तर घरमा आवश्यक पर्ने सामग्रीहरू भने सधैँ किन्छु । अब लुगाहरू त किनिहालिन्छ ।

सबै नेपालीहरूलाई दसैँमा के सन्देश दिन चाहनुहुन्छ ?

सबैलाई दसैँको शुभकामना छ । आफ्नो स्वास्थ्यको ख्याल गर्नुहोला । मदिरा सेवन गरेर सवारी नचलाइदिनुहोला । दुर्घटना हुने सम्भावना धेरै हुन्छ । सबै जनाले रमाइलोका साथ दसैँ मनाउनुहोस् । शुभकामना ।

प्रकाशित मिति: आइतबार, असोज १६, २०७९ १५:५२