भ्रष्टाचारीलाई संरक्षण गर्ने व्यवस्था बदल्न मेरो उम्मेदवारीः मनोज पण्डित (भिडियो वार्ता)

भ्रष्टाचारीलाई संरक्षण गर्ने व्यवस्था बदल्न मेरो उम्मेदवारीः मनोज पण्डित (भिडियो वार्ता)

A+ A A-

काभ्रेको एक मध्यम वर्गीय परिवारमा जन्मिएका हुन्, मनोज पण्डित । उनका बाबु नेपाल विद्युत् प्राधिकरणका कर्मचारी थिए ।

मनोजका अनुसार सरल र इमान्दार स्वभावका उनका बाबुले कमाउन दायाँबायाँ गरेनन् । तर, मनोजले त्यस्ता मानिस पनि देखेका छन्, जो सामान्य कर्मचारी भए पनि धेरै कमाइ गर्थे । आर्थिक रूपमा सम्पन्न थिए । त्यति मात्र नभएर आफ्नै उमेर समूहका बालबच्चाले हेप्ने गरेको मनोज सम्झिन्छन् ।

२०४६ सालतिरको कुरा हो । जतिबेला नेपालमा भर्खर सादा टेलिभिजन भित्रिएको थियो । गाउँमा हुनेखानेले टेलिभिजन किने । मनोजका बुबाले टेलिभिजन किन्न सकेनन् । मनोज टेलिभिजन हेर्न अरुकोमा जान थाले । अर्काको घरमा टीभी हेर्न जाँदा मन लाग्दा खोल्ने र मन नलाग्दा बन्द गर्ने, ढोकाबाहिर कुराउनेजस्ता व्यवहार भएको मनोजले अहिले पनि बिर्सिएका छैनन् । यस्तो व्यवाहार हुँदा उनलाई आफू हेपिएको र अपमानित भएको महसुस हुन्थ्यो ।

उनले मनमनै अठोट गरे, अहिले जे चिज हेर्न पाइन भोलि म त्यसैमा सक्षम बन्छु ।

मनोजले इन्जिनियरिङ या मेडिसिन पढोस् भन्ने बुबाको चाहना थियो । बुबाको चाहनाअनुसार नै मनोज मेडिसिन पढ्ने तयारीमा थिए । त्यति बेला काठमाडौंमा नेपालकै पहिलो फिल्म कलेज आभास सुरु हुँदै थियो । मनोजको मनमा छटपटाहट भयो- मेडिसिन पढ्ने कि फिल्म पढ्ने ?

manoj-pandit (3)1664373832.jpg

नेपाल टेलिभिजनमा आभास कलेजको विज्ञापन देखेपछि उनले निर्णय गरे– जे सुकै होस् म फिल्म पढ्छु । उनी आभासमा भर्ना हुनु भनेको बुबाको सपनालाई कुल्चनु थियो । मनोजले त्यही गरे । जसले गर्दा बुबासँगको सम्बन्ध बिग्रियो । उनी फिल्म मात्र पढ्दै थिएनन्, आफ्नो सपनालाई विपनामा बदल्दै थिए ।

२२ वर्षकै उमेरमा मनोजले नेपाली सिनेमालाई फरक धारमा लैजाने लक्ष्यका साथ 'लक्ष्य' नामक सिनेमा बनाए । तर लक्ष्य असफल भयो । त्यो असफलताले उनलाई बलियो विषयवस्तु उठाउनुपर्छ, जसले विद्यमान राज्य व्यवस्थालाई नै चुनौती देओस् भन्ने सिकायो । नेपाली सिनेमामा कथा छनोटको अभाव रहेको महसुस गरे ।

त्यसपछि मनोजले मदन भण्डारीको दुर्घटनाको कथामा आधारित 'दासढुङ्गा' निर्माण गरे । जसले नेपाली सिनेमालाई आधुनिकीरण गर्न योगदान पुर्‍याएको उनी महसुस गर्छन् ।

त्यही क्रममा उनी आफ्नो धरातल के हो ? मेरो पहिचान र भूगोल कुन हो भनेर घोत्लिन थाले ।

देशको गुम्दै गएको भूभागको तथ्य र प्रमाण खोज्न थाले । पहिलो चरणमा मिचिएको भूभागका विषयमा लेखिएका पत्र पत्रिका संकलन गर्ने क्रममा एउटा चाङ नै बन्यो । उनले सोचे ओ हो, कागज त यति धेरै छ भने भूगोल त कति मिच्यो होला ?

manoj-pandit (2)1664373830.jpg

मिचिएका भूगोलमा पुगे । जहाँ पुग्दै गर्दा उनलाई बाल्यकालमा अरुकोमा टेलिभिजन हेर्न जादाँ भन्दा धेरै अपमानको महसुस भयो । 'मेरो अस्तित्व कति कमजोर रहेछ त ? म कति कमजोर रहेछु ? भन्ने महसुस गरेँ,' उनी भन्छन् । यही विषयवस्तुमा आधारित रहेर ‘ग्रेटर नेपाल’ नामक डकुमेन्ट्री बनाए । त्यहीँबाट उनको जीवन परिर्वतन भयो ।

देशले गुमाएका र मिचिएका देशका भूगोलमा उभिदै गर्दा मनोजमा राष्ट्र, राष्ट्रियता र देश भन्ने भाव गहिरो रूपमा बस्न पुग्यो । चलचित्र क्षेत्रको निर्देशक भइरहँदा आफूभित्र भइरहने चरित्र सृजनशिलता हो ।

गत स्थानीय चुनावताका भ्रष्ट राजनीतिज्ञले सामान्य नेपालीको आत्मसम्मानलाई कसरी दुत्कारीरहेको छ भन्ने अनुभूत गरे । सोही कारण आगामी संसदीय चुनावमा काभ्रेपलाञ्चोक–२ बाट स्वतन्त्र उमेदवारीको घोषणा गरेका छन् । यो एमाले नेता गोकुल बाँस्कोटाको निर्वाचन क्षेत्र हो ।

उनी भन्छन्, 'यो जुन प्रणाली छ, जसले भ्रष्टाचारीलाई संरक्षण गर्छ । जुन प्रणालीमा एउटा सामान्य कर्मचारीले समेत भ्रष्टचार गर्ने सामर्थ्य राख्छ । यसलाई बदल्नु आवश्यक छ । अब हामीले त्यस्तो संरचना, नीति बनाउनु छ । जसले प्रत्येक नागरिकलाई स्वतन्त्र हुने अनुभूति गराउँछ ।'