प्रभावशाली नेताले टिकट नपाउने देखेपछि कांग्रेसमा 'विद्रोह', यी हुन् शेखरले दाबी गरेका ३२ क्षेत्र

प्रभावशाली नेताले टिकट नपाउने देखेपछि कांग्रेसमा 'विद्रोह', यी हुन् शेखरले दाबी गरेका ३२ क्षेत्र

A+ A A-

कांग्रेसले निर्वाचन आयोगमा बुझाएको प्रतिनिधिसभा समानुपातिक उम्मेदवारको सूची बाहिरिँदा कोइराला पक्षका नेता आफ्नो पक्षको कमजोर उपस्थिति देखेपछि झस्किए । ११० मध्ये ११९ जनाको मात्र नाम बुझाइएको बन्दसूचीमा कोइराला समूहको दाबीअनुसार १२–१३ जनाको मात्र नाम छ । त्यसमाथि जित्ने गरी प्राथमिकतामा परेका नेताहरू आधा दर्जन मात्र । समानुपातिकमा सभापति शेरबहादुर देउवाले एकलौटी गरेको देखेको कोइराला समूह प्रत्यक्षमा पनि यही अवस्था आउने देखेर सतर्क मात्र बनेन आन्दोलित नै भएको छ ।

‘समान अवसर र न्यायका लागि’ अभियानमा लागेका कांग्रेसका शेखर कोइराला पक्षका दोस्रो तहका नेताहरुले बुधबार पार्टी मुख्यालय सोनपामा धर्ना दिए । धर्ना कार्यक्रम लगत्तै डा. शेखर कोइरालाले आफू निकट नेताहरुसँगग छलफल गरे । ‘आक्रोशको चरणमा रहेको हाम्रो आन्दोललाई के कसरी लैजान सकिन्छ भनेर नियमति छलफल हो,’ छलफलमा सहभागी एक नेताले शिलापत्रसँग भने, ‘टिकट लगायतका बारेमा पार्टी सभापति तथा गठबन्धनका अन्य दलका नेताहरुले के के भनिरहेका छन् सो बारे छलफल भएको हो ।’

सानेपाको धर्नामा गुरुराज घिमिरे, जगदिश्वरनरसिंह केसी, भुपेन्द्रजंग शाही, मनोजमणि आचार्यलगायत नेताहरू थिए । ‘समानुपातिक सूचीका नेताहरु देखायो भने जनमत तान्नै सकिँदैन । कमजोर पृष्ठभूमि भएका नेताहरु समानुपातिक सूचीमा छन् यो सच्चिनुपर्छ,’ कांग्रेस नेता जगदिश्वरनरसिंह केसीले भने । प्रत्यक्ष निर्वाचन क्षेत्रमा पनि योग्य उम्मेदवार उठाउन खबरदारी गरिने उनले जानकारी दिए । ्

अहिलेसम्मको अवस्था हेर्दा कांग्रेसले गठबन्धनमा ८५ सिट पाउने देखिन्छ । त्यसमा कोइराला समूहबाट टिकटकको ढुक्क हुनेमा तीन जना मात्र छन् । स्वयम कोइराला, महामन्त्री गगन थापा र नेता हृदयराम थानी । थानीलाई उम्मेदवार नबनाए आफू पनि हार्ने डरले उपसभापति पूर्णखड्का नै थानीलाई जसरी पनि उम्मेदवार बनाउनुपर्ने पक्षमा छन् । त्यसैअनुसार गठबन्धनमा सुर्खेतका दुवै क्षेत्र कांग्रेसले लिने सहमति जुटिसकेको छ । यी तीन नेताबाहेक कोइराला समूहका अरु नेताहरुको टिकट निश्चित छैन ।

मीनेन्द्र रिजाललाई गिरिजा पुत्री सुजाता कोइरालाले टिकट मागेपछि संकट परेको छ भने नुवाकोट २ मा अर्जुननरसिहं केसीलाई बहादुरसिंह लामाले टक्कर दिइरहेका छन् । सोलुखुम्बुमा, बलबहादुर केसीलाई आङगेलु शेर्पाले टक्कर दिँदा झापा– २ माओवादीको भागमा पर्दा सरिता प्रसाईँ संकटमा छिन् । बैतडी पनि माओवादीको भाग पर्दा चतुरबहादुर चन्दले टिकट पाउने सम्भावना देखिएको छैन । उता दार्चुलामा पनि दिलेन्द्र बडूले टिकट पाउने निश्चित छैन । बाजुरामा पनि सहमहामन्त्री बद्री पाण्डेको टिकट निश्चित छैन ।

यसरी प्रभावशाली नेताहरू नै उम्मेदवार बन्न नपाउने देखिएपछि कोइराला समूहले सभापति देउवामाथि दबाब बढाउन विद्रोहको चेतावनी दिइरहेको छ । उसले यस्तो चेतावनी बुधबार पार्टी कार्यालयमा धर्ना दिएर दियो भने बिहीबार चियापान कार्यक्रम गर्दैछ । केही दिन अगाडि भेला नै गरेको थियो ।

आन्दोलन गर्नु बाध्यता

शेखर समूहले गठबन्धन गर्दा कांग्रेसले १०० सिट लिनुपर्ने र आफ्नो समूहले ४० प्रतिशत पाउनुपर्ने बताउँदै आएको छ । बटमलाइन भने ३२ सिट हो । ‘हामीले ४० प्रतिशत भनेका छैनौं न्यायोचित हुनुपर्‍यो भनेका हौं । त्यो भनेका प्रतिशतमा हुँदैन,’ नेता गुरुराज घिमिरेले भने, ‘न्यायोचित नभए ४० प्रतिशत भाग खोज्छौं ।’ ३२ सिट मागिए पनि न्यायोचित भएको खण्डमा संख्या गौण हुने घिमिरेले बताए । आन्दोलनमा नेता उत्रिदा त्यसले नेतृत्वलाई दबाब बढेको इतर समूहको बुझाइ छ ।

प्रचण्डलाई पनि खबदारी

बुधबार कांग्रेस नेता शेखर कोइराला र महामन्त्री गगन थापाले बालवाटारमा माओवादी अध्यक्ष पुष्पकमल दाहाल प्रचण्डसँग भेटेर सिट बाँडफाँटको विषयमा छलफल गरेका छन् । उनीहरुले माओवादीले अस्वभाविक सिट दाबी गर्नुभएन भन्ने कुरा राखेका । ‘शेखर कोइरालापक्षले गठबन्धनलाई सहयोग गरेन भन्ने अनि शेखर समूहले दाबी गरेका सिटमा माओवादीले दाबी गरेर भएन यसमा ध्यान दिनुपर्‍यो भन्ने कुरा शेखर र गगन जीले राख्नुभयो,’ भेटको कुरा उद्धत गर्दै स्रोतले शिलापत्रसँग भन्यो ।

‘हाम्रा शीर्ष नेताहरुले टिकट पाउने वा आफ्नो क्षेत्र नपाउने हो भने हाम्रो तर्फबाट चुनावै नलड्ने तयारी छ यसले गर्दा गठबन्धनमा प्रचण्डलाई ठूलो तनाव दिएको छ,’ कोइराला समूहका एक नेताले शिलापत्रसँग भने, ‘यसले गर्दा गठबन्धन गरे पनि चाहेजति नतिजा नआउने त छँदैछ । त्यसमा शेखर समूहपछि हट्दा के होला ?’

यी हुन् शेखर समूहले टिकट लिन खोजेका ३२ क्षेत्र
इलाम क्षेत्र नं २ मा भेषराज आचार्यलाई टिकट दिनुपर्ने माग शेखर समूहको छ । झापा २ मा पार्टी नेतृ सरिता प्रसाईंलाई टिकट दिन कोइराला समूहले लविङ गरिरहेको छ । त्यस्तै, यो समूहबाट मोरङ क्षेत्र नम्बर १ मा डिकबहादुर लिम्वु, मोरङ २ मा डा. मिनेन्द्र रिजाललाई टिकट दिनुपर्ने अडान राखेको एक नेताले शिलापत्रलाई जानकारी दिए । तर, यहाँ गिरिजा पुत्री सुजता कोइराला चुनाव लड्ने दाउमा छिन् ।

०७४ सालमा जितेको क्षेत्रमा पनि रिजाललाई किन दिन नहुने भन्ने प्रश्न सो समूहले गरेको छ । मोरङको क्षेत्र नं ३ मा सुनिल शर्मा लाई टिकट दिन शेखरले प्रयास गरिरहेका छन् भने क्षेत्र नं ६ मा शेखर कोइराला आँफै आकांक्षी छन् । शेखर समूहले सुनसरी क्षेत्र नम्बर १ मा राजिव कोइरालाले टिकट पाउनुपर्ने माग गरिरहेको छ । यस्तै, सोलुखुम्वुमा बलवहादुर केसीले लागि कांग्रेसबाट टिकट पाउनुपर्ने अडान छ ।

प्रदेश २ को सप्तरीमा ४ मा तेजुलाल चौधरीको लागि शेखर समूह लबिङमा छ । उनी ०७४ सालमा पनि निर्वाचित नेता हुन् । यस्तै धुनषा २ मा १४ औं महाधिवेशनमा सहमहामन्त्रीमा पराजित रामकृष्ण यादव र सर्लाही क्षेत्र नम्बर ४ अमरेशकुमार सिंहका लागि लबिङमा शेखर समूह छ । त्यस्तै महोत्तरी २ मा किरण यादवले टिकट पाउनुपर्ने माग शेखर समूहको छ ।

बागमती प्रदेशको चितवन १ मा डा स्वर्णीम वाग्लेलाई टिकट दिनुपर्ने अडान शेखर समूहको छ । त्यहाँ सम्भव नभए वाग्लेलाई काठमाडौं ५ बाट भए पनि टिकट दिनुपर्ने माग सो समूहको छ । सिन्धुलीमा मोहन बराल, काभ्रे २ मा मधु आचार्यलाई टिकट दिनुपर्ने अडानमा शेखर समूह छ । नुवाकोट २ अर्जुुन नरसिंह केसीले टिकट पाउनुपर्ने अडानमा शेखर समूह छ । केसी सम्मानजनक नभए निर्वाचन नलड्ने भन्ने नेतमध्येका एक नेता हुन । शेखर समूहले धादिङ २ मा रामनाथ अधिकारी वा रमेश धमलाको टिकट हुनुपर्ने अडान राखेको छ । काठमाडौं क्षेत्र नं ४ बाट महामन्त्री गगन थापा चुनावी तयारीमा छन् । सम्भव भएमा दोलखाबाट अजयबाबु शिवाकोटीलाई टिकट दिन शेखर समूह लबिङमा छ ।

यस्तै, गण्डकी गण्डकी प्रदेशमा शेखर समूहले उपसभापति धनराज गुरुङको टिकट सुरक्षित गर्न खोजेको छ । गुरुङ स्याङ्जा क्षेत्रनम्बर १ बाट चुनाव लड्ने तयारीमा छन् । यस्तै गोर्खा २ मा राजेन्द्र बजगाईंलाई पनि टिकट दिनुपर्ने अडान समूहको छ ।

लुम्बिनी प्रदेश अन्तर्गत गुल्मी २ चन्द्र भण्डारी, रुपन्देही ४ मा प्रमोद यादवलाई टिकट मागिएको छ । यादवले २०७४ को निर्वाचन जितेका थिए । यस्तै बर्दिया १ मा ०७४ सालमा वामदेब गौतमलाई हराएका सञ्जय गौतमलाई टिकट दिनुपर्ने अडान शेखर समूहले राखेको छ ।

यस्तै, कर्णाली प्रदेशको सुर्खेतत २ मा हृदयराम थानी तथा सुदुपश्चिम प्रदेशको बाजुरामा सहमहामन्त्री वद्री पाण्डे, दार्चुलामा वर्तमान मन्त्री दिलेन्द्र बडु तथा बैतडीमा क्यानका पूर्व अध्यक्ष चतुरबहादुर चन्दले टिकट पाउनुपर्ने माग शेखर समूहको छ । सम्भव भए कालिकोटबाट भूपेन्द्रजंग शाहीलाई टिकट दिनुपर्ने अडानमा सो समूह छ ।

‘यी सिट नपाए हामी चुनाव लड्दैनौं । हेरौं कसरी पार्टी र गठबन्धन जित्दो रहेछ’ कोइराला निकट एक नेताले भने । यी नेताहरुलाई टिकट दिने वातावरण नबने शेखर समूहले चुनावनै नलड्ने तयारी गरेको छ ।

प्रकाशित मिति: बुधबार, असोज १२, २०७९ १९:३१