सामाजिक सुरक्षा कोषको तेस्रो संशोधन : १० प्रकारका घातक रोगमा १० लाखसम्म उपचारको व्यवस्था

सामाजिक सुरक्षा कोषको तेस्रो संशोधन : १० प्रकारका घातक रोगमा १० लाखसम्म उपचारको व्यवस्था

A+ A A-

सरकारले सामाजिक सुरक्षा कोषमार्फत कम्तीमा २ वर्ष योगदान गर्ने योगदानकर्तालाई कुनै एक घातक रोग लागे १० लाख रुपैयाँसम्म उपचार दिने भएको छ । सामाजिक सुरक्षा योजना सञ्चालन कार्यविधि २०७५ को तेस्रो संशोधनमा कोषले योगदानकर्ताका हकमा यो सुविधा थपेको हो ।

सशोधित कार्यविधिमा योगदानकर्ता श्रमिकले मात्र पाउने औषधि उपचार सेवा निजको श्रीमान वा श्रीमतीले पनि पाउने व्यवस्था थपिएको छ । कार्यविधिको तेस्रो संशोधन गत भदौ ५ गते श्रम, रोजगार तथा सामाजिक सुरक्षा मन्त्रालयले स्वीकृति गरिसकेको कोषले जनाएको छ ।

यस्तै, कोषका अनुसार कार्यविधिको तेस्रो संशोधनले घातक रोगको औषधि उपचार सुरक्षा योजनाअन्तर्गत कोषमा कम्तीमा दुई वर्ष रकम जम्मा गरेका श्रमिकले कोरोनरी आर्टरी वाइपास वा ओपन हार्ट सर्जरी, मस्तिष्क घात, मिर्गौला रोग, क्यान्सर, पार्किन्सन्स, अल्जाइमर्स, स्पाइनल इन्जुरी, हेडइन्जुरी, सिकलसेल एनिमिया र हेमोफेलिया वा थालासेमिया रोगका लागि सेवा अवधिभर १० लाख रुपैयाँसम्मको खर्च कोषले व्यहोर्ने गरी व्यवस्था गरिएको छ ।

कोषका अनुसार कार्यविधि संशोधन भएको मितिले ९१ औँ दिन अर्थात् तीन महिनापछि लागू हुने व्यवस्था छ । आउँदो मंसिर महिनादेखि योगदानकर्ताको श्रीमान् वा श्रीमतीले पनि कोषमार्फत औषधि उपचार सेवा पाउनेछन् ।

यो रोगका लागेको योगदानकर्ता सरकारी अस्पताल अथवा कोषले निर्धारण गरेको अस्पतालमा उपचार गर्नुपर्ने संशाेधनमा उल्लेख छ । वैदेशिक रोजगारीमा कार्यरत श्रमिकले पनि कोषमा आवद्ध भएको भए यो सुविधा पाउने कोषले जनाएको छ ।

सामाजिक सुरक्षा कोषमा योगदान गर्ने श्रमिकका श्रीमान वा श्रीमतीले पनि अब कोषबाट औषधि उपचार सुविधा पाउने गरी कार्यविधि संशाेधन गरिएको कोषका सह–प्रवक्ता रोहित रेग्मीले जानकारी दिए । घातक रोगको औषधि उपचार सुविधा कोषमा योगदान गर्न छाडेको दुई वर्षसम्म लागू हुनेछ ।

कोषको वृद्धावस्था सुरक्षा योजनाअन्तर्गत निवृत्तीभरण सुरु भएको सात वर्षसम्म पनि घातक रोगसम्बन्धी सुविधा उपयोग गर्न सकिने व्यवस्थासमेत यो संशोधनले भएको उनले बताए । ‘वैदेशिक रोजगारीमा जाने कामदारलाई समेत कोषको कार्यक्रममा समेट्दै घातकजस्तो स्वास्थ्य सुविधा उपलब्ध गराउने हो । जसका लागि कोषले एउटा छुटै कार्यविधि बनाइरहेको छ’, उनले भने, ‘कोषमा योगदान गर्ने श्रमिकका छोराछोरीलाई छात्रवृत्तिको व्यवस्थासमेत गरिएको छ । अब योगदानकर्ताको सन्तानले समेत छात्रवृत्ति पाउने छन् । यसो गर्दा कोषमा आवद्ध योगदानकर्ताले स्वास्थ्य र शिक्षा दुवै सुविधा लिन सक्छन् ।’

कोषले प्रधानमन्त्री रोजगार कार्यक्रम, युवा रोजगारीका लागि रुपान्तरण पहल परियोजना र रोजगार प्रवर्द्धन कार्यक्रममा आवद्ध श्रमिकलाई समेत कोषको कार्यक्रममा ल्याउन प्रयास भइरहेको उनको भनाइ छ ।

योगदानकर्ता सन्तति छात्रवृत्ति सञ्चालन कार्यविधि, २०७९ ले कोषमा योगदान गर्ने श्रमिकका बालबच्चाले चिकित्सा विज्ञान, इन्जिनियरिङ, नर्सिङ, वन विज्ञान, कृषि विज्ञान र होटल तथा ट्राभल व्यवस्थापन विषयका लागि हरेक वर्ष प्रत्येक प्रदेशबाट १२ जनाका दरले जम्मा ८४ जनालाई छात्रवृत्ति प्रदान गरिने कोषले जनाएको छ ।

कोषको कार्यविधिमा बढीमा पाँच लाख रुपैयाँसम्म छात्रवृत्ति प्रदान गर्ने व्यवस्था छ । यो कार्यक्रम आउँदो शैक्षिक सत्रदेखि लागू हुने कोषका सहप्रवक्ता रेग्मीले जानकारी दिए । कोषले दोस्रो संशोधनमा योगदानकर्तालाई शैक्षिक सपटी, घरजग्गा सपटी, व्यवसायका लागि सापटी र अन्य सुविधा थपेको थियो ।

कोषमा हालमा १७ हजार ४ सय १७ रोजगारदाता र ३ लाख ६४ हजार ७ सय ४१ जना योगदानकर्ता सूचीकृत भएको कोषकै तथ्यांकमा उल्लेख छ ।