'दसैँमा नयाँ लुगा चाहियो भनेपछि हुनैपर्थ्यो'

A+ A A-

दसैँ एउटा चाड मात्रै होइन । नेपालीलाई एकताको सन्देश दिने एउटा माध्यम पनि हो । त्यही भएर नेपालीहरूका लागि दसैँ विशेष हुने गर्छ । योपटक नेपाली खेलाडीहरूको दसैँचाहिँ कस्तो हुँदैछ ?

खेलाडीका लागि दसैँ नै खेल हो । जबसम्म उनीहरू खुसी हुँदैनन्, तबसम्म खेल्न पाउँदैनन् । देशका लागि डटेर लड्ने सिपाही पनि हुन्, खेलाडी । इन्दु बर्मा नेपाली राष्ट्रिय क्रिकेट टिमकी मुख्य खेलाडी हुन् । विभागीय टिम एपीएफ क्लबलाई जिताउन मुख्य भूमिका खेल्ने खेलाडी पनि । योपटकको दसैँचाहिँ उनले कसरी मनाउँदैछिन् ? विगतमा दसैँसम्बन्धी उनीसँग के–कस्ता किस्साहरू छन् ? दसैँकै पेरिफेरीमा रहेर इन्दु बर्मालाई गरिएका दश प्रश्नः

योपटकको दसैँ कसरी मनाउँदै हुनुहुन्छ ?

योपटकको दसैँ मनाउन पाइँदैन । नवौँ राष्ट्रिय खेलकुदको तयारीमा छौँ । अभ्यास गरिरहेका छौँ । नवौँकै कारण योपटक दसैँ परिवारसँग मनाउन नपाइने भएको हो । यही टिमसँगै दसैँ मनाउने हो । नवौँ सकिसकेपछि चाहिँ तिहारमा घर जाने ।

दसैँमै गरिएको नवौँ राष्ट्रिय खेलकुदको तयारी कस्तो भइरहेको छ ?

पानी परिरहेको भएर मैदानमै अभ्यास भएको थिएन । फिल्डिङ, रनिङदेखि फिट्नेसमा मात्रै तयारी भइरहेको थियो । अहिले टीयू मैदानमा हप्ताको चार दिन ब्याटिङ बलिङमा अभ्यास गरिरहेका छौँ । बाँकी दुई दिनचाहिँ एपीएफ अफिसमा फिट्नेसका लागि समय निकालिरहेका छौँ ।

नेपालमै भएर पनि यसअघि दसैँ मनाउन नपाएको अवस्था थियो ?

नेपालमै भएरचाहिँ दसैँ मनाउन नपाएको थिएन । सबै दसैँ मनाउँदै आएका थियौँ । दुःख लाग्छ । वर्षमा एकपटक आउँछ महान् चाड तैपनि मनाउन पाइँदैन । परिवार उता आफू यता, नरमाइलो त हुन्छ ।

एकपटक कि दुईपटक अन्तर्राष्ट्रिय प्रतियोगिता खेल्न जाँदा दसैँ छुटेको छ । बाहिर हुँदाचाहिँ म्यानेजर, प्रशिक्षकले टीका लगाइदिनुहुन्थ्यो । त्यो बेला नेपालमा चाहिँ कसरी मनाइरहेका छन् भन्ने हुन्थ्यो । रमाइलो भइरहेको छ होला भन्ने हुन्थ्यो ।

तपाईंको पहिलेको दसैँ कस्तो हुने गर्थ्यो ?

पहिले अब १०–१२ दिनको छुट्टी हुन्थ्यो । १२ दिनको बिदामा घर जाने, आफन्तहरूसँग भेटघाट गर्ने, टाढाबाट साथीभाइहरू आउथ्यो । टीका लगाउने रमाइलो गर्ने यसरी नै यसअघिको दसैँ मनाउँथ्यौँ ।

बाल्यकालमा दसैँ मनाउँदाका पलहरू कस्ता थिए ?

मामाघर जाने गर्थ्यौं । मेरो मामाघरचाहिँ गुल्मी हो । सबै जनाको भेटघाट हुँदा २०–२२ जना हुन्थ्यौँ । टीका लगाएर दक्षिणा पाउँदा झन् खुसी लाग्ने । धेरै पैसा पाउँदा खुसीले रमाइने यस्तै थियो । तर, अहिलेचाहिँ त्यस्तो वाह ! भन्ने छैन । अब पुस्तागत परिवर्तन हुँदै गयो ।

सानो छँदा दसैँमा नयाँ लुगाका लागि जिद्दी गर्नुभएको कुनै सम्झना छ ?

बाबाआमालाई दसैँ आउन आँट्यो, नयाँ लुगा चाहियो भनेपछि चाहियो चाहियो भनेर ढिपी गर्थें । पैसा खोजेर हुन्छ कि के गरेर हुन्छ, दसैँको लुगा चाहियो भन्ने गर्थें । नयाँ लुगा लगाएपछि चाहिँ दसैँ आयो भन्ने हुन्थ्यो सानो हुँदा । बाबाआमाले सबै पूरा गरिदिएको भएर सानोमा नयाँ लुगा लगाउन नपाएर रोएकै चाहिँ छैन ।

दसैँ भन्नेबितिकै तपाईंलाई के कुराको याद आइरहन्छ ?

पहिलो कुरा त परिवारको याद आउँछ । मेरो भाइको याद आउँछ । अहिले ऊ पनि परिवारसँग हुँदैन । लाउरे भएका कारण उसको पनि छुट्टी मिलेन । अनि टीका, रोटेपिङ, साथीभाइहरूसँग पूरै ‘चिल’ पाराले गरिने रमाइलोको याद आउँछ ।

दसैँका लागि भनेर विशेष किनमेल गर्नुभएको छ ?

दसैँका लागि भनेर योपटकचाहिँ अब छिट्टै किनमेल गर्छु । दसैँ मनाउन त पाइँदैन । तर केही किन्नेचाहिँ चलन छ । घरका लागि पनि केही किनमेल गर्नु छ । नत्र पैसा नै पठाइदिनेछु ।

पहिले आफूसँग नहुँदा बाबाआमाले हेर्नुभएको थियो । अब अहिले आफूसँग हुँदा त घरका लागि हेर्नु त परिहाल्छ । घरबाट नमागे पनि केहीचाहिँ दिँदै आएको छु, योपटक पनि दिन्छु ।

दसैँमा प्राय: धेरैजसो तास खेल्ने, पिङ खेल्ने, चंगा उडाउने, परिवारसँग नाच्नेजस्ता गतिविधि गरेर रमाइलो मान्छन् । दसैँमा तपाईंचाहिँ के गरेर रमाइलो गर्नुहुन्थ्यो ?

पहिलो कुरा त घरकै काम आउँछ । त्यसपछि सरसफाइ गर्ने, पूजादेखि जमरा रोप्ने गरिन्थ्यो । सबैसँग भेट्ने रमाइलो गर्ने भन्ने त छँदैछ ।

दसैँको अवसरमा सबै नेपालीलाई तपाईको सन्देश के छ ?

हामी सबैको सबैभन्दा ठूलो पर्व नै दसैँ । सम्पूर्ण नेपालीहरूलाई राम्रोसँग दसैँ मनाउनुहोस् भन्छु । अर्को कुराचाहिँ आफ्नो स्वास्थ्यको ख्याल गरेर मनाउनुहोला । दसैँ–तिहारमा धेरै अप्रिय घटनाहरू पनि घट्ने गरेका छन् । धेरै मदिरा पनि सेवन नगर्नुहोला । मेरोतर्फबाट सबैलाई विजया दशमीको धेरैधेरै शुभकामना छ ।

प्रकाशित मिति: मंगलबार, असोज १८, २०७९ १६:२५