कांग्रेस प्रवक्ता भन्छन्- गठबन्धनको सिट बाँडफाँटमा यो टुंगियो, त्यो टुंगियो भन्ने अवस्था छैन

कांग्रेस प्रवक्ता भन्छन्- गठबन्धनको सिट बाँडफाँटमा यो टुंगियो, त्यो टुंगियो भन्ने अवस्था छैन

A+ A A-

सत्ता गठबन्धनका पाँच दलले प्रतिनिधिसभाको १६५ निर्वाचन क्षेत्रको विवाद थाती राखेर प्रदेशसभाको ३३० सिटमा भागवण्डा गर्दैछन् । माओवादी केन्द्र, एकीकृत समाजवादी र जसपा कांग्रेसबाट धेरै सिट लिन चाहन्छन् । जनमोर्चा भने प्रत्यक्षमा २ सिटमा चित्त बुझाउने पक्षमा छ । कांग्रेसभित्र समानुपातिकको बन्द सूचीमा एकलौटी गरिएको भन्दै संस्थापनइतरका दोस्रो तहका नेताहरूले विद्रोह गर्ने चेतावनी दिइरहेका छन् । कांग्रेसभित्रको विवाद र गठबन्धनमा कुरा नमिलिरहेको समयमा कांग्रेस प्रवक्ता डा. प्रकाशशरण महतले मंगलबार पत्रकार सम्मेलनको आयोजना गरे । पत्रकार सम्मेलनपछि महतसँग शिलापत्रले गरेको कुराकानी:

सिट बाँडफाँटमा लगभग सहमतिमा पुग्यौँ, प्रदेशमा छलफल गर्दैछौँ भन्ने जवाफ आइरहन्छ । मिल्न बाँकी क्षेत्र कति छन् ?

यो विषयमा संलग्न साथीहरू छलफलमा हुनुहुन्छ । अहिले यो बाँकी छ त्यो बाँकी छ भन्न सक्ने अवस्था छैन । यो टुंगियो त्यो टुंगियो भन्ने अवस्था छैन । एकमुष्ट सार्वजनिक हुन्छ ।

एकै निर्वाचन क्षेत्रमा धेरै दलहरूको आकांक्षा भएर मिलाउन गाह्रो भएको हो ?

अवश्य पनि हाम्रै पार्टीभित्र धेरै आकांक्षी छन् । अरुलाई त्यो सिट दिनेभन्दा त्यसलाई कसरी व्यवस्थापन गर्ने सन्तुलित गर्ने भोट पास सहज गराउने भन्ने कुरा पाँच दलको चिन्ताको विषय हो । २३ गते नोमिनेसन गर्नु छ । निर्णय संघ र प्रदेश दुवैको गर्नु छ । गठबन्धनमा टुंग्याएर आ–आफ्नो पार्टीको टिकट पनि तय गर्नु छ ।

कहिले निष्कर्षमा पुगिन्छ ?

आजभोलि नै टुंगिन्छ ।

बीचको समयमा प्रेसमिट गर्नुको आवश्यकता के थियो ?

निर्वाचन प्रक्रियामा हामी जाँदैछौँ । बन्द सूची पेस गरेका छौँ । प्रत्यक्षतर्फको पनि निर्णय हुन्छ । गठबन्धनको पनि कार्य टुंगो लाग्छ । यो विषयमा कार्यकर्ता र जनतालाई सुसूचित गर्न प्रेस मिट गरेका हौँ ।

धनकुटामा माओवादीभित्र विद्रोह भयो । गठबन्धनका दलहरूमा पनि असन्तुष्टि छ । यसले गठबन्धनमा समस्या आउँदैन ?

मलाई लाग्दैन कि गठबन्धनमा समस्या आउँछ । जटिल प्रक्रिया र काम हो । जटिल भए पनि सफल नतिजा निस्कन्छ । टिकट वितरणको बेलामा एक्लै लड्दा पनि जिल्लाजिल्लामा जुलुस घेराउ हुन्थ्यो । फलानोले टिकट पाउनुपर्‍यो, फलानो आउनुपर्‍यो वा फलानो हुनु भएन भन्ने कुराहरू आउने गर्छन् । गठबन्धन भएको अवस्थामा, अर्को पार्टीको उम्मेदवारलाई पनि स्वीकार गर्नुपर्ने अवस्थामा त्यस्ता कुराहरू आउँछन् । निर्वाचनमा मतदान गर्नेभन्दा अगावै नै असन्तुष्टिहरूलाई व्यवस्थापन गर्दै सम्बोधन गर्छौं । सबैलाई चित्त बुझाउँछौँ ।

पार्टीभित्रको असन्तुष्टिलाई संस्थापन पक्षले कसरी हेरेको छ र कसरी सम्बोधन गर्छ ?

संस्थापन वा गैरसंस्थापन भन्ने छैन । उदारताका साथ पार्टी सभापतिले नेताहरूलाई सम्बोधन गरेर प्रदेश तहबाट समेत छलफल गरेर सूची तयार गरिएको छ । प्रत्यक्षतर्फको उम्मेदवारको प्रक्रियामा संसदीय बोर्ड आमन्त्रित नेताहरूको छलफलबाटै निर्णय हुन्छ । त्यसमा कसैले पनि शंका राखिनुपर्ने आवश्यकता छैन । सभापतिले मात्र गरे वा एकलौटी भएको छ, यो भएको छ, त्यो भएको छ भनेर प्रचारबाजी केही साथीभाइबाट भइरहेको छ । त्यो नितान्त अनावश्यक छ ।

भोलिबाट धर्नाको कार्यक्रम छ । पार्टीको निर्णय नमान्ने भनिएको छ नि ?

यहाँ सम्पूर्ण पार्टी पङ्क्तिले बुझिसक्यो । पार्टीको पक्षमा माहौल बनेको छ । निर्वाचनमा विजय हासिल गर्ने अवसरमा छौँ । त्यो कुरा आफैँ निस्तेज भएर जान्छ ।

समानुपातिक सूचीमा तपाईंको नाम छ । प्रत्यक्षमा पनि लड्ने आकांक्षा देखाइरहनुभएको छ । तपाईंको निर्वाचन क्षेत्र कुन हो ?

नुवाकोट क्षेत्र नम्बर १ भनेको हो । समानुपातिकको सूची सच्याउने समय छ ।

प्रकाशित मिति: मंगलबार, असोज ११, २०७९ १९:५८