डेंगी प्रकोप नियन्त्रणभन्दा टुकुचा उत्खननमा व्यस्त काठमाडौंका मेयर बालेन

डेंगी प्रकोप नियन्त्रणभन्दा टुकुचा उत्खननमा व्यस्त काठमाडौंका मेयर बालेन

A+ A A-

काठमाडौं महानगरपालिकाले डेंगी प्रकोप नियन्त्रणमा प्रयास नगरेको आरोप लाग्न थालेको छ । काठमाडौं महानगरमा डेंगी प्रकोपले स्थानीयहरूमा संक्रमण अत्यधिक बढ्न थाले पनि महानगरले पनि प्रकोप नियन्त्रणमा प्रयास गरेको छैन ।

पछिल्लो तथ्यांकअनुसार सबैभन्दा धेरै बाग्मती प्रदेशमा मात्र १७ हजार ७ सय ३१ जना डेंगी संक्रमित छन् । जसमा करिब आधा डेंगी संक्रमित काठमाडौं, ललितपुर र भक्तपुरमा रहेका छन् ।

काठमाडौं महानगरले डेंगी नियन्त्रणका लागि सामान्य मालतीन पाउडर छर्किँदै आए पनि डेंगी नियन्त्रण भने भएको छैन । काठमाडौं महानगरमा डेंगी संक्रमण फैलिने क्रम समेत बढ्दो छ । स्वास्थ्य तथा जनसंख्या मन्त्रालयको तथ्यांकमा २२ हजार ९ सय ८८ जना डेंगी संक्रमित छन् । स्वास्थ्य मन्त्रालयका अनुसार अहिलेसम्म २९ जनाको डेंगीबाट मृत्यु भएको छ ।

संक्रमितको संख्या छैन महानगरसँग

काठमाडौं महानगरपालिकासँग महानगरभित्र कति डेंगी संक्रमित छन् भन्ने यकिन तथ्यांक नै छैन । यद्यपि, स्थानिय कानुनअनुसार डेंगी नियन्त्रणका लागि काम गरिरहेको महानगरपालिकाका स्वास्थ्य विभाग प्रमुख बलराम त्रिपाठीको दाबी छ ।

काठमाडौं महानगरपालिकाभित्र कति डेंगी संक्रमित छन् भन्ने प्रश्नमा विभागका प्रमुख त्रिपाठीले भने, ‘महानगरमा करिब १ हजार ५ सय संक्रमित होलान् । यो अनुमानित तथ्यांक हो । हामीसँग यकिन तथ्यांक छैन । जिल्ला स्वास्थ्यसँग माग्नुपर्छ ।’

महानगरले डेंगी नियन्त्रणका लागि औषधिसमेत वितरण गर्दै आएको उनले जानकारी दिए । तर, कहाँ र कस्ता क्षेत्रमा औषधि वितरण गरेको हो भन्ने चाहिँ खुलाएनन् । काठमाडौं महानगरले ३२ वटै वडामा डेंगी नियन्त्रणका लागि सचेतना कार्यक्रम गर्ने योजना अघि सारेको छ । डेंगी नियन्त्रणका लागि महानगरले १५ वटा विधा बनाएर ३२ वटै वडास्तरीय काम गर्न लागेको महानगरका प्रमुख प्रशासकीय अधिकृत बसन्त अधिकारीले जानकारी दिए । ‘महानगर डेंगी नियन्त्रणका लागि सबै वडामा पुग्दैछ । डेंगी खोज र नष्ट गर’ भने नाराका साथ काम भइरहेको छ,’ उनले भने ।

डेंगीभन्दा प्राथमिकतामा टुकुचा

काठमाडौं महानगरपालिकाका मेयर बालेन्द्र शाह अहिले महानगरभित्र अवैध रूपमा बनेका टहरा भत्काउन र टुकुचा खोला खोज्न व्यस्त छन् । एक महिनायता बालेनको निर्देशनमा डोजर लिएर अनधिकृत भवन भत्काउने र टुकुचाको उत्खनन गरिएको छ ।

गत साता मात्र काठमाडौं महानगरपालिकाले डेंगी संक्रमितहरूका लागि हटलाइन सेवा सुरु गर्‍यो । डेंगी संक्रमित भएको शंका लागेमा ११८० नम्बरमा फोन गरी स्वास्थ्यकर्मीबाट परामर्श लिन सकिने र आवश्यक भएमा १०२ नम्बरमा फोन गरेर एम्बुलेन्स सेवासमेत लिन सकिने जानकारी मेयर बालेनले सामाजिक सञ्जालबाटै गराएका थिए ।

मेयर शाहको ध्यान जनताको स्वास्थ्यभन्दा टुकुचा खोला खोल्न र अवैध रूपमा बनेका टहरा भत्काउनतिर मात्र केन्द्रित छ । महानगरभित्र रोजगारी, अध्ययन र विभिन्न क्षेत्रमा काम गर्दै आएका सर्वसाधारण डेंगी संक्रमित हुँदासमेत हस्पिटलमा बेड नपाएर उपचारको समस्या भोग्न बाध्य छन् । तर, महानगरले डेंगी नियन्त्रणका लागि सचेतना कार्यक्रम पनि टोल-टोलमा पुर्‍याउन सकेको छैन ।

टोल–टोलमा स्वास्थ्यकर्मी खटाएर डेंगी नियन्त्रणका लागि काम गर्नुपर्ने नगरवासीको माग छ । मेयर शाह मात्र होइन, ३२ वटै वडाका वडाध्यक्षहरूले पनि डेंगीु नियन्त्रणका लागि काम गर्न नसकेको नगरवासीको गुनासो छ । डेंगी फैलिएसँगै बजारमा सिटामोलको समेत अभाव छ । काठमाडौं महानगरले डेंगी नियन्त्रणका लागि कस्तो काम गर्दैछ भनेर बुझ्न पटक–पटक फोन गरे पनि मेयर शाहसँग सम्पर्क हुन सकेन ।

प्रकाशित मिति: आइतबार, असोज ९, २०७९ १६:४८