यात्रुवाहक बस र पिकअप भ्यान प्रयोग गरेर लागुऔषध तस्करी, चालकसहित ६ जना पक्राउ

यात्रुवाहक बस र पिकअप भ्यान प्रयोग गरेर लागुऔषध तस्करी, चालकसहित ६ जना पक्राउ

A+ A A-

यात्रुवाहक बस र बोलेरो पिकअप भ्यान प्रयोग गरेर लागुऔषधको तस्करी गर्ने गरेको खुलेको छ । प्रहरीको लागुऔषध नियन्त्रण ब्युरो कोटेश्वरको टोलीले प्रदेश-०२-०३-ख ३६२८ नम्बरको बस र बा ५ च ७१३८ नम्बरको पिकअप भ्यानका चालकसहित ठूलो मात्रामा लागुऔषध बरामद गरेपछि घटना सार्वजनिक भएको हो ।

ब्युरोको टोलीले बस चालक सिन्धुपाल्चोक सुनकोशी गाँउपालिका-७ का ४४ वर्षीय रामबहादुर तिमिल्सिना, सोही बसका सहचालक बारा कलैया नगरपालिका-८ का अजय महतो र पिकअप भ्यानका चालक काभ्रेका मण्डनदेउपुर नगरपालिकाका-५ का अर्जुन ढकाललाई पक्राउ गरेको हो ।

उनीहरूको बस र कोठाबाट प्रहरीले १२ हजार सात सय ५८ एम्पुल लागुऔषध बरामद गरेको छ । बरामद लागुऔषध डाइजेपाम, फेनारगन र ब्रुप्रेनोर्फिन रहेको ब्युरोका प्रहरी उपरीक्षक (एसपी) योगेन्द्र खड्काले जानकारी दिए ।

एसपी खड्का अनुसार ८ हजार ५ सय २० एम्पुल लागुऔषध ढकालको साथबाट र बाँकी चार हजार २ सय ३८ एम्पुल महतो र तिमिल्सिनाको साथबाट बरामद गरिएको हो । पक्राउ परेका तीन जनामाथि थप अनुसन्धान भइरहेको ब्युरोले जनाएको छ ।

यसरी गर्थे बस र पिकअप भ्यानबाट तस्करी

न्यू एन्जल कम्पनीको नाममा दर्ता रहेको प्रदेश–०२ –०३– ख ३६२८ नम्बरको बस बारादेखि बनेपा रुटमा चल्छ । उक्त बसका सहचालक हुन् बाराकै अजय महतो । उनै महतो र चालक रामबहादुर तिमिल्सिना मिलेर भारतबाट लागुऔषध बसमा हालेर नियमित बनेपासम्म ल्याउने गर्थे ।

बस चालक र सहचालकले ल्याएको उक्त लागुऔषध पिकअप भ्यानका चालक काभ्रेका अर्जुन ढकालले आफ्नै पिकअप भ्यानमार्फत ललितपुरसम्म पुर्‍याउने र बिक्री वितरण गर्ने गरेको खुलेको हो । ढकाल यसअघि डकैती मुद्दामा जेल परेर छुटेका व्यक्ति हुन् ।

ढकालले लागुऔषध राख्न ललितपुरको बागडोलमा कोठा भाडामा लिएको खुलेको छ । प्रहरीको टोलीले उनको कोठा र गाडीबाट गरेर ९ हजार ५२० एम्पुल बरामद गरेको हो । ढकाल पक्राउ परेपछि उनको बयानमा क्रममा बससहित बसका चालक महतो र सहचालक तिमिल्सिना २६ भदौमा पक्राउ हुन् ।

उनको बयानका आधारमा प्रहरीले ललितपुरको थसीखेलबाट प्रदेश–०२–०३–ख ३६२८ नम्बरको बससमेत नियन्त्रणमा लियो । सोही बसमा राखिएको ३ हजार २३८ एम्पुल बरामद भएको हो । प्रहरीको अनुसन्धानका क्रममा उनीहरूले यसअघिसमेत पटक–पकट लागुऔषधको तस्करी गर्ने गरेको खुलेको छ ।

बयानमा क्रममा बस र पिकअप भ्यान प्रयोग गरी २७ पटक लागुऔषध तस्करी गरेको खुलेपछि बस र पिकअप भ्यानसमेत नियन्त्रणमा लिएको प्रहरीले जनाएको छ । उनीहरूले प्रतिएम्पुल २ सयका दरले बजारमा लागुऔषध बिक्री वितरण गर्ने र १२ हजार ७५८ पिसको मूल्य करिब २६ लाख रुपैयाँ हुने जनाएको छ ।

प्रहरीका अनुसार बस चालक र सहचालकले बाराबाट ‘रसगुल्ला’ मिठाइको बट्टामा प्याक गरेर लागुऔषध तस्करी गर्ने गरेको खुलेको हो । उनीहरूबाहेक लागुऔषध नियन्त्रण ब्युरोको टोलीले ५० ग्राम खैरो हेरोइनसहित इलामका सुजन हेल्मु र सोही ठाउँ सञ्जीव राईलाई पक्राउ गरेको छ ।

त्यस्तै इलामका फरार अभियुक्त सन्तोष तामाङलाई समेत ब्युरोको टोलीले पक्राउ गरेको छ । पक्राउ परेका ६ जनालाई ब्युरोको टोलीले आइतबार सार्वजनिक गरेको हो ।

प्रकाशित मिति: आइतबार, असोज ९, २०७९ १४:३९