नेयमार ल्याउन बार्सिलोनाको ब्रह्मास्त्र हुनसक्छ, ‘एमबाप्पे फर्मुला’

A+ A A-

बार्सिलोना र नेयमारको ट्रान्सफर गाथा रोमाञ्चक मोडमा पुगेको छ । नेयमार पिएसजी छाडेर बार्सिलोना आउन चाहन्छन् । बार्सा पनि उनलाई ल्याएर युरोपमा आफ्नो दबदबा फिर्ता ल्याउने दाउमा छ । तर, युइएफएको फाइनान्सियल फेयरप्ले पोलिसी (एफएफपी) का कारण बार्सीलोना परिबन्धमा परेको छ ।

बार्साले जारी ट्रान्सफर मार्केटमा मात्रै एन्टोइन ग्रिजम्यान, फ्रेन्की डि योङ, नेटोलगायत अन्य खेलाडी अनुबन्ध गर्न २३७ मिलियन युरो खर्चिसकेको छ । नेयमारलाई २२२ मिलियन खर्चेर अनुबन्ध गरेको पिएसजीले उनको ट्रान्सफर मूल्य ३०० मिलियन युरोको हाराहारीमा राखेको छ । तर, बार्सिलोना अहिले ३०० मिलियन बराबरको कारोबार गर्न सक्ने अवस्थामा छैन ।

यस्तो अवस्थामा बार्सासँग दुईवटा विकल्प छन् : खेलाडी एक्स्चेन्ज र एम्बाप्पे फर्मुला । बार्साको पहिलो प्रयास खेलाडी एक्स्चेन्ज नै हुनेछ । उसले आफ्ना २ जना खेलाडी पिएसजीलाई दिएर थप १०० मिलियन युरो पनि दिने शर्तमा नेमार ल्याउन सक्छ । बार्सा त्यसका लागि डेम्बेले, काउटिन्हो, माल्कोम, राकिटिचलगायतका खेलाडीमध्ये कुनै २ खेलाडी दिन तयार रहेको छ । यद्यपि, माल्कोम भने रसियन क्लब जेनिट सेन्ट पिटर्सबर्गमा जानसक्ने सम्भावना पनि उच्च छ ।

फ्रेन्च लिगको ट्रान्सफर विन्डो १० अगस्टमा सकिँदैछ । अर्थात् अब बार्सासँग नेयमारलाई अनुबन्ध गर्न केबल ८ दिन बाँकी छ । बार्साले पिएसजी सामू नेयमारका लागि आधिकारिक खरिद प्रस्ताव राख्नै बाँकी छ । बार्सा २–३ दिनभित्रमा सो प्रस्ताव राख्ने तयारीमा छ । तर, खेलाडी एक्स्चेन्ज गरेमा बार्सालाई अहिले फाइदा देखिए पनि दीर्घकालीन रुपमा भने घाटा हुने छ । काउटिन्हो, डेम्बेले, राकिटिच, माल्कोम सबैजना बार्साको अट्याकिङका बलिया र अभिन्न अंग हुन् ।

एकजना नेयमार ल्याउन दुईजना राम्रा खेलाडी गुमाउनु मिड–सिजनपछि घातक हुनसक्छ । त्यसमाथि नेयमार छिट्टै चोटग्रस्त हुने खेलाडीमा पर्छन् । राम्रो ड्रिब्लर हुनुका साथै सानो ट्याकलमा पनि अराजक प्रतिक्रिया दिने हुनाले नेयमार डिफेन्डरको आँखाको तारो बन्छन् । त्यसैले लिग मिडसिजनसम्म पुग्दा नेयमार एकदुई पटक घाइते हुने निश्चितप्राय छ । एकजना नेयमार घाइते हुँदा बार्सालाई ३ जना खेलाडीको अभाव खड्किनेछ । अट्याकिङ पोजिसनका राम्रा खेलाडी नहुँदा बार्साको फरवार्ड र अट्याकिङ मिडफिल्ड समस्यामा पर्नसक्छ ।

त्यसैले, खेलाडी एक्स्चेन्जको सबैभन्दा राम्रो विकल्प हुनसक्छ : ‘एम्बाप्पे फर्मुला । ट्रान्सफर मार्केटमा एफएफपीको उल्लंघन नगरी महंगो खेलाडी अनुबन्ध गर्ने अचुक उपाय हो, ‘एम्बाप्पे फर्मुला’ । यो फर्मुलाको प्रतिपादन नेयमारको हालको टिम पिसजीले नै गरेको थियो । पिएसजीले पहिलोपटक यो उपाय प्रयोग गरेर एम्बाप्पे अनुबन्ध गरेकाले यस्तो किसिमको ट्रान्सफर सम्झौतालाई ‘एम्बाप्पे फर्मुला’ भन्न थालिएको हो ।

दुई वर्षअघि एकै सिजनमा पिएसजीले बार्साबाट नेयमार र मोनाकोबाट एम्बाप्पेलाई अनुबन्ध गरेको थियो । तर, विश्वको सबैभन्दा महंगा खेलाडीका रुपमा नेयमारलाई अनुबन्ध गर्दा पिएसजीसँग एम्बाप्पेलाई पनि अनुबन्ध गर्ने बजेट बाँकी थिएन । त्यसपछि पिएसजीले मोनाकोसँग अनौठो सम्झौता गर्दै एम्बाप्पेलाई भित्र्यायो ।

सो सम्झौताअनुसार उक्त ट्रान्सफर मार्केटमा पिएसजीले एम्बाप्पेलाई लोनमा लैजाने र अर्को समर ट्रान्सफर मार्केटमा ‘रिलिज क्लज’ मुताबिककै मूल्यमा अनुबन्ध गर्नुपर्ने उल्लेख थियो । खराब फर्म, चोट वा अन्य कुनै कारण पिएसजीले अनुबन्ध नगर्न पाउँदैन थियो भने मोनाकोले पनि कुनै बहानामा एम्बाप्पे बेच्दिन भन्न पाउँदैनथियो । सम्झौताअनुरुप विश्वको दोस्रो महंगो खेलाडी बन्दै एम्बाप्पे अर्को सिजन १८० मिलियन युरोमा पिएसजीमा आबद्ध भएका थिए ।

बार्सासँग पनि अहिले नेयमारलाई अनुबन्ध गर्न पुग्ने बजेट छैन । त्यसैले आफ्ना भरपर्दा खेलाडीसँग साट्नुभन्दा ‘एमबाप्पे फर्मुला’ अनुसार सम्झौता गरेर लोनमा अनुबन्ध गर्नु उपयुक्त हुनेछ । नेयमारले पिएसजीको बोर्डलाई पनि आफूलाई अब टिममा बस्ने चाहना नभएकोले ट्रान्सफर प्रस्ताव स्विकार्ने जानकारी दिइसकेका छन् ।

राम्रा खेलाडी भएपनि छाड्ने मानसिकता बनाइसकेका नेमारलाई टिममा राखेर पिएसजीले उनीबाट सकारात्मक प्रदर्शनको अपेक्षा गर्ने ठाउँ छैन । लोनमा होस् वा एक्स्चेन्जमा होस् नेमारलाई बार्सा पठाउनु नै पिएसजीका लागि हितकर हुन्छ ।

पिएसजीका लागि भने ‘एम्बाप्पे फर्मुला’ भन्दा पनि खेलाडी एक्स्चेन्ज नै फाइदाजनक हुने छ । उसले २ जना उत्कृष्ट खेलाडीका साथै राम्रै रकम आम्दानी पनि गर्ने छ ।

फ्रेन्च ट्रान्सफर मार्केटको जम्मा ८ दिन बाँकी रहेको अवस्थामा नेमारले पिएसजी छाड्ने निश्चितप्राय नै छ । नेयमारको ट्रान्सफर निकै ठूलो भएकोले सम्भवतः अन्तिम दिनमा मात्र निर्णय हुनसक्छ । पिएसजीलाई नेमार राख्दाभन्दा बेच्दा फाइदा छ भने बार्सा जुनसुकै हालतमा पनि उनलाई भित्र्याउन चाहन्छ । अर्थात्, सबै तीन पक्ष यो ट्रान्सफरको समर्थनमा छन् भने यो सौदामा तीनवटै पक्षलाई फाइदा पनि छ । त्यसैले मुख्य प्रश्न भनेको कसलाई बढी फाइदा होला भन्नेमात्र हो । र, यी ८ दिनमा पिएसजी र बार्सामध्ये जसको बार्गेनिङ क्षमता तगडा छ ऊ नै यो सौदाबाट बढी लाभान्वित हुने छ ।

प्रकाशित मिति: शनिबार, साउन १८, २०७६ ०५:३७