जेद्दास्थित श्रमसहचारी उपाध्यायमाथि भिसा कारोबारको आरोप, नियतवश डिमाण्ड प्रमाणीकरण नगरेकाे गुनासाे

जेद्दास्थित श्रमसहचारी उपाध्यायमाथि भिसा कारोबारको आरोप, नियतवश डिमाण्ड प्रमाणीकरण नगरेकाे गुनासाे

A+ A A-

साउदीको जेद्दास्थित श्रमसहचारी प्रेमप्रसाद उपाध्यायले म्यानपावर कम्पनीले विभिन्न रोजगारदाता कम्पनीबाट ल्याएको डिमाण्ड प्रमाणीकरणमा ढिलासुस्ती गर्दै आएकाे आराेप लागेकाे छ । उपाध्यायले एउटै कम्पनीबाट आएका डिमाण्ड प्रमाणीकरण गर्न ढिलो गर्दा रोजगारदाता कम्पनीले कोटासमेत कटौती गर्न थालेको म्यानपावर व्यवसायीहरूले आरोप लगाएका छन् ।

गत जनवरी २० मा द–रिभर ओभरसिजले इसान कब्बानी एन्ड पार्टनर कम्पनीबाट ल्याएको ९७ वटा कोटा डिमाण्ड प्रमाणीकरणका लागि नेपाली महावाणिज्यदूतको कार्यालयमा पेस गरेको थियो । फेरि त्यही कम्पनीको ग्लोबल सोर्सिङ सर्भिसेस म्यानपावरले ९ दिन पछाडि ९७ वटै मागपत्र पेस गरेको थियो । श्रम सहचारी उपाध्यायले भने रिभरको ८० वटा डिमाण्ड प्रमाणीकरणको प्रक्रिया नै रद्द गरिदिए ।

साथै, उनले रिभरको जस्तै मागपत्र भएको ग्लोबल सोर्सिङ सर्भिसेस म्यानपावरको डिमाण्ड भने प्रमाणीकरण गरेको पाइएकाे छ । यो म्यानपावरले पनि ९७ वटै कोटा पेस गरेकोमा उनले ८० वटा मागपत्र प्रमाणीकरण गरेको पाइएकाे छ ।

मागपत्र पेस गरेको सात दिनपछि बिदाका कारण उनले डिमाण्ड रद्द गरेको रिभरको आरोप छ । भिसा प्रमाणीकरण निर्देशिकामा रोजगारदाता कम्पनीबाट आएको डिमाण्ड आवेदन परेको एक साताभित्र स्वीकृति अथवा प्रमाणीकरण गर्नुपर्ने व्यवस्था छ ।

डिमाण्ड प्रमाणीकरण रद्द भएको विषयमा जानकारी लिन खोज्दा श्रम सहचारी उपाध्यायले भने, ‘म तपाईंहरूको काम गर्न बसेको हो भन्दै’ जवाफ दिएको रिभरले जनाएको छ । रिभरकाअनुसार डिमाण्ड रद्द हुनुको कारण माग्दा समेत उपाध्यायले 'मसँग यसको जवाफ छैन', भने ।

रिभरको डिमाण्डमा कम्पनीले कामदारका लागि लाग्ने शुल्कसमेत तिरिसकेको र मागपत्र रद्द हुँदा रोजगारीसमेत गुमेको रिभरको गुनासो छ । मागपत्र रद्द भएको विषयमा श्रमसहचारी उपाध्यायसँग जानकारी लिन पटक–पटक फोन गर्दा कुनै प्रतिक्रिया नदिने गरेको रिभरका सञ्चालक रघु पुरीले जानकारी दिए ।

श्रमसहचारीले उल्टै रिभरका सञ्चालक पुरीले धम्क्याएको आरोप पनि लगाए । ‘म व्यवसायी हुँ । व्यवसायीलाई सहजीकरण गर्न बसेको सेवकलाई किन धम्क्याउँछु । मेरो कम्पनीले वैदेशिक रोजगार ऐनभित्र बसेर मागपत्र पेस गरेको छ’, उनले भने, ‘सानो समस्याले गर्दा रोजगारदाता कम्पनी र व्यवसायीबीच समस्या सिर्जना हुन्छ । यो त सम्बन्धित पक्षले बुझ्नुपर्ने विषय हो ।’

यस्तै, रोजगारदाता देशमा सहजीकरण गर्न बसेका कर्मचारीहरूले काम गर्न ढिलासुस्ती गर्न नहुने र त्यस्तो प्रमाण भेटिए ती कर्मचारीमाथि अनुसन्धान गरिने श्रम, रोजगार तथा सामाजिक सुरक्षा मन्त्रालयका सचिव एकनारायण अर्यालले बताए । यो विषयमा श्रम मन्त्रालयले सम्बन्धित पक्षसँग बुझ्ने उनको भनाइ छ ।

साउदीस्थित दूतावासका एक कर्मचारीका अनुसार उपाध्यायले जेद्दामा समस्यामा परेका कामदारलाई राम्रो व्यवहार नगर्ने गरेको गुनासो आइरहेकाे छ । उपाध्यायले अहिले दूतावासअन्तर्गत साउदीको जेद्दा हेर्दै आएका छन् । यो विषयमा जानकारी लिन खोज्दा श्रमसहचारी उपाध्यायले फोन रिसिभ गरेनन् ।

श्रमसहचारी उपाध्यायले डिमाण्ड प्रमाणीकरणमा समेत विभेद गर्दै आएको म्यानपावर व्यवसायीहरूको गुनासो छ । सहचारी उपाध्यायले नेपालका केही म्यानपावर व्यवसायीसँग साँठगाँठ गरी भिसा कारोबारमा संलग्न भएको आरोपसमेत लगाउँदै आएका छन् ।

प्रकाशित मिति: शुक्रबार, असोज ७, २०७९ १२:१२