सहकारीको ऋण छ ? अब १६ प्रतिशतभन्दा बढी नदिनुस्

A+ A A-

सरकारले सहकारी संस्थाहरुको व्याज दरमा हस्तक्षेप गरेको छ । सहकारी संस्थाहरुले मनपरी ढंगले व्याज तय गरिरहेको समयमा सहकारी विभागले व्याजको सीमा तोकेको हो ।

सहकारी संस्थाहरुले बचतमा बढीमा १० प्रतिशत र कर्जामा १६ प्रतिशत मात्रै व्याज लिन पाउने व्यवस्था गरिएको विभागले जानकारी दिएको छ ।

‘सहकारी ऐन तथा नियमावलीको व्यवस्था अनुसार गठन गरिएको सन्दर्भ व्याजदर निर्धारण तथा सिफारिस समितिको १६ साउनको निर्णय बमोजिम सहकारीले संस्थाहरुले बचतमा बढीमा १० प्रतिशत र कर्जामा बढीमा १६ प्रतिशत व्याज लिन पाउने नीतिगत व्यवस्था गरिएको छ, योभन्दा बढी व्याज असुल गर्न पाइदैन,’ विभागका रजिष्टार डा. टोकराज पाण्डेले भने ।

विभागले सहकारी संस्थाहरुको बचत तथा कर्जाको व्याज अन्तर (स्प्रेड) दर बढीमा ६ प्रतिशत हुनुपर्ने व्यवस्था गरेको छ ।

विभागका रजिष्टारको संयोजकत्वमा गठिन सन्दर्भ व्याजदर निर्धारण समितिमा १० सदस्य थिए । सोही समितिले यस्तो सीमा निर्धारण गरेको हो ।

समितिका सदस्यहरुमा राष्ट्रिय सहकारी महासंघका बरिष्ठ उपाध्यक्ष मिनराज कँडेल, भूमि व्यवस्था, सहकारी तथा गरिबी निवारण मन्त्रालय, अर्थमन्त्रालय, नेपाल राष्ट्र बैंक, राष्ट्रिय सहकारी विकास बोर्ड, बचत तथा ऋण केन्द्रीय सहकारी संघ, राष्ट्रिय सहकारी बैंक र बहुउद्देश्यीय केन्द्रीय सहकारी संघका प्रतिनिधि संलग्न समितिले यस्तो सिफारिस गरेको थियो । विभागका उपरजिष्टार समितिको सदस्य सचिव थिए । नेपाल राष्ट्र बैंकले बैंक तथा वित्तीय संस्थाको व्याज अन्तर दर साढे ४ प्रतिशत हुनुपर्ने नीतिगत व्यवस्था गरेको छ ।

यस्तो छ, विभागको निर्णय

प्रकाशित मिति: शनिबार, साउन १८, २०७६ ०४:४८