डा केसीको अवस्था जटिल, काठमाडौं फर्किन सकारात्मक देखिए

A+ A A-

धनगढीमा विगत १० दिनदेखि अनशनरत चिकित्सा शिक्षा क्षेत्र सुधारका अभियन्ता डाक्टर गोविन्द केसीको स्वास्थ्य अवस्था जटिल भएको चिकित्सकले बताएका छन् । चिकित्सा क्षेत्रको सुधारसहित विभिन्न ७ वटा माग राखेर आमरण अनशनमा बसेका केसीको स्वास्थ्य स्थितिमा गम्भीर समस्या आएको आशंका सेती प्रादेशिक अस्पतालले विज्ञप्ति मार्फत जनाएको छ ।

बुधबार पनि अस्पतालले एक विज्ञप्ति जारी गर्दै डा केसीको शरीरमा पोषणतत्व र पानीको असन्तुलनले बेहोस हुन सक्ने बताएको छ । त्यस्तै उनको पेटमा कडा खालको अल्सर भई रक्तश्राव भएको आंशका समेत अस्पतालले गरेको छ । अस्पतालले डा केसी शरीरमा पोषणतत्व र पानीको असन्तुलनले बेहोस हुन सक्ने बताएको छ । त्यस्तै पेटमा कडा खालको अल्सर भएको आशंका गरिएको पनि अस्पतालको छ ।

केसीले लिखित रुपमै मुखबाट पानी र नसाबाट रिडगर ल्याक्टेट बाहेक अन्य कुरा नलिने अडान लिएका कारण समस्या गम्भीर भएको अस्पताल जनाएको छ । उनको अवस्था बिग्रिएपछि अस्पतालले विशिष्ट सुविधासम्पन्न अस्पतालमा लैजान ५ दिन अघि नै सल्लाह दिइसकेको छ ।

अनशन बसेको दोस्रो दिनदेखि नै डा केसीको स्वास्थ्यमा समस्या देखिएपछि उनलाई धनगढीस्थीत सेती प्रादेशिक अस्पतालमा भर्ना गरिएको छ ।

जिल्ला प्रशासन कैलालीका सूचना अधिकारी शिवराज जोशीका अनुसार डा केसीलाई काठमाडौं लैजाने तयारी भइरहेको छ । ‘उहाँको अवस्था धेरै नै नाजुक भइसक्यो काठमाडौं नलगेर हुदैँन, उहाँपनि पोजेटिभ देखिनु भएको छ लैजाने तयारी गरिरहेका छौँ,' उनले शिलापत्रसँग भने । डा केसीलाई कसरी र के मा लग्दा सहज हुन्छ भनेर छलफल भइरहेको जोशीले बताए ।

मंगलबार डा केसीलाई काठमाडौं लैजान नेपाली सेनाको स्काइ ट्रक धनगढी विमानस्थल पुगेर फर्किएको थियो । उनले नजाने अडान राखेपछि विमान फर्किएको थियो । सरकारले मंगलबार दिउँसो सेनाको हेलिकप्टर धनगढी पठाएको थियो तर उनी जान मानेका थिएनन् ।