धनगढीबाट आरजु ‘ब्याक’, कांग्रेसले अब कसलाई देला टिकट ?

A+ A A-

आगामी मंसिर ४ गते हुने प्रतिनिधिसभाकाे निर्वाचनमा प्रत्यक्ष उम्मेदवारका लागि प्रधानमन्त्री पत्नीसमेत रहेकी कांग्रेस नेतृ आरजु राणा देउवाको नाम पाँच जिल्लाबाट सिफारिस भएकाे थियाे । उनी अघिल्लाेपटक पराजित कैलाली–५, बर्दिया–२, बाँके–३ र बागलुङ–२ बाट प्रत्यक्ष उम्मेदवारको रूपमा सिफारिस भएकी थिइन् । डडेल्धुराबाट समानुपातिक उम्मेदवारका लागि सिफारिस भएकी थिइन् ।

तीन प्रदेशका पाँच जिल्लाबाट सिफारिस भए पनि धेरैले आरजुको रोजाइमा यसपटक पनि कैलाली–५ नै पर्ने अनुमान गरेका थिए । तर, उनी यसपटक डडेल्धुराबाट समानुपातिकमा बस्न राजी भएकाे विषय बाहिर आएकाे छ । डडेल्धुरा प्रधानमन्त्री शेरबहादुर देउवाले २०४८ साल यताका सबै निर्वाचनमा प्रत्यक्ष जित निकालेकाे क्षेत्र हाे ।

कांग्रेसकाे बलियाे प्रभाव रहेकाे डडेल्धुराबाट आरजु समानुपातिक उम्मेदवार रहने भएपछि उनी अघिल्लाेपटक निर्वाचन लडेकाे कैलाली–५मा कांग्रेसबाट अब काे उम्मेदवार हाेलान् भन्नेमा चासाे बढेकाे छ ।

२०७४ मा भएको निर्वाचनमा कैलाली–५ बाट लडेकी आरजुलाई एमालेका नारदमुनी रानाले हराएका थिए । रानाले २७ हजार २०२ मतसहित विजयी हुँदा राणाले २२ हजार ३ सय २२ मत ल्याएकी थिइन् ।

यसपटक कैलाली–५ बाट आरजु ब्याक भएकाे विषय आधिकारिक रूपमा जानकारीमा नआएकाे नेपाली कांग्रेस कैलालीका सभापति नारायणदत्त भट्टले बताए । त्यसैले अहिले नै नयाँ उम्मेदवार खाेज्न हतार गरिहाल्नुपर्ने स्थिति नरहेकाे उनकाे भनाइ छ ।

‘म काठमाडाैंमै छु । अहिलेसम्म उहाँसँग मेरो भेट भएको छैन । तर, समानुपातिकमा जानुभयो भन्ने कुरा आइरहेकाे छ, मैले पनि मिडियाबाटै थाहा पाएको हुँ,’ भट्टले भने, 'आधिकारिक जानकारी आएपछि नयाँ उम्मेदवार काे हुने भन्ने छलफल हुन्छ ।'

कैलाली–५ बाट प्रतिनिधिसभामा आरजुको मात्रै नाम सिफारिस भएको हुँदा उनको विकल्पमा अब सिफारिस नभएका व्यक्तिले टिकट पाउनेछन् । यस्तो अवस्थामा धेरैले कांग्रेसबाट कारबाहीमा परेका पुष्करनाथ ओझाले टिकट पाउन सक्ने आकलन पनि गरेका छन् । सामाजिक सञ्जालमा पनि याे बहस चलिरहेकाे छ ।

ओझानिकट रहेका कांग्रेस कैलालीका पूर्वसचिव पूर्ण कुँवर अब ओझाले नै टिकट पाउने दाबी गर्छन् । ‘आरजु भाउजूले चुनाव लड्न खोज्नुभएको भए उहाँले टिकट पाउनुहुन्थ्यो । तर, उहाँ पछि हटेपछि निर्विकल्प उम्मेदवार भनेकाे पुष्करनाथ ओझा हाे', कुँवरले शिलापत्रसित भने ।

कांग्रेसबाट अघिल्लोपटक ओझाले टिकट नपाएपछि उनी रुष्ट बनेका थिए । उनलाई आरजु हराउन भूमिका खेलेको भन्दै साधारण सदस्यसमेत नरहने गरी गरिएकाे कारबाही अहिलेसम्म पनि फुकुवा भएकाे छैन । त्यसैले साधारण सदस्यसमेत नरहेका नेताले टिकट पाउने दाबी नै हास्यास्पद रहेकाे कांग्रेस कैलालीका अर्का एक नेता बताउँछन् ।

आरजु ब्याक हुँदा कांग्रेसबाट सुदूरपश्चिम प्रदेश महामन्त्री नरनारायण शाह मनु र सुनिल भण्डारीमध्ये एक नेताले टिकट पाउने सम्भावना बलियाे रहेकाे कतिपयकाे बुझाइ छ । प्रदेश महामन्त्री शाह कैलालीमा दुईपटक जिल्ला सभापति रहिसकेका नेता हुन् । यसपटक प्रदेशसभातर्फ प्रत्यक्ष र प्रतिनिधिसभातर्फ समानुपातिकमा उनकाे नाम सिफारिस भएकाे छ ।

कांग्रेस सभापति देउवाका पुराना सहयात्री भण्डारीकाे नाम भने कैलाली–४ काे प्रत्यक्षका लागि सिफारिस भएकाे छ । उनी यस क्षेत्रबाट अघिल्लाेपटक वाम गठबन्धनका उम्मेदवार लेखराज भट्टसँग हारेका थिए । उनलाई कैलाली–५मा ल्याउन सकिने चर्चा पनि व्यापकै छ ।

यस्तै, अघिल्लाेपटक प्रदेशसभा सदस्य रहेका डिल्लीराज पन्त पनि कैलाली– ५ मा अब प्रतिनिधिसभाकाे उम्मेदवार बन्न सक्ने बताइएको छ । कांग्रेस कैलालीका सचिव केशव मिश्र भने आरजु राणा समानुपातिकमा रहेको कुरा आधिकारिक जानकारी नआएकाले अहिले नै त्यसबारे छलफल नहुने बताउँछन् । आरजु पछि हटेका खण्डमा भने प्रतिनिधिसभाका लागि आकांक्षीहरू धेरै रहेकाे उनले बताए । ‘हामीले उहाँलाई भावी प्रधानमन्त्रीको रूपमा हेरेर एकल नाम सिफारिस गरेका हौँ । उहाँ समानुपातिक बस्ने भएपछि यहाँ धेरै आकांक्षी हुन सक्छन्,’ उनले भने', हामी पनि तयार छाैँ ।’

कतिपयले भने आरजुकाे नाम अहिले समानुपातिक सूचीमा रहे पनि अन्तिममा उनी प्रत्यक्ष चुनाव नै लड्ने दाबी गरिरहेका छन् । 'याे अहिलेकाे हल्ला हाे । कैलाली–५ मा उहाँले धेरै लगानी गर्नुभएकाे छ । उहाँ यहाँबाट नै प्रत्यक्ष चुनाव लड्नुहुन्छ र जित्नुहुन्छ । समानुपातिककाे कुरा हल्ला हाे', उनीनिकट एक नेताले भने ।

आरजु नहुँदा कैलाली–५ मा युवानेता नैनसिंह महरले टिकट पाउने सम्भावना बढेकाे भनेर पनि प्रचार भइरहेकाे छ । तर, आयातित नेतालाई धनगढी नस्वीकार्ने कांग्रेसकै नेताहरू बताउँछन् । कांग्रेस कैलालीका उपसभापति भीम बडुवालले बाहिरियाहरूले आँखा गाडे पनि स्वीकार्न नहुने बताएका छन् ।

'तीव्रताका साथ प्रतीक्षा गरिएको कैलाली–५ बाट डा. आरजु राणा देउवा आगामी मंसिर ४ मा हुन गइरहेको चुनाव नलड्ने भन्ने सुनिएको छ । उहाँले समानुपातिकतिर जाने इच्छा देखाउनुभएको छ । योबीचमा उहाँले त्यो ठाउँ बनाउनलाई धेरै योगदान दिँदै आउनुभएको कुरो निर्विवाद छ । धेरै बाहिरियाहरूले त्यो ठाउँमा फेरि पनि आँखा गाडिरहेको सुनिएको छ', बडुवालले फेसबुकमा लेखेका छन्, 'सबैलाई आग्रह छ, त्यो राम्रो होइन । याे ठाउँमा उहाँको विकल्पमा या स्थानीय नेतृत्वलाई नै अघि सार्नुपर्छ । हामीलाई राष्ट्रिय व्यक्तित्व नै चाहिने हो भने पार्टी सभापति शेरबहादुर देउवालाई नै पुन: चुनाव लड्न आग्रह गर्नुपर्छ । त्यो भयो भने मात्रै स्थानीय नेतृत्वमा सन्तुलन कायम रहनेछ ।'

प्रकाशित मिति: मंगलबार, असोज ४, २०७९ १३:५०