चिरा–चिरा गुल्मीका पीडा (तस्बिर सहित)

A+ A A-

अविरल बर्षका कारण गत ६ साउन मा गुल्मीको ठुलोलुम्पेक, थुम्का र लिम्घामा पहिरो गयो । पहिरोमा परी १३ जनाले ज्यान गुमाए । हजारौको संख्यामा विस्थापित छन् ।

पहिरोबाट सत्यवती गाउपालिकाको २ नम्वर वडाका १७ घर विस्थापित छन् । वडा नं. ३ मा पहिरोमा परी ५ जनाले ज्यान गुमाए भने वडा नं. ४ मा एउटै पहिरोले ३ वटा घर बगाउँदा ८ जनाको मृत्यु भयो । अहिले सत्यवती गाउपालिकाका २, ३ र ४ नम्वर वडमा राहत संकलन एवं वितरण जारी छ ।

चिरा परेका बस्ती

सत्यवती गाउपालिका–२ थुम्कामा १७ घर बिस्थापित हुदापनि उद्धार र राहतमा वडा नं. ३ र ४ मा मात्र जनशक्ति खटिए । राहत नपाएपछि यतिवेला वडा नं. ३ मा आएको राहत नै अहिले वडा नं. २ का जनताले पाइरहेका छन् ।

हाल वडा नं. २ का जनता राहत वितरण समितिमा समेत वडा नं. २ का कुनै पनि जनप्रतिनिधिलाई नराखेको, राहत वितरण समान नभएको गुनासो गरिरहेका छन् । ठुलोलुम्पेकमा साना ठुला गरी करिव १ सय भन्दा बढि पहिरो छ । पहिरोकै कारण मानिसहरु घर बस्ने स्थिति छैन् । पहिरोले सवैभन्दा छिया पारेको सिङदी र बझाडी हुन । जहाँ पाँच जनाले ज्यान गुमाए ।

वडा ३ का ३०७ घर उच्च जोखिममा

पहिरो कारण सत्यवती गाउपालिका–३ का २ सय ९० घरहरु उच्च जोखिममा परेका छन् । उच्च जोखिममा परेका घरहरुका १ हजार २ सय १८ जनालाई वडाले १५ स्थानमा शिविर सञ्चालन गरेर राखेको छ ।

वडाका सिंदी, कुरह, ल्हाचे, घारडाँडामा, रिपडाडा, बोरह, गेझा, कुटदाँडा, ओखर, ढुंगा चाल्ने, कस्न्थिला, दाङसिंगा, वेन्टुङ, काउले, गस्कोट र किल्दीपका घरहरु उच्च जोखिममा छन् । सो वडामा ३४ बर्षीया तिल कुमारी तरामु, ९ बर्षीय दर्शन तरामु, ४० बर्षीया माया विक, १५ बर्षीय बवि विक र ६३ बर्षीया दुर्गा सिंजालीको मृत्यु भयो ।

वडा २ का १७ घर उच्च जोखिममा

गुल्मीको सत्यवती गाउपालिका–२ मा पहिरोका कारण १७ घर उच्च जोखिममा परेका छन् । वडा २ का वडा सदस्य तारापति तरामुका अनुसार १७ परिबारका ४२ जनालाई अहिले शिविर राखेर राहत दिने काम भइरहेको छ ।

उनीहरुलाई वडा नं. २ को श्रीनेरामा रहेको गगनपुर आधारभुत विद्यालयमा राखेको उनले बताए । वडा नं. २ को थुम्का टोलमा १२ घर, चेमीमा ३ घर र पाडीमा २ घर विस्थापित भएका छन् ।

पहिरोका कारण ईन्द्रलाल राहडीको घर पुर्ण रुपमा क्षति भएको छ । मानविय क्षति सो वडामा नभएपनि भौतिक क्षति भएको वडा सदस्य तरामुको भनाई छ । पहिरोका कारण छविलाल तरामु, क्लव बराल, नारायण तरामु तरामु, विनय तरामु, रोम बहादुर राहाडि, लक्ष्मण भटट्राई, शेर बहादर राहाडी, लिला पन्थ कुँवर, मोतिलाल विक र खिम बहादुर कुँवरको घर उच्च जोखिममा परेको छ । गगनपुर टोल विकास संस्थाका अध्यक्ष गिरी राहाडीले राहत वितरण चुस्त र दुरुस्त नभएको बताए ।

राहत संकलन र वितरण जारी

साउन ६ गते पहिरो गएपछि ८ गते सम्म उद्दारको काम भयो । त्यसपछि राहत संकलन र वितरणको काम भइरहेको छ । विभिन्न संघ संस्थाहरुले गाउपालिकाको राहत कोषमा रकम जम्मा गरिरहेका छन् भने वडा नं. ३ मा १९ लाख वढी सहयोग आइसकेको छ ।

वडा नं. ३ का अध्यक्ष रुक बहादुर रानाका अनुसार अहिले सम्म १९ लाख ७ हजार ८ सय ८९ रुपैया संकलन भएको छ । सो रकम कैशाल विकास बैंकमा जम्मा भएको छ ।

पुर्नबासको विकल्प छैन

वडा नं. २ र ३ का ३ सय ७ घरहरु पुर्नबासको विकल्प नभएको वडा अध्यक्ष राना बताउँछन् । गाउपालिका र जिल्ला मार्फत अहिले ठुलोलुम्पेकमा इन्जिनियर, भुर्गविद् सहितको टोली बोलाई जग्गाको अवस्था बुझ्ने अध्यक्ष रानाले बताए ।

उनले उच्च जोखिममा बस्तीहरु भएकाले पुर्नबास वा स्थान्तरणनै बिकल्प भएको बताए । भुगर्भविद्ले दिएको प्रतिबेदनका आधारमा गाउपालिकाले निर्णय गरेर स्थान्तरण वा पुर्नबास के गर्ने भन्ने भन्न सकिने उनको भनाई छ ।

राहत हस्तान्तरण

गुल्मीको सत्यवती गाउपालिका वडा नं. २ र ३ का पहिरो पीडितलाई तराईबासी राहत संकलन समितिले सहयोग हस्तान्तरण गरेको छ । विहीबार एक कार्यक्रमका बीच सत्यबती गाउपालिका वडा नं. ३ मा पुगेर समितिले राहत सामाग्री हस्तान्तरण गरेको हो ।