कांग्रेसमा देखिन थाल्यो शेखरले भनेको 'विद्रोह', ४० प्रतिशतकाे मागमा अडिग

A+ A A-

नेपाली कांग्रेस धनुषाका पूर्व जिल्ला उपसभापति सन्तोष यादव सोमबार एमाले प्रवेश गरे । १४ औं महाधिवेशनमा उनले जिल्ला सभापतिमा प्रतिस्पर्धा गरेका थिए । कांग्रेसमा जवानी खर्चेका उनी विचार, सिद्धान्त नमिल्ने एमालेमा राजनीतिक जीवन सुरक्षित गर्न गए । पार्टी छोड्दै गर्दा उनले गम्भीर आरोप लगाए, ‘कांग्रेसमा वडा तहदेखि नै माथिसम्म टिकट बिक्री हुन्छ । किन्न नसक्ने पछि पर्छन् ।’

उनीसँगै केही नेता कार्यकर्ता पनि एमाले प्रवेश गरे । आगामी ४ मंसिरमा हुने प्रतिनिधि तथा प्रदेशसभा निर्वाचनमा धनुषा निर्वाचन क्षेत्र नम्बर ४ को ‘ख’ बाट एमालेको तर्फबाट प्रदेशसभा सदस्यका लागि टिकट पाउने पक्कापक्की भएपछि उनी एमाले छिरेकाे बताइन्छ ।

कांग्रेसले गठबन्धन गर्दा १०० सिट कम्तिमा राख्नुपर्ने नत्र विद्रोह हुने संस्थापन इतर समूहका नेता डा शेखर कोइराले चेतावनी दिँदै आएका छन् । गठबन्धन दलले मंसिर ४ को संघ र प्रदेशको चुनावमा कसलाई कति सिट भन्ने गलफति मिलाउन सकेका छैनन् । समानुपातिक उम्मेदवादरको बन्दसूचीमा दलहरू व्यस्त छन् ।

पछिल्ला भाषणमा कोइरालाले एउटा कुरा छुटाउँदैनन् कांग्रेसले १०० सिटमा उम्मेदवारी दिनुपर्छ । ‘वाम गठबन्धनलाई कांग्रेस एक्लैले हराएका क्षेत्र यसपाली हामीले गठबन्धनका नाममा अर्का दललाई छाड्न सक्दैनौं । यो कुरा मैले शेरबहादुरजी र प्रचण्डजीलाई पनि भनिसकेको छु,’ शेखर भन्छन्, ‘कांग्रेस बलियो भएका प्रतिनिधिसभा र प्रदेशसभा क्षेत्र अन्य दललाई छाड्दा स्वतः ती क्षेत्रमा विद्रोही उम्मेदवार उठ्न सक्छन्, कांग्रेसबाटै उठ्न सक्छन् ।’

कोइराललो भनेको बिद्रोह कार्यकर्ताले पार्टी छाड्ने र अर्को पार्टीमा उम्मेदवारसम्म बन्ने रहेको कोइराला निकट नेताहरू बताउँछन् । ‘पछिल्लो चुनावी मत परिणामका आधारमा कम्तिमा १०० सिट पाउनुपर्छ भन्ने हो । त्यसो हुन सकेन भने तल्ला तहमा रियाक्ट हुन्छ । विद्रोह हुने देखिन्छ,’ कांग्रेस केन्द्रीय सदस्य अजयबाबु शिवाकोटीले शिलापत्रसँग भने, ‘कतिपय मानिसहरू पार्टी परित्याग गर्न नसक्ने निस्क्रिय बस्न सक्छन् । सिफारिसको सन्दर्भमा होस् या गठबन्धन भैरहँदा निर्वाचन क्षेत्र नपाएर होस् कार्यकर्ता अन्य पार्टीमा जाने क्रम चलिरहेको छ ।’

चितवनमा ‘कांग्रेस शुद्धीकरण अभियान’ का नाममा एकीकृत विद्रोही समूह बनाएर असन्तुष्ट कांग्रेस नेता कार्यकर्ता एक भैरहेका छन् । स्थानीय चुनावमा भरतपुर महानगर प्रमुखमा उम्मेदवारी दिएका जगन्नाथ पौडेल पनि सो अभियानमा जोडिएका छन् । उस्तै–उस्तै नाम भएको कांग्रेस बीपीमा पनि असन्तुष्ट कार्यकर्ताको प्रवेश गर्दैछन् ।

साउन मध्यमा कांग्रेस दैलेखका नेता पूर्वपार्टी सचिव भेषबहादुर थापा नेपाली कांग्रेस बीपीमा प्रवेश गरे । स्वतन्त्रको नाममा पनि कार्यकर्ता आकर्षित भैरहेको शेखर पक्षका नेताहरू बताउँछन् । केही दिनअघि धनुषामा कांग्रेस कार्यकर्ता एमाले प्रवेश गरे । ‘पार्टीभित्र पूरा सिटमा चुनाव लडाउँदा पनि नपुग्ने संख्यामा साथीहरू आकांक्षी हुुनुहुन्छ ।

पार्टीमा वर्षौसम्म काम गरेका योगदान दिएका नेताहरूलाई थप काम गर्ने अवसर नै निर्वाचन हो,’ कांग्रेस नेता गुरुराज घिमिरेले शिलापत्रसँग भने, ‘गठबन्धनमा सिट बाँडफाँट गर्दा संख्यामा ध्यान दिन सकिएन भने पार्टीमा असन्तुष्टि बढ्न सक्छ । त्यो असन्तुष्टिलाई नियन्त्रण गर्ने कसरी, रोक्ने कसरी ? पार्टीमा समस्या आउँछ । गम्भीर रुपमा समस्या आउँछ ।’ पार्टीभित्र न्यायोचित टिकट वितरण नभए भागवन्डा खोज्ने तयारी इतर समूहको छ ।

'न्यायोचित रुपमा टिकट वितरण हुन्छ भन्ने आश्वस्त पार्न सक्नुपर्छ । न्यायोचित टिकट वितरण हुदैँन भने महाधिवेशनमा प्राप्त भएको मतको आधारमा ६०–४० को हिसाब हुन्छ,’ घिमिरेले भने ।

चुनावको मुखमा नेता कार्यकर्ता पार्टी छाड्ने र प्रवेश गर्ने क्रम चलिरहनु स्वभाविक मानिन्छ । ‘शेखर जी १०० भन्नुहुन्छ म गठबन्धनको ६० प्रतिशत भन्छु त्यो भनेको ९९ हो,’ कांग्रेस नेता अर्जुननरसिंह केसीले भने, ‘हाम्रो सोचाइ र हाम्रो मापदण्ड भनेको त्यही हो । पार्टीभित्र होस् या गठबन्धनमा होस् सन्तुलित हुनुपर्छ भन्ने हाम्रो मापदण्ड हो ।’

गठबन्धनमा सिट बाँडफाँट गर्दा वडाको मतलाई वेवास्ता नगर्न पार्टी सभापति शेरबहादुर देउवालाई सम्झाइरहेका छन् । कांग्रेस कार्यकर्तालाई एक राख्न सकिएन भने त्यसको प्रत्यक्ष फाइदा एमालेलाई पुग्ने र त्यसले कांग्रेसलाई मात्र नभएर गठबन्धनलाई समेत घाटा पुग्ने इतर समूहका निश्कर्ष छ । ‘कांग्रेसले पाएको सिटमा पनि न्यायपूर्ण रुपमा टिकट वितरण गर्नुपर्‍यो । जहाँ जहाँ हाम्रो समूहको मान्छे जोडिएका छन् त्यो ठाउँमा मिलाई मिलाई गठबन्धनको नाममा छोड्दै जाने हो भने त्यस्ता ठाउँमा पनि गाह्रो हुन्छ । यी नै सन्दर्भमा जोडेर डा साबले भन्नुभएको हो,’ नेता शिवाकोटीले भने ।

प्रकाशित मिति: शुक्रबार, भदौ ३१, २०७९ १९:०२