ग्लोबल टी–२० मा आज सोमपालको डेब्यु ? यस्तो छ सम्भावना

A+ A A-

क्यानडामा जारी ग्लोबल टी२० लिगमा आज सोमपाल कामीको टिम विन्निपेग हक्सले ब्राम्प्टन वुल्भ्सको सामना गर्दैछ । टी२० विश्वकप २०२० को एसिया छनोटमा राष्ट्रिय टिमका लागि खेल्न व्यस्त रहेकाले सोमपालले विन्निपेगका सुरुवाती ३ खेल गुमाएका थिए ।

चौथो खेलमा ब्राम्प्टनविरुद्ध भने सोमपालले खेल्ने प्रबल सम्भावना छ । विन्निपेग ३ खेलमा २ जित निकाल्दै ४ अंकका साथ लिगको तेस्रोस्थानमा छ । यस्तै, २ खेल खेलेर दुवै खेलमा जित हासिल गरेको ब्राम्प्टन ४ अंकका साथ दोस्रो स्थानमा छ ।

विन्निपेगको टिममा ४ जना अलराउन्डर छन् । सोमपाल नेपालको राष्ट्रिय टिमका बलिङ अलराउन्डर भए पनि विन्निपेगले उनलाई बलरका रुपमा अनुबन्ध गरेको हो ।

विदेशी खेलाडीको कोटामा विन्निपेगको अन्तिम ११ मा पर्न सोमपालले ३ जना खेलाडीको चुनौति पाखा लगाउनुपर्ने हुन्छ, कलिम साना, पल भान मिकेरेन र उमर घानी ।

पाकिस्तानका कलिम र नेदरल्यान्ड्सका मिकेरेन दुवैजना सोमपालजस्तै मिडियम फास्ट बलर हुन् । यी दुई बाहेक विन्निपेगले उमर घानिलाई फुलटाइम बलरका रुपमा खेलाउने गरेको छ । तर, उनी लेगब्रेक बलर भएकाले सोमपालका लागि खतरा होइनन् ।

यसै पनि ३ खेलमध्ये २ खेलमा मात्र बलिङ गर्ने मौका पाएका घानीले ४ ओभरमात्र बलिङ गरेका छन् । ४ ओभरमा ३४ रन दिएर उनी १ विकेटमात्र लिन सफल रहे ।

यसअघिका ३ खेलमै प्लेइङ सेटमा स्थान बनाएका कलिम र मिकेरेनपनि महंगो साबित हुँदै आएका छन् । कलिमले १२ ओभरमा सिमित भएको मोन्ट्रियल टाइगर्सविरुद्धको खेलमा १ ओभर बलिङ गर्दै २० रन दिएका थिए । महंगो साबित भएपछि उनले अर्को ओभर बलिङ गर्नै मौका पाएनन् ।

भ्यानकुभर नाइट्सविरुद्धको दोस्रो खेलमा ३ ओभर बलिङ गरेका कलिमले ३१ रन दिँदै विकेटविहीन रहे । टोरन्टो नेशनल्सविरुद्ध भने ४ ओभरको पुरै स्पेल बलिङ गरेका कलिमले सुधारिएको बलिङ गर्दै ३२ रन दिएर १ विकेट आफ्नो नाममा लेखाए ।

यसैगरी, मिकेरेन पनि हरेक खेलमा महंगो साबित हुँदै आएका छन् । मोन्ट्रियलविरुद्ध २ ओभर बलिङ गरेका उनले २२ रन दिएपनि विकेट लिन भने असफल रहे ।

भ्यानकुभरविरुद्ध पनि उनको प्रदर्शनमा सुधार आएन । ४ ओभरमा ४४ दिँदै उनी विकेट लिन फेरि पनि असफल रहे ।

दुवै खेलम महंगो साबित भएपछि विन्निपेगले तेस्रो खेलमा उनको सट्टा पाकिस्तानका मोहम्मद इरफानलाई टिममा सामेल गरेको थियो । ३७ वर्षिय इरफानले टोरन्टोविरुद्ध ४ ओभरमा ३९ रन दिएर १ विकेट लिए ।

ब्राम्प्टनविरुद्धको चौथो खेलसम्म आइपुग्दा विन्निपेग आफ्ना फुलटाइम बलरबाट असन्तुष्ट छ । ३ खेलमा फुलटाइम बलरले केबल ३ विकेटमात्र लिन सकेका छन् भने महंगो पनि साबित भएका छन् ।

विन्निपेगको जितमा अलराउन्डरले बलिङ र ब्याटिङ दुवै सम्हालिरहेका छन् । त्यसैले, विन्निपेगलाई आफ्ना बलरबाट धेरै अपेक्षा छैन भने टिममा रहेर पनि प्लेइङ सेटमा नपरेका अन्य बलरको क्षमता जाँच्न पनि समस्या छैन ।

सबै बलर फर्ममा नरहेकाले सोमपाललाई विन्निपेगले परिक्षाकै रुपमा भए पनि टिममा स्थान दिनसक्छ । जसरी मिकेरेनको स्थानमा टिममा परेका इरफानले तुलनात्मक रुपमा कम रन दिएर एक विकेट पनि दिलाए, विन्निपेगलाई कलिमको स्थानमा सोमपाललाई खेलाउँदा कुनै घाटा हुनेछैन । बरु फाइदा हुनसक्छ ।

कलिम बलरमात्र हुन् भने सोमपालले क्रिकेटका सबै फर्म्याटमा ब्याट र बल दुवैमा आफूलाई अब्बल साबित गरिसकेका छन् ।

त्यसैले, सुरुवाति खेलका दुवै बलर कलिम र मिकेरेनलाई आराम दिएर इरफान र सोमपाललाई टिममा स्थान दिनसक्छ । एक खेल कम खेलेको ब्राम्प्टन समान अंकका साथ अंकतालिकामा एक स्थान माथि छ ।

बलियो टिमको सामना गर्न विन्निपेग आफ्नो बलिङ, ब्याटिङ र फिल्डिङ सबै पक्ष बलियो बनाउने ध्याउन्नमा रहनेछ ।

विन्निपेगको बलिङको बागडोर उसका बलरले नभएर अलराउन्डरले सम्हालिरहेका छन् । सोमपाल टिममा पर्नु वा नपर्नुले उसको बलिङको स्तरमा कुनै फरक पर्दैन । त्यसैले, सोमपाललाई मौका दिएर उनको प्रदर्शन हेर्नु नै उसका लागि विवेकपूर्ण निर्णय हुनसक्छ ।

पाँचौ तथा पहिलो चरणको अन्तिम खेलमा एडमोन्टन रोयल्सको सामना गर्ने विन्निपेगका लागि सोमपाल वाइल्ड कार्ड बन्न सक्छन् । उनलाई आज टिममा राखेमा विन्निपेगले आफ्ना सबै बलरको प्रदर्शन हेर्दै दोस्रो चरणका खेलका लागि आवश्यक रणनीति बनाउन सहज हुनेछ ।

ब्याटिङको हकमा विन्निपेग निकै बलियो छ । उसको समस्या बलरमात्र हुन् । जारी प्रतियोगितामा विन्निपेगलाई कसैले अलआउट गर्न सकेको छैन ।

७ जना भरपर्दा ब्याट्सम्यान खेलाउने विन्निपेगको ब्याटिङ लाइनअपमा सोमपालको ब्याटिङ कौशलले सकारात्मक भूमिका खेल्नेमा दुईमत छैन ।

सोमपाल विन्निपेगको कमजोर बलिङ प्रदर्शनको समाधान र बलियो ब्याटिङ लाइनअपमा ‘प्लस वान’ बन्न सक्षम छन् । त्यसैले, आज ब्राम्प्टनविरुद्धको खेलबाट उनले ग्लोबल टी२० मा डेब्यु गर्ने प्रबल सम्भावना छ ।

प्रकाशित मिति: शुक्रबार, साउन १७, २०७६ ०२:१७