श्रमिकको भरमा गौतम बुद्ध विमानस्थलको उडान, दैनिक अन्तर्राष्ट्रिय उडान यही सातादेखि

श्रमिकको भरमा गौतम बुद्ध विमानस्थलको उडान, दैनिक अन्तर्राष्ट्रिय उडान यही सातादेखि

A+ A A-

गौतम बुद्ध अन्तर्राष्ट्रिय विमानस्थलबाट सातामा तीन दिन अन्तर्राष्ट्रिय उडान भइरहेको छ । अहिले जजिरा एयरलाइन्सले मात्र भैरहवा–कुवेत उडान सोमबार, बुधबार र शनिबार गर्दै आएको गौतम बुद्ध अन्तर्राष्ट्रिय विमानस्थलले जनाएको छ ।

विमानस्थलका अनुसार भदौ ३१ गतेदेखि जजिरा एयरलाइन्सले दैनिक उडान भर्ने तालिका छ । जजिराले नियमित उडानका लागि आवश्यक प्रक्रिया पूरा गरिसकेको विमानस्थलले जनाएको छ ।

गौतम बुद्ध विमानस्थलबाट कुवेत गन्तव्यमा सातामा तीन उडान गरिरहेको जजिराले आगामी भदौ ३१ गतेदेखि दैनिक उडान गर्ने विमानस्थलका प्रमुख गोविन्दप्रसाद दाहालले शिलापत्रलाई जानकारी दिए ।

विमानस्थल प्रमुख गौतमका अनुसार यो विमानस्थलबाट बीज एयरवेजले पनि नियमित उडान सञ्चालन गर्ने भएको छ । एयरवेजले आगामी कात्तिक १३ (अक्टोबर ३० तारिख)देखि भैरहवाबाट संयुक्त अरब इमिरेट्स (यूएई)को अबुधाबीमा उडान भर्ने सहमति भएको उनले जानकारी दिए ।

हङ्गेरीबाट विश्वका विभिन्न देशमा उडान गरिरहेको उक्त एयरवेजले नेपालमा सातामा तीन दिन उडान गर्ने सहमति भइसकेको विमानस्थलले जनाएको छ । योसँगै गौतम बुद्ध अन्तर्राष्ट्रिय विमानस्थलबाट अन्तर्राष्ट्रिय उडान भर्ने दुई एयरलाइन्स पुगेका छन् । जजिराले सुरुदेखि उडान गरिरहेको छ भने बीजले पनि छिट्टै उडान गर्ने विमास्थलले जानकारी दियो ।

त्रिभुवन अन्तर्राष्ट्रिय विमानस्थलकै क्षमतामा गौतम बुद्ध अन्तर्राष्ट्रिय विमानस्थल सञ्चालन गर्न सकिने विमानस्थल प्रमुख दाहालले बताए । ‘दैनिक २५ वटासम्म अन्तर्राष्ट्रिय उडानका लागि समस्या हुँदैन । यतिसम्म उडानको क्षमता र भौतिक पूर्वाधार छ । अब अन्तर्राष्ट्रिय उडानको संख्या बढाउन पहल गर्नुपर्छ ।’ उनले भने, ‘गौतम बुद्ध अन्तर्राष्ट्रिय विमानस्थल सञ्चालनमा आएदेखि खासै प्राविधिक समस्या देखिएको छैन । त्यही भएर त्रिभुवन अन्तर्राष्ट्रिय विमानस्थलको चाप कम गर्न यो विमानस्थल प्रयोगमा ल्याउनुपर्छ ।’

नेपालमा अन्तर्राष्ट्रिय उडान भर्दै आएका अन्य एयरलाइन्ससँग पनि उडान भर्ने विषयमा छलफल भइरहेको उनको भनाइ छ ।

अहिलेसम्म श्रमिकको भरमा उडान

जजिरा एयरलाइन्सबाट भैरहवा–कुवेत सातामा ९ सय जना यात्रु लिएर जाने गरेको विमास्थलको तथ्यांक छ । त्यस्तै, कुवेत–भैरहवा एक उडानमा १ सय ८० जनाको हाराहारीमा यात्रु लिएर आउने गरेको विमानस्थलले जनाएको छ ।

विमानस्थलका प्रमुख दाहालका अनुसार गौतम बुद्ध अन्तर्राष्ट्रिय विमानस्थल सञ्चालनमा आएयता ९५ प्रतिशत श्रमिकले मात्र उडान गरेका छन् । यो विमानस्थलबाट जजिरा एयरलाइन्सको उडान मात्र छ । उक्त एयरलाइन्सको उडानबाट शतप्रतिशत वैदेशिक रोजगारीमा जाने र फर्किने कामदार मात्र हुने गरेको उनले बताए ।

‘अहिलेसम्म कामदारकै भरमा अन्तर्राष्ट्रिय उडान भइरहेको छ । यो नराम्रो पक्ष त होइन । तर, अन्य व्यक्तिहरूले पनि यो विमानस्थलको प्रयोग गर्दा आकर्षण बढ्छ भन्ने मात्र हो,’ उनले भने, ‘नेपालमा ७२ वर्षपछि सञ्चालनमा आएको दोस्रो अन्तर्राष्ट्रिय विमानस्थल भएका कारण यसको प्रयोग बढाउनुपर्छ भन्ने हो । सम्भावना भएकै कारण अन्तर्राष्ट्रिय उडान बढाउन सक्दो प्रयास भइरहेको छ ।’

अन्तर्राष्ट्रिय विमानस्थल सञ्चालनमा आएपछि जतिसक्दो प्रयोगमा ल्याउनुपर्छ । यही योजनाका साथ काम भइरहेको उनको भनाइ छ ।

नेपालमा २००६ सालमा त्रिभुवन विमानस्थल सञ्चालनमा आएपछि पहिलोपटक अर्को अन्तर्राष्ट्रिय विमानस्थल २ जेठबाट सञ्चालनमा आएको थियो ।

सञ्चालनमा आएको गौतम बुद्ध अन्तर्राष्ट्रिय विमानस्थलबाट हालसम्म करिब ११ हजार यात्रुले ओहोर–दोहोर गरेको विमानस्थलले जनाएको छ । जसमा ९५ प्रतिशत वैदेशिक रोजगारीमा जाने–फर्किने श्रमिक नै रहेको विमानस्थलले जनाएको छ ।

प्रकाशित मिति: मंगलबार, भदौ २८, २०७९ ०६:२३