चुनावमा भिड्न धमाधम म्यानपावर व्यवसायीकाे नाम सिफारिस, कांग्रेसका धेरै

A+ A A-

मंसिर ४ गते हुने प्रतिनिधिसभा र प्रदेशसभा निर्वाचनमा करिब एक दर्जन म्यानपावर व्यवसायीहरूको नाम उम्मेदवारका लागि सिफारिस भएको छ । २०७४ सालको निर्वाचनमा पाँच जना म्यानपावर व्यवसायी सिफारिस भएका थिए ।

आगामी निर्वाचनमा भने एक दर्जनभन्दा धेरै व्यवसायी उम्मेदवारका लागि सिफारिस भएको नेपाल वैदेशिक रोजगार व्यवसायी संघले जनाएको छ । गत वैशाखमा भएको स्थानीय निर्वाचनमा ४० जनाभन्दा धेरै रोजगार व्यवसायीले चुनावमा प्रतिस्पर्धा गरेका थिए । जसमध्ये प्रमुख–उपप्रमुख र वडाध्यक्ष गरी २१ जना व्यवसायी स्थानीय निर्वाचनमा निर्वाचित भएका थिए ।

४ मंसिरमा हुने आमचुनावमा नेपाली कांग्रेसबाट कञ्चन ह्युमन रिसोर्स सर्भिसेजका सञ्चालक किरणकिशोर घिमिरे दाङको क्षेत्र नम्बर २ बाट प्रत्यक्षतर्फ प्रतिनिधिसभा सदस्यका लागि सिफारिस भएका छन् ।

कांग्रेसबाटै नेपाल वैदेशिक रोजगार व्यवसायी संघका पूर्वअध्यक्ष तथा स्काई ओभरसिजका सञ्चालक बलबहादुर तामाङ ताप्लेजुङ (ख)बाट प्रदेशसभा सदस्यको उम्मेदवारमा सिफारिस भएका छन् ।

संघका पूर्वअध्यक्ष तथा खगोल ओभरसिजका सञ्चालक विमलप्रसाद ढकाल नेपाली कांग्रेस रुपन्देही क्षेत्र नम्बर ३ (ख) बाट लुम्बिनी प्रदेशसभा सदस्यमा उम्मेदवार सिफारिस भएका छन् ।

यस्तै, नेपाल वैदेशिक रोजगार व्यवसायी गणतान्त्रिक मञ्चका अध्यक्ष कान्तिपुर म्यानपावरका सञ्चालक धनलाल जैसी म्याग्दीबाट गण्डकी प्रदेशसभा सदस्यका लागि उम्मेदवार सिफारिस भएका छन् । उनीसँगै मञ्चका महासचिव आकृति रिक्रुटमेन्टका कुन्छा दोर्जे डिम्दोङ प्रतिनिधिसभाको समानुपातिकका लागि उम्मेदवार सिफारिस भएका छन् । उनीहरू नेकपा माओवादीबाट सिफारिस भएका हुन् ।

यसैगरी, रियाज एण्ड फराह ओभरसिजका सञ्चालक नेपाली कांग्रेसका महाधिवेशन प्रतिनिधि मित्रदेव घिमिरे (गोपाल) कपिलवस्तु निर्वाचन क्षेत्र नम्बर १ (ख) बाट लुम्बिनी प्रदेशसभामा सिफारिस भएका छन् । नेकपा एमालेका तर्फबाट ताप्लेजुङको प्रदेश निर्वाचन क्षेत्र ‘ख’बाट चित्रगुप्त साँवा लिम्बू र त्रिवेणी चेम्जोङको उम्मीदवारी सिफारिस भएको छ ।

साथै, लक्की एच आर सोलुसनका सञ्चालक ऋषिप्रसाद शर्मालाई सुर्खेत निर्वाचन क्षेत्र–१ प्रदेश (ख) बाट नेपाली कांग्रेसले प्रदेशसभा सदस्य उम्मेदवार बनाउन सिफारिस गरेको छ । उनीसँगै त्रिलोक विश्वकर्मा नेपाली कांग्रेसको तर्फबाट प्रतिनिधिसभाको समानुपातिकतर्फ म्याग्दी जिल्लाबाट सिफारिस भएका छन् ।

युवा व्यवसायी अनिल बोगटी नेकपा एकीकृत समाजवादी पार्टीबाट संघीय सांसदका लागि समानुपातिकतर्फ सिफारिस भएको संघले जानकारी दिएको छ । इच्छुकमध्ये अधिकांशको आकांक्षा प्रदेशसभा र थोरै व्यवसायीको मात्र प्रतिनिधिसभाका लागि देखिएको छ । धेरै व्यवसायी कांग्रेसबाट सिफरिस भएका छन् ।

झापा–४ मा एमालेका तर्फबाट पूर्वम्यानपावर व्यवसायी एलपी साँवा सिफारिस भएका छन् । उनी अहिले पनि सांसद हुन् । यस्तै, पूर्वम्यानपावर व्यवसायी टेकबहादुर गुरुङसमेत मनाङबाट सिफारिस भएका छन् । उनी कांग्रेसबाट सिफारिस भएका हुन् ।

वैदेशिक रोजगार व्यवसायीहरूको पनि सरकार र संसदमा उपस्थिति आवश्यक भएकाे संघका पूर्वअध्यक्ष ढकालले जानकारी दिए । व्यवसायीहरूले पार्टीमा गरेको योगदान, सहयोग र भविष्यमा राष्ट्रका लागि गर्न सक्ने योगदानका आधारमा आफ्नो उम्मेदवारी दिएको उनले बताए । म्यानपावर व्यवसाय पनि अर्थतन्त्रको पाटो भएका कारण यो क्षेत्रको समेत प्रतिनिधित्व आवश्यक रहेको उनकाे भनाइ छ ।

प्रकाशित मिति: सोमबार, भदौ २७, २०७९ १३:१७