प्रहरीको ‘वान्टेड’ सूचीमा सन्दीप, के–के प्रमाण जुटाउँदैछ प्रहरी ?

A+ A A-

नाबालिका बलात्कारको आरोप लागेका नेपाली राष्ट्रिय क्रिकेट टिमका कप्तान सन्दीप लामिछानेविरुद्ध जिल्ला अदालत काठमाडौंले पक्राउ पुर्जी जारी गरेसँगै उनी प्रहरीको ‘वान्टेड’ सूचीमा छन् ।

प्रहरी प्रधान कार्यालयले सन्दीपलाई जहाँ भेट्याे, त्यहीँबाट पक्राउ गर्न देशभरका प्रहरी कार्यालयलाई निर्देशन दिएको छ । उपत्यका प्रहरी प्रमुख एआईजी रवीन्द्रबहादुर धानुकले सन्दीपविरुद्ध पक्राउ पुर्जी जारी भएकाले उनको खोजीमा प्रहरी सक्रिय रहेको बताए ।

‘लामिछानेविरुद्ध पक्राउ पुर्जी जारी भइसकेको छ । प्रहरी सक्रिय छ । कुनै पनि बेला उनलाई हामी पक्राउ गरेर अनुसन्धानको दायरामा ल्याउँछौँ', धानुकले भने ।

यद्पि हाल सन्दीप क्यारेवियन प्रिमियर लिग (सीपीएल) खेल्न वेस्ट इन्डिजमा छन् । बिहीबार उनीविरुद्ध पक्राउ पुर्जी जारी भएसँगै नेपाल क्रिकेट संघ क्यानले राष्ट्रिय टिमबाट निलम्बन गरेकाे छ ।

शुक्रबार सन्दीपले आफूमाथि लागेको आरोप निराधार रहेको भन्दै केही दिनमा सीपीएल छोडेर नेपाल फर्किने र नेपालको कानुनप्रति भरोसा रहेको बताएका छन् । मंगलबार साँझ नुवाकोटकी १७ वर्षीया नाबालिकालाई ५ भदौमा भक्तपुरको नगरकोट घुमाएर गौशाला पिगंलास्थानस्थित होटल काठमाडौं इनमा राखेर राति बलात्कार गरेको उजुरी प्रहरीमा परेको थियो ।

काठमाडौं प्रहरी परिसरका प्रमुख एसएसपी भरत बोहराका अनुसार नाबालिका र सन्दीप दुवै जना होटलको कोठा नम्बर ३०५ मा बसेको खुलेको छ । नाबालिकाको उजुरीपछि अनुसन्धानमा खटिएको प्रहरीले लामिछाने बसेको भनिएको होटलको क्लोज सर्किट सीसी क्यामेराकाे दृश्यमा समेत लामिछाने ११ बजेर ५५ मिनेटमा इन्ट्री भएको देखिएको जनाएकाे छ ।

त्यसअघि पीडितले उजुरीमा उल्लेख गरेजस्तै भक्तपुरको चाँगुनारायण नगरपालिका– ८, सुडालस्थित बोजिनी रिसोर्टमा समेत बसेको पुष्टि भएको छ । चाँगुनारायण रिसोर्टमा सन्दीप र नाबालिका इन्ट्री भएको लगबुकमा भेटिएको हो । एक प्रहरी अधिकारीका अनुसार बोजिनी रिसोर्टमा सन्दीप साँझ ८ बजे इन भएर १० बजे बाहिर निस्केका थिए । रिसोर्टको सीसी क्यामेरामा भने सन्दीपको दृश्य भेटिएको छैन ।

सीसी क्यामेरा बिग्रिएका कारण दृश्य नदेखिएको रिसोर्ट सञ्चालकले प्रहरीलाई बताएका छन् । यद्यपि प्रहरीले रिसोर्टकाे सीसीटीभीकाे हार्डडिस्क नै परीक्षणका लागि ल्याएको गौशाला प्रहरीले जनाएको छ । एक प्रहरी अधिकारीका अनुसार युवतीसँग बयानसमेत प्रहरीले लिइसकेको छ । काठमाडौं प्रहरीका एक अधिकारी आफैँ पुगेर पीडित नाबालिकाको बयान लिएका हुन् ।

अनुसन्धानमा संलग्न एक अधिकारीका अनुसार पीडित नाबालिकाले दिएको बयान र प्रहरीले संकलन गरेको सीसीटीभी फुटेज मिल्दोजुल्दो देखिएको छ । प्रहरीले नाबालिकाको एकद्वार संकट व्यवस्थापन केन्द्रमा स्वास्थ्य परीक्षणसमेत गरेको छ । स्वस्थ्य परीक्षणको रिपोर्ट भने आउन बाँकी रहेको काठमाडौं प्रहरी परिसरका प्रमुख एसएसपी बोहराले बताए ।

अधिवक्ता प्रेमसिंह भट्टका अनुसार बलात्कार घटनामा अदालतले सबैभन्दा बलियो प्रमाणको रूपमा पीडितलाई नै हेर्ने गर्छ । बलात्कार आरोप पुष्टि भए सन्दीपलाई १० देखि १२ वर्ष कैद सजाय हुन सक्छ । नेपालको कानुनले १८ वर्षभन्दा कम उमेरकालाई नाबालिका मानेको छ ।

मुलुकी अपराध संहिता ऐन, २०७४ को दफा २१९ को उपदफा २ अनुसार कसैले पनि मञ्जुरी लिएर वा नलिएर १८ वर्षभन्दा कम उमेरको कुनै पनि नाबालिकासँग यौन सम्बन्ध राखे त्यो जबर्जस्ती करणी गरेको ठहरिने उल्लेख गरेको छ ।

उजुरीमा उल्लेख भएअनुसार बलात्कृत पीडित १७ वर्षकी छिन् ।

प्रकाशित मिति: शुक्रबार, भदौ २४, २०७९ १३:००